Capitol Sete

Nun pare sabe de do los ia veni, ma los es alá, en la Foresta: Canga e Bebe Ru. Cuando Pu demanda a Cristofer Robin, “Como los ia veni así?” Cristofer Robin dise, “En la Modo Comun, si tu sabe cual me intende, Pu,” e Pu, ci no sabe, dise “O!” A pos el acorda duple con testa e dise, “En la Modo Comun. A!” A pos el vade per visita sua ami Porceta e vide como el pensa sur lo. E a la casa de Porceta el trova Coneo. Alora tota de los discute lo a junta.

“Lo cual me no gusta en esta cosa es,” Coneo dise. “Así nos es – tu, Pu, e tu, Porceta, e Me – e subita —”

“E I-aa,” Pu dise.

“E I-aa – e alora subita —”

“E Buo,” Pu dise.

“E Buo – e alora tota subita —”

“O, e I-aa,” Pu dise. “Me ia oblida cuasi el.”

“Así – nos – es,” Coneo dise multe lenta e atendente, “tota – de – nos, e alora, subita, a un matina nos velia, e cual nos trova? Nos trova un Animal Strana entre nos. Un animal sur ci nos ia oia an nunca a ante! Un animal ci porta sua familia de así a alá con se en sua pox! Suposa si me ta porta mea familia de así a alá con me en mea pox, cuanto poxes me ta vole?”

“Des-ses,” Porceta dise.

“Des-sete, no?” Coneo dise. “E un plu per un teleta – acel es des-oto. Des-oto poxes en un veste! Nonposible.”

On ave un silentia longa e pensosa … e alora Pu, ci ia fronsi multe forte sua suprasiles tra alga minutos, dise: “Me calcula des-sinco.”

“Cual?” Coneo dise.

“Des-sinco.”

“Des-sinco de cual?”

“Tua familia.”

“Como sur los?”

Pu frota sua nas e dise ce el ia crede ce Coneo ia nara sur sua familia.

“Vera?” Coneo dise nonatendente.

“Si, tu ia dise —”

“Oblida lo, Pu,” Coneo dise nonpasiente. “La demanda es, Como nos va ata con Canga?”

“O, me comprende,” Pu dise.

“La ata la plu bon,” Coneo dise, “ta es fura Bebe Ru e asconde el, e cuando Canga dise, ‘Do es Bebe Ru?’ nos dise, ‘Ahá!’

“Ahá!,” Pu dise, praticante. “Ahá! Ahá! … Natural,” el continua, “nos ta pote dise ‘Ahá!’ an si nos no ia ta fura Bebe Ru.”

“Pu,” Coneo dise amable, “tu no ave un serebro.”

“Me sabe lo,” Pu dise umil.

“Nos dise ‘Ahá!’ afin Canga sabe ce nos sabe do Bebe Ru es. ‘Ahá!’ sinifia ‘Nos va dise a tu do Bebe Ru es, si tu promete a nos ce tu va vade a via de la Foresta e reveni nunca.’ Aora, no parla cuando me pensa!”

Pu vade a un angulo e atenta dise ‘Ahá!’ en un vose de acel spesie. A alga veses el senti como esta parola sinifia vera lo cual Coneo ia dise, e a alga veses el no senti tal. “Me suposa ce lo depende mera de pratica,” el pensa. “Cisa ance Canga debe pratica per comprende lo.”

“On ave sola un plu cosa,” Porceta dise pico ajitada. “Me ia parla con Cristofer Robin, e el ia dise ce on considera jeneral un Canga como Un de la Animales Plu Ferose. Me no es asustada par la Animales Ferose en la modo comun, ma on sabe bon ce si Un de la Animales Plu Ferose es Privada de Sua Joven, el deveni tan ferose como Du de la Animales Plu Ferose. En acel caso ‘Ahá’ es cisa un cosa fol per dise.”

“Porceta,” Coneo dise, estraente un lapís, e lecante la fini de lo, “tu ave no osa.”

“Coraje es difisil,” Porceta dise, pico ensoflante, “cuando on es mera un Animal Multe Peti.”

Coneo, ci ia comensa scrive multe ocupada, leva sua regarda, e dise: “Car tu es un animal multe peti, tu va es Usosa en la aventura ante nos.”

Porceta es tan stimulada par la idea de es Usosa ce el oblida es ancora asustada, e cuando Coneo continua con dise ce Cangas es Ferose sola en la menses invernal, e ave un Disposa Amante a la otra tempos, Porceta pote apena senta calma, car el es tan zelosa per comensa pronto es usosa.

“Como con me?” Pu dise sombre. “Me suposa ce me no va es usosa?”

