LA MOSTROR DE IMAJES
1. Perspetivas revolual2. La limita de la mundo3. La foco4. Lepsica5. La sinema permanente6. Aporias7. La vila de la costa8. A este9. La esperia0. La secreta de la orijina

3. La foco

Infiltrante me a veses en alga fesures de la coredores, a veses rampente en tubos streta, me ia ateni final un sala ronda, oscur, conjestada par grandadores, par fotos pendeda, aparatos nondefinable cual ronrona sin turba. Sirca los, a fronte de lucarnas en la mures, la oto projetadores pesosa ia es tirada, rascante ja la solo jala e negra cuadretosa como alga table de xace.

Tra un de acel lucarnas, on persepi a su la amfiteatro – vasta, composada de un piramide sentral do la regardores senta a niveles diversa, en fronte de la scermos cual borda la salon en la oto dirijes. Dotti Maushart sta ja, ante un de la scermos, e ia comensa rebela la folas plebe cual no sesa enflue ala, intersepinte la angulos de lus colorida de la lampas majial en funsiona.

« Cualce democratia es democrata sola per el ci deteni la potia! La democratia de Atina ia es un tirania per la multias de sclavos! La democratia burjes, diseda libraliste, es tirania per la popla! La democratia poplal es un tirania per la opresores pasada. La stato es un potia spesial de represa, Engels ia scrive an. Tal es la esense jeneral de cualce stato! » el comenta, tra cuando, a retro de el, filmas cual debe imaji sua parlas es projetada: on reporta ala un intervisa con un politiciste, do on anunsia la gera per multe temprana.

A lado, an tal, vide asi un filma documentinte, curiosa titulida La Elas, esta es de la Elas: imajes nonsuportable de un campo de batalia do un ferida surie cuando la eroe fema de la filma prosimi; prima, ela aida el afin el releva; a pos ela estrae de sua gaina… un daga, e talia la garga de la combator asta ce sua testa cade e rola a tera.

Me no plu trova mea respira, la solo rompe sur mea jenos, un mur colasa sur mea peto e la vose de Dotti Maushart resona sin turba:

« La luta de la popla es nonvinsable. Acel tese de Mao Ze Dong es demostrada par la istoria presente e pasada. La istoria de un popla es la esperia e la memoria de acel popla. Lo es nonposible, per la burjeses, amnesici completa la popla, donce los atenta forte priva la popla de sua propre esperia : la Instrui Statal, do la furores e falsores de la istoria manipula e maneja esta altera de la pasada! »

On ia ave otra voses, condutada par la mur vibrante sur mea peto – voses asustante cual me ia es reconosente. Me ia nesesa releva, descovre sua orijina.



Me recorda la curso segueda e la ramos multiple en la coredores de la niveles diversa do me avansa como estra la tempo: la coredores tropeza ante me, la scaleras cual desende a la atrio es debil luminada, la bileteria: abandonada. Lo pare ce la servores de securia mesma ia fuji de la construida, ma par cual causas?

La inclinas curvi, lisca en lunlotra, fusa, crea spesies de plazas pico.

Tra la porte duple, con fenetretas ronda, puxada brusca, un de la brutas ci ia atenta masacra nos en la plaza, en la tempo de la afisa, espulsa se de la amfiteatro. Me atenta segue el, con mea cor noncoerente xocante mea peto, en cuando el junta se a sua complises munida con estinguadores sabotada, cual jeta flamas asustante. De esta loca la voses veni!



Mea core nonfrenida per averti de la sabota ia inisia la panica jeneral, cresente con la crese de la foco mesma cual la aparatos de securia aumenta!

Lo pare ce on ia alti multe per evade la flamas, traeda par la furia de la flue umana asta la nivel ultima de la construida infestada par fumas iritante e negra.

