9. La esperia

Esata a acel instante, la busor sensa ce el emerji de un sonia. Con la oios duicluida, el ensofla — infla, defla: el esamina la sensas a interna de la sena de sua corpo; ma cual cosa trae el a acel sensa ante esta otra? La causa de la pasa de un sensa a la otra no es vidable: presa de la manos sur la volante, de la pede sur la pedal de aselera, regarda sur la bandas clar limitante la filos — paraleles prosiminte a lunlotra cuando los distanti de la oservor, ma desaparente sempre ante la punto ultima, la punto de fuji, su la curva esajerada de la globo de la Tera.

La rejion traversada — un deserto asta perde de vista — pare nonmovente, an con la rapidia: la asentia de secutes, de cualce vibra, de inclinas o de curvas ladal, aumenta esta ilude; sola un regarda eserseda permete reconose la move en la imaje nonfocada de la via e de la deserto, imaje de cual la gran orijinal no plu es persepida.

Isolida en la veculo lansada sur esta via, la sensa deveni esense: la ativia mental osila entre atende e imajina. Subita, el sabe ce el emerji de un sonia e sensa ce el es presente, ma cual cosa trae la consensia a esta nota?

Con la oios cluida, el ensofla — infla, defla: el pare videta ce la linias de fuji de la rejion converje a un punto localida ante el, como paraleles atraeda par cualce punto alef[¹] magnetin.

A prima, la situa pare blocida: no cosa vidable, no cosa oiable, no cosa sensable… ma, alora, on ta iniora la importa enorme cual la reatas fisical, emosial e mental ta prende en esta state autiste: los ocupa tota la campo, spesial considerante ce la demandas esensal — do? cuando? ci? como? perce? — resta sin responde!

Con la oios subita abrida, el considera la uniformia de la strutur desertin, la nonlocali esata de acel, ance la convesia asentuada de la solo, spesifas cual pare nonreal. E esta situa pare tan blocida ca la otra… Cisa, esta sena va es usada per la presenta de la titulos inisial, ma cual cosa, pos esta?

La situa de la esperia redeveni nondefinida — cava, loca de entera, sutera? —, ma lo posese la mesma cualias stable; an la parola cava evoca per la oservor un fato xef: el vide un gota de acua sudante longo un stalatita, tremante a la limita, final cadente a la sentro de un lago suteran — acel sena intera, multe densa, posese, con grado alta, un spesifa de presentia e eternia cual dona a lo un forte considerable — analiseda, imaje pos imaje, e reconstruida con move lentida.

La move sentrifugal de la ondas, continuante la cade de la gota, provoca tota un razona sur la persiste de la fenomenos: nondutable, no cosa desapare en la vacua de la pasada, ma cada cosa avenida continua vive, sperdente en tota la dirijes de la spasio, movente a la rapidia de la lus; el ci ta pote acompania lo con la mesma rapidia ta sta eterna en acel aveni.

La intui ce la tempo es un move de atrae cual tota la corpos partisipa, esta intui permete videta do, como e perce la person es refujada.

On vide clar ce la sujeto locali en un veculo lansada con rapidia grande e ce el sumerji en un razona sur la natur de la tempo. El susede mesma dedui, de la imaje mental de la gota cadente en un lago, un formula de varia

per cada veculo movente con la rapidia v, do c es la rapidia de la lus (cual el nomi « la rapidia de la tempo »), la dura t_v es la tempo de la elementos movente con la rapidia v, e t_o es la tempo de la elementos en pausa.

Aplicada, seguente, a la dimensiones de spasio, esta formula deveni:

cual confirma la esiste de un punto de fuji a cual la corpos movente con la rapidia de la tempo es reduida.

Con la oios subita abrida, el sabe ce el emerji de un sonia e sensa ce el es presente; el ensofla, el esamina la sensas en la sena de sua corpo — presa de la manos, de la pede, consentra de la regarda…

En cuando la rapidia crese, lojical la tempo lenti sua ritmo, e la dimensiones streti proportial. La curso, subita, pare obedi a un egali rigorosa — un linia de cual, par calcula, on ta pote previde asta la punto ultima: la instante cuando la esperior isolida en la veculo lansada sur la via ta debe ateni esta limita do la tempo para, cuando la paraleles fusa; alora el comprende la natur de la punto de la spasio-tempo en cual el ia refuja, en cual no lus, no sona penetra, en cual no varia termal es sensada.

Con la oios duicluida, el consensi prima de la ronrona de la motor, de la clica lejera de la latas, e de la sensas movente en sua corpo: presa de la manos sur la volante, de la pede sur la pedal de aselera, dole a la spina dorsal, causada par un mal posa.

Strana, el sensa ce un de sua pasajores, divinante sua state de dormeta, ia leva de sua seja per aprosimi a la cabina de la gidor e ce aora el resta fisada a retro de el, silentinte ante la Proibi sever de parla a la busor afisada sur la scermo de vitro.