“No ansia, Pu,” Porceta dise comfortante. “Cisa a un otra ves.”

“Sin Pu,” Coneo dise formal, puntinte sua lapis, “la aventura ta es nonposible.”

“O!” Porceta dise, e atenta no pare deludeda.

Ma Pu vade a la angulo de la casa e dise orgulosa a se, “Nonposible sin Me! Un Urso de acel spesie.”

“Aora, ta ce tota de vos escuta,” Coneo dise pos fini scrive, e Pu e Porceta senta multe zelosa escutante con sua bocas abrida. Coneo leje esta a vose:

SCEMA PER CATURA BEBE RU

1. Comentas Jeneral: Canga core plu rapida ca cualcun de Nos, an Me.

2. Plu Comentas Jeneral: Canga move nunca sua regarda a via de Bebe Ru, estra cuando lo es secur botonida en sua pox.

3. Par Esta Razona: Si nos vole catura Bebe Ru, nos debe oteni un Vantaje, car Canga core plu rapida ca cualcun de Nos, an Me. (Regarda 1.)

4. Un Pensa: Si Ru ia ta salta a estra la pox de Canga e Porceta ia ta salta a en, Canga no ta oserva la difere, car Porceta es un Animal Multe Peti.

5. Como Ru.

6. Ma Canga ia ta debe regarda prima en un otra dirije, per no vide ce Porceta salta a en.

7. Regarda 2.

8. Un Otra Pensa: Ma si Pu ta parla multe stimulada con Canga, Canga ta pote regarda en un otra dirije per un momento.

9. E alora me ta pote core a via con Ru.

10. Rapida.

11. E Canga no ta descovre la difere asta plu tarda.

Bon, Coneo declara orgulosa esta, e a pos, tra un momento peti, nun dise cualce cosa. E alora Porceta, ci ia es abrinte e cluinte sua boca sin sona, susede dise multe roncin: “E – a pos?”

“Cual tu intende?”

“Cuando Canga Descovre la Difere?”

“Alora tota de nos dise ‘Ahá’!”

“Tota tre de nos?”

“Si.”

“O!”

“Ma, cual es la turba, Porceta?”

“No cosa,” Porceta dise, “tan longa como tota tre de nos dise lo. Tan longa como tota tre de nos dise lo,” Porceta dise, “me no es disturbada,” el dise, “ma me no ta vole dise solitar ‘Ahá!’. Lo no ta sona an cuasi tan bon. A lado,” el dise, “esce vos es intera serta de lo cual vos ia dise sur la menses invernal?”

“La menses invernal?”

“Si, sur es Ferose sola en la Menses Invernal.”

“O, si, si, acel es coreta. E, Pu? Tu sabe como tu debe fa?”

“No,” Urso Pu dise. “Ancora no,” el dise. “Como me va fa?”

“Bon, tu debe sola parla multe forte a Canga afin el no oserva cualce cosa.”

“O! Sur cual?”

“Cual tu vole.”

“Tu intende como nara a el alga peso de poesia o simil?”

“Si,” Coneo dise. “Briliante. Aora veni con me!”

Donce tota de los vade a estra per xerca Canga.

Canga e Ru pasa un posmedia cuieta en un parte arenin de la Foresta. Bebe Ru pratica saltas multe peti en la arena, e cade en bucos de mus e trepa a estra, e Canga move ajitada a sirca e dise “Sola un plu salta, mea cara, e a pos nos debe vade a casa.” E a acel momento, asendente la monteta e puminte sua pedes es no otra ca Pu.

“Bon posmedia, Canga.”

“Bon posmedia, Pu.”

“Regarda mea salta,” Ru pipi, e cade en un plu buco de mus.

“Aló, Ru, mea ami peti!”

“Nos ia es a punto de vade a casa,” Canga dise. “Bon posmedia, Coneo. Bon posmedia, Porceta.”

Coneo e Porceta, de ci ambos ia asende aora de la otra lado de la monteta, dise “Bon posmedia,” e “Aló, Ru,” e Ru demanda ce los regarda sua salta, donce los sta e regarda.

E ance Canga regarda …

“O, Canga,” Pu dise, pos cuando Coneo ia ginia duple a el, “me no sabe esce tu es interesada a cualce grado par Poesia?”

“Cuasi tota no,” Canga dise.

“O!” Pu dise.

“Ru cara, sola un plu salta, e a pos nos debe vade a casa.”

On ave un silentia corta en cuando Ru cade en un plu buco de mus.

“Continua!” Coneo dise en un xuxa forte pos sua pedeta.

“En parla sur Poesia,” Pu dise, “me ia composa un peso peti cuando me ia es veninte. Lo ia vade como esta. Em – aora lasa ce me pensa –”

“Imajina!” Canga dise. “Aora, Ru cara —”!