Tra la puxas furiosa cual ia segue, me ia crede oia:

« A asi! Veni asi! »

Un mano ia invita me, e un de mea amis plu cara, Franscu Fullonis, ia apare a me, a alga veses, a media de la fuma.

Portes ia es forsada. Sofocante, saisida par moves de fola noncontrolada, me ia videta acaso un sala de clase, con fenetrones larga, e, a retro, a via, la curva grande de la mar con ondas sintilinte en la note.

Pronto ce la fenetras es desblocida, multes fuji par la cornisas streta, desidente asede a la terazas de la nivel prima, de do los espera ateni la patio. Me ia vide, tra corta, la fas asustada de un fem joven paraliseda par la teme, a un metre de la fenetra.

« A asi, veni! »

La mano invita me denova, ma, a esta ves, ajitante un manoscrito per me.

« Prende! Freta! »

Un mapa strana, desiniada sur la covre de carton, lisca asta mea ditos: gidada par la desinia complicada de linias intermiscada, curva e reta, me senti ce me desende la rampa rigorosa retilinial de un coredor, e ce mea core no sesa aselera. Apena si me nota — pos cuanto tempo? — ce la mures de beton ia muta a parietes rocosa e ru cual verje plu e plu a sinistra; la protendes de roca pasa con un rapidia nonestimable, mea pedes no toca plu la solo. E mea inertia pare nonvinsable: me lisca, en la oscuria de la cava, asta un fini grande abrida — punto pal cual crese rapida, tro rapida!



Como me ia pote para, a un paso de la abiso? La mar frati, a su de me, sur la rocas laserada de un baieta isolida, cuasi nonreal. Mea presentia asi pare vera tro nonprobable, como esta enscrive en elinica antica, gravada a supra de la sorti de la cava:

Μήδεις ἀγεωμέτρητος εἰσίτω μου την στέγην,
la avisa mesma de la academia platoniste: « Ta ce nun, si el no es jeometriste, entra su mea teto »!

La parietes de la cava revela, en pasa, depintas mural cuantiosa, algas cuasi canselada par la tempo erodente, intermiscante desinias jeometrial e segues noncoerente de vocales elinica.

La nixes escavada en la roca, la du petras plata, a la entra, en loca de seja e table, la grados diversa de erode de la petrogrames, tota indica ce persones ia vive ala en turnos, de longa.

Fasinada par la intalios astrata, me vade de la un a la otra, como si me ta reveni a la fontes de la spirito, asta esta scema do lo pare ce me reconose la desinia ostentada sur la covre de la manoscrito cual on ia confida a me, en la focon: me contempla lo con atende, atentante desifri sua secreta, ante ce la oscuria disolve tota.

Pronto, per gida me, me va ave sola la bate de la ondas.

La recorda de la avenis asustante cual me ia vive reveni, per intervales, como la move de la ondas, a su, multe distante a su. La regarda asustada de la fem joven en la sala de clase, ante la fenetra abrida, en cuando la foco asende la niveles — acel regarda osese me; e la imaje reflue sin sesa, a cada enspira. Sola la espira, vacua de alga pensa, pasi me pico, en tal modo ce on senti ce lo crese plu e plu, a pos lo reteni se, instintosa, sofletante, ante la oriblia cual la enspira va trae denova.

Stante en la oscuria, me comensa sofoca, aspirante la aira sola a la minuto ultima, e ondas intensa de caldia invade me, en cuando mea corpo comensa un move de balansa cresente — cual nonevitable va suverti me si la asentua no sesa!

A pos, vide asi: tota mea corpo esplode en la flamas, la solo rompe sur mea jenos, un mur colasa sur mea peto. Ante mea oios sieca, un table de xace jala e negra enorme apare, prima retilinial, a pos desforminte en sua sentro, como un rede de arania en cual me cade, me cade sin fini.



Mea ditos despeli, seguente la curvas ru de la rascas causada par la tira de ojetos pesosa, sur la sursolo cuadretosa de la sala de projeta. Un mitraliador, a lado de me, contra un mur. La vose de Dotti Maushart. La focon ancora no ia comensa!