Con la oios subita abrida, el considera la strada streta serpente cual asende la presipe. « La fini de la viaja prosimi », el pensa alora, cuando la veculo avansa laborosa sur esta lado de un monte, de cual on domina la caniones de un torente tumultosa, do la busor pare deteta la locas de orienta de sua curso.

A fronte, sur la lado presipe en fronte, el divina bunceres sperdeda en la rocas, vietas apena trasada, frecuente nonpersepable.

Un videta en la miror de retrovista mostra la pasajores dorminte a sua sejas e, entre los, la pasajor ci el veni de imajina a sua lado; an tal, la seja de la fondo, acel de la fem joven, es aora vacua. La mano de la busor atenta orienta la miror per oserva la interna de la veculo, la fem joven resta nonvidable.

Final, cuando el repone la miror de retrovista a sua loca, la imaje de la pasajor reveni en la moldur, como si la dormi de acel ta debe invade tota la campo de la consensia de la regardor.

Gradal, en la sonia de la pasajor dormetante, la luses de la salon de sinema ia desapare; la conversas ia estingui, la atende ia instala en cuando la oios es fisada a la scermo.

Ma la presenta ia tardi tan!

Esce lo ia es par causa de la silentia, de la oscuria o de la nonmoventia forsada? —, la pensa de un fali ia es plu probable, considerante ce no ruido veni de la macineria.

On ia leva, on ia visita en tota dirijes la construida spetaculin, longo la coredores cuantiosa de la niveles diversa. La parietes ia comensa mostra alga protendes rocosa, an fesures, abris tra cual on ia deteta, multe distante a su, la caniones de la torente tumultosa cual separa nos de la otra lado presipe, con plantas abundante, con sua bunceres sperdeda en la rocas, sua vietas serpente, cual on ia esamina con un regarda agu, como si on ta remente ce on ia asende ja un de los, cual ia fini subita, pos un curva de roca, ante la porte de un otel obsoleta, perdeda, con sua du niveles ruinada, perilosa dominante la presipe.

On ia recorda alora la tre femes vea nonsosial ci maneja lo; la solo cuadretosa jala e negra de la cosina, rascada par ojetos pesosa cual on ia tira; la lucarnas plen de gras, abrida partal. E la vista disturbante de esta fusil de mitralia poneda contra la mur ocer palida, imaje tan fisada e silente ce la pensa de un fali ia susede emerji la sonior de la dormi: no sona de motor, no secute.

La oios subita abrida abrasa tota la situa: la bus ia para, a la borda de la via, a la limita de un foresta vasta, verde pal, profonda — e la asembla de la pasajores, e la busor mesma, ia abandona la veculo. A estra, an tal, nun es vidable nun. On leva, on avansa nonfasil, asta la porte anterior, larga abrida a boscetas nonpenetrable. Nonpenetrable?

Ponente pede a tera, on senti como si on ta es en un loca familiar, do on pote orienta sin labora. Tra la boscetas ostaculinte, on ta pote an reconose la vieta maraniada cual desende a destra.

En cuando la ramos clui a retro, on entra en un spesie de coredor plantal lejera desendente su un volta de rametas e de folias miscada.

La parietes de la coredor, taliada en la boscetas, es multe densa, e la foresta traversada es nonmesurable profonda — o mal focada, o mal contrastada. La manos no pote fasil rejeta alga troncetas per permete regarda tra los: on divina sola, a alga metres a su, a fondo de la foso, la corente potiosa de un torente fluente entre la rocas, a la limita de la teritorio.

A acel instante, la busor sensa se como si el emerji de un sonia; ma un videta en la miror de retrovista mostra a el la realia de la spasio interna de sua veculo, aora completa vacua.

Tra la vitro, el considera con atende sua situa, comparante lo con la maranias de linias reta e curva sur la desinia labirintin en sua mano: arivada en vista de un vieta terosa, a destra, a dirije de un inclinada, punto de orienta esensal de sua curso, la gidor sabe aora ce la fini de sua viaja prosimi. El para sua veculo e abandona lo final a esta loca, el desende e comensa pasea sur la vieta, a lado de la presipe montanial.

A esta altia, la plantas es rara, permetente ce on vide la colores de la tera e de la rocas. La busor pasea sin freta, fasinada par la vieta serpente cual desenrola cuieta sua rampa ante el asta la caniones de la torente; el gusta la parfum estatal spesial de la aira ambiente, causada par la canicula, e sensa se permeada par un senti strana de ja videda.

« La ora de la confere prosimi », el pensa.

Multe suportores ia conflue ja en la atrio de la sinema cual la viajor veni de pasa, pos la botecas rica ornada per la festas, en cuando la garlandas de bulbos de lus multicolorosa comensa lumina, longo la curva asendente de la rua xef do la jela perili cada progresa e cual el segue asta sua alta, sin ce el trova cualce refuja: la oteles, rara, mostra un panel “No sala disponable”, invadeda par la multia de la viajores blocida. Cual refuja resta?