“Tu va gusta esta peso de poesia,” Coneo dise.

“Tu va ama lo,” Porceta dise.

“Tu debe escuta multe atendente,” Coneo dise.

“Afin tu no perde cualce parte de lo,” Porceta dise.

“Si, si,” Canga dise, ma el es ancora regardante Bebe Ru.

“Como lo ia vade, Pu?” Coneo dise.

Pu fa un tose peti e comensa.

LINIAS SCRIVEDA PAR UN URSO DE SEREBRO VERA POCA

A lundi la sol briliante,
caldi nos a pos, a ante.
Lo es multe confusante:
ante a pos, pos a ante?

Martedi stona con neva,
pilas de cristales leva.
Oji rosas nun eleva,
no Ivan, no ava Eva?

Mercurdi es un dia bela.
Gida un barco de vela!
Me anela un consela:
Percé jeladas dejela?

Jovedi no es tro fria
Me va usa esta dia
per visita mea tia,
un cusin, e sua fia.

Venerdi —

“Si, tal, no?” Canga dise, e no espeta per oia lo cual aveni a venerdi. “Sola un plu salta, Ru cara, e a pos nos debe vera es vadente.”

Coneo dona a Pu un puieta fretante.

“En parla sur Poesia,” Pu dise rapida, “esce tu ia persepi a cualce ves acel arbor, direta alá?”

“Do?” Canga dise. “Aora, Ru —”

“Direta alá,” Pu dise, indicante a pos la dorso de Canga.

“No,” Canga dise. “Aora, salta a en, Ru cara, e nos va vade a casa.”

“Tu ta debe regarda acel arbor direta alá,” Coneo dise. “Esce me va leva tu a en, Ru?” E el prende Ru en sua pedetas.

“De así me pote vide un avia en lo,” Pu dise. “O esce lo es un pex?”

“Tu ta debe vide acel avia de así,” Coneo dise. “Estra si lo es un pex.”

“Lo no es un pex, lo es un avia,” Porceta dise.

“Tal lo es,” Coneo dise.

“Esce lo es un storno o un merlo?” Pu dise.

“Acel es tota la demanda,” Coneo dise. “Un merlo o un storno?”

E alora, a fini, Canga turna sua testa per regarda. E a la momento cuando la testa de Canga es turnada, Coneo dise con un vose forte “Vade a en, Ru!” e Porceta salta a en la pox de Canga, e Coneo freta a via con Ru en sua pedetas, tan rapida como el pote.

“Ma, do es Coneo?” Canga dise turnante a retro. “Tota es bon, Ru cara?”

Porceta fa un ruido pipinte de Ru de la basa de la pox.

“Coneo ia debe parti,” Pu dise. “Me crede ce el ia pensa a alga cosa cual el ia debe visita subita.”

“E Porceta?”

“Me crede ce Porceta ia pensa a alga cosa a la mesma tempo. Subita.”

“Bon, nos debe vade a casa,” Canga dise. “Adio, Pu.” E con tre saltas grande el es a via.

Pu regarda pos el cuando el vade.

“Me desira ce me ta pote salta simil,” el pensa. “Alga pote e alga no pote. Tal lo es.”

Ma en alga momentos Porceta desira ce Canga no ta pote. Frecuente, cuando el ia ave un pasea longa a casa tra la Foresta, el ia desira ce el ta es un avia; ma aora el pensa arancada a se a la basa de la pox de Canga:

“Si ^vola es _como esta, _serta me ^va gusta _nunca lo.”

E cuando el vade a supra en la aira, el dise, “Uuu!” e cuando el vade a su el dise, “Au!” E el dise, “Uuu-au, Uuu-au, Uuu-au” tra tota la via a la casa de Canga.

Natural, direta cuando Canga desbotoni sua pox, el vide lo cual ia aveni. Sola a un momento el pensa ce el es asustada, e a pos el sabe ce el no es; car el senti serta ce Cristofer Robin ta lasa nunca ce cualce nosiva ta aveni a Ru. Donce el dise a se, “Si los broma con me, me va broma con los.”

“Bon alora, Ru cara,” el dise cuando el trae Porceta estra la pox. “Ora de leto.”

“Ahá!” Porceta dise, tan bon como el pote pos sua Viaja Terorinte. Ma lo no es un “Ahá!” multe bon, e Canga no pare comprende cual lo sinifia.

“Prima un bani,” Canga dise con un vose bonumorosa.