« An tal », la parlor segue, « si la causas resta ipotesal, la fatos es surprendente evidente: un stato peti, con sola sua propre fortes, vinse inondante a du veses un potia grande. Esce lo ia es par causa de la cuantia de combatores? No. La armada persian, an con un armada multe plu cuantiosa, ia es vinseda a Maraton tal como a Salamina. On esplica la rapidia de la vinse de Atina par la preesiste de un desecuilibra cualial en la consiensa political, la tatica e la stratejia de un gera poplal. Tota ia es ja ala afin la elinicas crase su pede la invadores. La popla de un pais peti, Mao Ze Dong ia dise, va vinse serta contra la ataca de un pais grande si lo osa leva se per la luta, prende la armas e maneja la destina de sua pais. »

Bambolante, me releva e atenta averti la partisipores de la reuni, ma mea vose, tro debil, vapori tra la lucarna. Nun, a su, en la amfiteatro, pote oia me. Esce me ave tempo ancora per preveni la focon?

Me saisi la mitraliador, me estrae me de la sala de projeta, me desende la scaleras curvida, debil luminada, cual vade a la atrio. Maraniada a retro de la bileteria, la corpos de la servores de securia reposa sur lunlotra, asasinada par la militia. Me ariva tro tarda!



Un om es ala, nonmovente, como en prea en la duilus, con la regarda levada a la posteres poneda multe alta sur la mures — un entre los, supra tota, cual representa un desinia nonposible. E la aira tepida cual veni de la rua trae la parfum spesial de un planta; ma cual planta? Me debe parla, averti el. Ma sola parolas asurda veni sur mea labios, permeada con un sabor strana de ja diseda:

« Un jua merveliosa de perspetiva, vera? »

La om, an sin ce el turna a me, responde multe debil, como si el ta sanglota:

« Como lo es posible? Como esta es posible? »

Parolas, frases completa reveni. Un de nos du parla, me no susede sabe ci:

« A ultra de la alegoria, on ave sola un desinia nonposible: reasende par la spirito asta la fonte de la spirito, a la loca do la imajes mental formi, ante ce los es projetada a la scermo de la consensa. »

Tra cuando la alarma sona, on sutrae se de la imaje, on vade bambolante a la scalera elica grande cual on comensa asende, apoiante sur la rel. E, vide asi: la flamas prima apare, venida de la niveles inferior.

« Me ia tardi tro », on dise, con la fas inondada par la larmas, en cuando la fola de la regardores versa en la coredores de la niveles diversa, puxante tota, en un desordina e un furia jeneral cresente con la crese de la foco mesma.



Lo pare ce on ia alti multe per evade la flamas, traeda par la furia de la flue umana asta la nivel ultima de la construida infestada par fumas iritante e negra. Portes es forsada. Sofocante, saisida par moves de fola noncontrolada, on videta la sala de clase con fenetrones larga, la curva grande de la mar e la ondas sintilinte a via. La fem joven, fisada a lado de la fenetra.

Estrae se de la fola cual dirije a otra partes, talia sua via a la sorti posible: pronto ce la fenetras es desblocida, on prende la mano de ela, on tira esta esente terorida asta la cornisa streta, de altia vertijosa, e on gida ela, paso pos paso, a la terazas de la niveles inferiores.

On sabe aora ce on nesesa reacompania ela a sua casa. Ela mesma ia fa acel demanda, pos ce el ia es sutraeda de la foco cual devora la construida, cuando on ia senta sur la mureta cual borda la patio. Do on nesesa vade?

Sua dito leva se en dirije a la costa, traversa la estende de la mar e fisa se a un isola cual on vide, brilietante en la note:

« Ala me abita. »

4. Lepsica

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 20 junio 2024 (16:09 UTC).