Redesendente la curva de la rua xef, la pasajor ateni un loca do la bus ia colide — per sempre, lo pare — un monton de neva. Plu a su, a un crus de vias, el oia la rola eterna de la acuas venida de la glasias; a destra, en efeto, el encontra un ponte de lenio traversante un torente, vista fasinante per un person inclinada sur la rel, nonmovente, como preante en la duilus.

La viajor pasa a retro de la person, traversa la ponte, cual el sircoveni sin freta per vade a la riva, paseante sur la petras e la rocas arenida. Tra cuando el salta sin sesa, de roca a roca, e asende la curso de la torente, lo es como si el ta reasende a la fontes de la spirito mesma.

Como preante, la contemplor regarda la viajor distantinte — e sua vose, estra campo, comenta la filma:

« La spirito conose la elementos de sua teritorio », el farfulia, « la colinas, la rocas, la lagos cual on domina, seguente la vietas montanial, la forestas, la rivas rocosa de la rios… La spirito conose asta la rejiones la plu isolida o distante. Car lo es relatada a cada cosa, cada cosa ave un sinifia per lo: cada punto cual lo encontra, la distantias cual lo traversa, la orientas serial de sua curso mesma ave un sinifia.

« La spirito segue la vietas montanial cual desende lenta a la caniones presipe de la torente. Lo traversa forestas nonestimable profonda. Lo reasende la curso de la rios, de roca a roca, asta la fonte de sua esente.

« La spirito conose la vieta de la fonte. Ala, reposante en sua state natural, en sua puria de orijina, alga cosa de lo permane, unida en la unia de la vive, nonferable, nonmovable, estra tempo. »

La vieta conclui ala, a la porte de la otel perdeda dominante la presipe. Apena a la inisia de la coredor de entra, lo pare ja nonposible de retrovade, tan atraeda par la prosimia de la gol.

Regardante tra la cuadro de la porte prima a sinistra, on reconose la cosina, con sua solo cuadretosa jala e negra, rascada par ojetos pesosa cual on ia tira; la lucarnas plen de gras, abrida partal; e la vista disturbante de esta fusil de mitralia poneda contra la mur ocer palida. La imaje es tan paralisente ce on vinse difisil un crese de angusa; an tal, a esta ves, la viajor penetra la cor de sua panica, traversa lo e segue sua curso.

El traversa intera la coredor, la plu silente, afin el evita es descovreda par la tre femes vea tan nonsosial ci maneja esta otel, e ateni la porte de la sorti, a fondo. El abri lo lenta, temente ce un grinse tradi el, justa a la momento ultima. El pasa la cornisa. Distanti. El segue sua curso.

A un fenetra de la nivel prima, un cortina move — lejera…

La vieta continua, pos la casa, e alti asta la colo de la monte. Ala, pos la curva ultima, pos la protende rocosa ultima, la lado ascondeda de la monte apare, a la completi de la viaja: la sirculo perfeta de la vale secreta, anelida.

De acel momento, un calmia grande envolve el ci desende la niveles de la monte interna. En acel state de consensia, on persepi se como un intermete de instantes gotante a interna de sua propre corpo.

Sur alga plataformas diferente, a su, otra solitares segue ance la vietas serpentin, con dulsia. Pronto, a supra, on divina ce novas apare ancora, a retro de se, e va sustitui per los ci presede, ante converje a la sentro de la vale, en la foresta orijinal do la cor de la templo nonferable de la natur eterna pulsa.

Ala, su la ramos de la arbores o su la dolmenes natural, on videta a alga ves un ami de un epoca distante, sentante sur un roca plana, envolveda en la παρουσία, la presentia silente e eterna a interna de el mesma, pos ce el ia abandona la letera mor de la testos sacra per la sofla vivente de la consensia pur: Franscu Fullonis apare tal, a lado de la fonte clar de un rieta, en media de la jeometria vejetal e mineral.

Cuando me encontra el, el pare brilia con un lumina eterna. E, a mea turno, me es luminada par la sertia ce nunca nos separa!

La recorda de un pasaje de la Compendio jeometrial de Alzon traversa mea mente e pasa: « On nesesa donce sola ce la prosede aselera: la prosede de dupli la lados nesesa aselera afin la construi de la cuadri es completida; la prosede de ajunta la cuatri de la cuantia presedente nesesa aselera afin la trisesioni es completida en un dura finita. »

Como la sonia ultima cual pasa ante ce lo desapare en la silentia, fratos de nosa conversas ardente reveni a me:

« Esce lo es posible redui nonfinita la dura de la atas?

— On debe penetra la strutur de la tempo. Pronto?

— Gida me. »