“Ahá,” Porceta dise denova, e regarda ajitada a sirca per vide la otras. Ma la otras no es alá. Coneo jua con Bebe Ru en sua propre casa, e senti plu ama per el pos cada minuto, e Pu, ci ia deside es un Canga, es ancora en la loca arenin sur la alta de la Foresta, e pratica saltas.

“Me es tota no serta,” Canga dise con un vose pensosa, “ce ave un bani fria a esta sera no ta es un bon idea. Esce tu ta gusta lo, Ru cara?”

Porceta, ci ia ama vera nunca banis, trema longa e iritada, e dise con un vose tan corajosa como posible:

“Canga, me vide ce aora es la tempo per parla franca.”

“Ru peti e comica,” Canga dise pos prepara la acua de bani.

“Me no es Ru,” Porceta dise forte. “Me es Porceta!”

“Si, cara, si,” Canga dise calminte. “E el imita ance la vose de Porceta! Un xico multe astuta,” el continua cuando el prende un brice grande de sapon jala de la armario. “Cual el va fa seguente?”

“Esce tu no pote vide?” Porceta cria. “Esce tu no ave oios? Regarda me!”

Me regarda continuante, Ru cara,” Canga dise alga sever. “E tu sabe lo cual me ia dise ier sur contorse la fas. Si tu continua contorse tua fas como lo de Porceta, tu va adulti con aspeta de Porceta – e pensa como triste tu va es alora. Bon, aora a la bani, e no lasa ce me debe parla denova a tu sur lo.”

Ante sabe do el es, Porceta es en la banio, e Canga frota forte el con un teleta spumosa de lava.

“Au!” Porceta cria. “Lasa me a via! Me es Porceta!”

“No abri tua boca, cara, o la sapon va entra,” Canga dise. “Alá! Cual me ia dise a tu?”

“Tu – tu – tu ia fa lo con intende,” Porceta balbuta, direta cuando el pote parla denova … e alora el ave acaso un plu pleni-boca de teleta spumante.

“Acel es coreta, cara, no dise cualce cosa,” Canga dise, e pos un plu minuto Porceta es estra la banio, e es frotada a seca con un tela.

“Aora,” Canga dise, “alá es tua medisin, e pos acel, la leto.”

“C-c-cual medisin?” Porceta dise.

“Per fa ce tu grandi e forti, cara. Tu no vole deveni peti e debil como Porceta, no? Bon, alora!”

A acel momento on oia un bateta a la porte.

“Entra!” Canga dise, e lo es Cristofer Robin ci entra.

“Cristofer Robin, Cristofer Robin!” Porceta cria. “Dise a Canga ci me es! El dise continuante ce me es Ru. Me no es Ru, si?”

Cristofer Robin regarda el multe atendente, e nega con sua testa.

“Tu no pote es Ru,” el dise, “car me veni de vide Ru ci ia jua en la casa de Coneo.”

“Bon!” Canga dise. “Imajina acel! Imajina ce me ia fa un tal era.”

“Aora tu vide!” Porceta dise. “Me ia dise a tu. Me es Porceta.”

Cristofer Robin nega denova con sua testa.

“Ma tu no es Porceta,” el dise. “Me conose bon Porceta, e el ave un color intera diferente.”

Porceta comensa dise ce esta es car el ia veni de bani, e alora el pensa ce cisa el no va dise acel, e cuando el abri sua boca per dise alga otra cosa, Canga lisca la culier de medisin a en, e a pos colpeta la dorso e dise ce la sabor es en fato intera amable cuando on ia abitua a lo.

“Me ia sabe ce el no es Porceta,” Canga dise. “Me demanda a me ci el pote es.”

“Cisa el es alga relatada de Pu,” Cristofer Robin dise. “Como si un sobrino o tio o algun?”

Canga acorda ce esta es probable tal, e dise ce los ta debe dona alga nom a el.

“Me va nomi el Putel,” Cristofer Robin dise. “Plu corta, Enri Putel.”

E direta pos esta deside, Enri Putel serpe a via de la brasos de Canga e salta a sur la tera. Per la joia grande de Porceta, Cristofer Robin ia lasa la porte abrida. Enri Putel Porceta ia core nunca tan rapida como el core aora, e el no para core asta cuando el es multe prosima a sua casa. Ma cuando el es a distantia de sento metres, el para core, e rola tra la fini de la via a casa, per oteni denova sua propre color, amable e comfortante…

Donce Canga e Ru resta en la Foresta. E a cada martedi Ru pasa la dia con Coneo, sua ami tan bon, e a cada martedi Canga pasa la dia con Pu, sua ami tan bon, e instrui Pu sur salta, e a cada martedi Porceta pasa la dia con Cristofer Robin, sua ami grandiosa. Donce tota de los es felís denova.