6. Aporias

Alga flocos lejera de neva xoca la paraventa de la bus. Un nebla grisin pesa aora sur la strada streta serpente cual asende la presipe; la regarda de la veculor tufa en lo, con intensia, como per deteta la locas de orienta de sua viaja.

Resente, un turba strana ia nase — la sensa ce un de la pasajores ia leva, abandonante sua seja per prosimi a la cabina de la gidor, e ce, aora, el resta fisada ante la Proibi sever de parla a la busor afisada sur la scermo de vitro.

An tal, un videta en la miror de retrovista ta mostra acel pasajor sentante a sua seja, fisada par un monton de bagajes, como cadun de la viajores. On ta nota an tal ce un seja, a lado de la fem joven, a la fondo, es vacua — acel de la xica?

La mano ta atenta orienta la miror per oserva la interna de la veculo conjestada par la faxos mal liada, pacetas sin forma cual on ia fa en freta e pila miscada, ma la xica ta resta nonvidable.

Final, cuando on ta repone la miror de retrovista a sua loca, la imaje de la pasajor, de ci la oios vaga sur la vista, ta reveni en la moldur. Ma como on ta pote vide lo? La regarda es tro ocupada en penetra la nebla cual asconde la curvas de la strada.

Con un agia spesial, on persepi aora la ronrona de la motor, la clica lejera de la latas e cada sensa traversante la corpo — tensas en la fronte, sur la tempes, presa de la manos sur la volante, de la pede sur la pedal de aselera, flue e reflue de la respira sur la lingua, sur la labios, dole a la spina dorsal, causada par un mal posa.

Gradal, un consensa nonabitual ia es induida, fluente — magnetal, on ta dise —, cual versa en la membros e anima los con un vive diferente; an on sensa ce la composa de la corpo ia cambia e ce la esente nonpersonali.

Envolveda en un presente asoluta do cualce cronolojia es asente, on sensa se como librida de la gravita umana, librida de la senotafio de la “ego”.

« Esce tu va sabe retrova tua via en acel nebla? », la vose dise final, a retro de me, aora iniorante la proibi.

Ma me no responde, me no oia, me es tro focada: la curso, subita, ta pare obedi a un egali rigorosa — curva de cual on ta pote calcula e previde cada punto asta la ultima: la gol de esta viaja.

Tra ce la despotias erije, ce la oposores fuji la represa, e ce la stranjeres es espulsada, me vade de loca a loca, entre la migrantes, a cada loca do fratos de la instrui pote es sperdeda. Me colie los, esamina los, me studia con zelo tota la crusas de similia. Me desifri los con la serti ce los es copias de manoscritos antica, joalas de la arte reial.

La sabe es transmeteda ancora, e la asembla pur permane ancora a la mesma loca en la mundo, me ave la atesta de esta: mascida su un identia falsa, me ia pote traversa fronteras, trova alga inisiadas ancora vivente ci deteni un parte de la secreta, e oteni de los alga indicas ultra valua.

E vide me asi, en la rol de un veculor de escluidas, gidante un bus ruinada a dirije de este — a un tera nonconoseda ascondeda cisa ultra esta montes presipe, erodeda a basa, en la caniones de un torente tumultosa. A supra, sur la lado presipe, on divina alga bunceres sperdeda en la rocas, alga vietas apena trasada, frecuente nonpersepable.

E asi, esta strada jelada do la veculo risca a cada instante lisca e cade a la abiso. Esta neva cual no sesa cumula, esta nebla cual veli tota. E esta sensa strana ce, a retro de me, a destra, algun sta, vestida con vestes erodeda. Un fas ancora neblosa. E la resona de mea pasos sur un rua paveda umida.

La resona de mea pasos, en un rueta oscur de un vila nondefinida, an tal familiar a me: me sabe ja ce, pos un curva de la rueta, a fondo de un plaza vasta poligon, con sesdes-cuatro lados bordada par casas de lenio, un lanterna pende, luminante un bricabrac de litografis antica.

« Esce tu va sabe retrova tua via en acel nebla? » la vose repete, a retro de me, a destra.

Me turna e avansa, sur la pave umida, como en un sonia, a la apareda. Stante en la trapos de sua capa, el es ensircada par posteres vea, palida par la tempo.

En la misca de imajes diversa, de cual cada mostra un construi jeometrial nonposible en la spasio euclidal, on nota pronto un entre los, fada sur un paper rompable e jalida, parente stonante antica.

« Esta es multe antica e vera frajil. Cauti, lo es un peso unica. »

La tinje de la vose es multe spesial. Do me ia oia lo?

« Un jua merveliosa de perspetiva, vera? La move jirante de la darvixes ia inspira direta sua desinia. A vide prima, lo ta pare ce la mundo es anelida, ce nos es prisonida en un spasio cluinte. An tal la libria es a interna de la move: cuando la vertije nase, do es la supra, do es la su? Esce la esterna es otra cosa ca la interna?

— Ma acel poster no pote es tan vea, no? O alora, lo no es la sola peso. Me ia vide lo, a alga anios a ante, en la atrio de un sinema, en un vila de la costa…

— La desinia ave sola du dimensiones, como cualce representa plana de la spasio, ma tua curso ia inclui du plu. Lo ta es interesante aora ce on imajina lo cual esta curso ta deveni si un dimension ta desapare…

— Tu remente me esata de la parolas cual Franscu Fullonis ia dise a me sur la sinta de Moebius, esta surfas de cual un fas manca — un manca cual permete, par acel, la curso de tota la sinta.

« A alga anios a ante, me dise, en acel vila de la costa — me ia es alora studiante —, acel ami ia scrive un obra de rexerca sur la tema de la paradoxes de la spasiotempo en la puntos matematical xef de la eda antica: la aporias de Zenon de Elea, la atentas de solve jeometrial de la trisesioni de la angulos e de la cuadri de la sirculo…

« El ia mori en la focon grande cual ia destrui la universia. Cuando me recorda acel note, lo es como si me ta sensa ancora la furia jeneral, cresente con la foco. Nos ia sta, malfortunosa, a la nivel ultima de la construida xef. El ia persepi me, subita, en media de la vortis umana. El ia ajita la mano — acel mano cual teni alta sua obra valuosa… El ia divina ce la move de la fola vade a salva me, ma vade a puxa el a la focon… »

Mea garga ia tensa, strangulante la parolas ultima, en cuando la fas de la mostror de imajes pare muta, manxa, per instantes, en tota la tempo cuando me fisa mea oios a el. Me ia es saisida con panica cuando me vide la flamas mesma de la focon torxinte sua oios, cuando me oia sua vose resonante:

« Tu ia pote prende acel manoscrito nonestimable, tu ia pote salva lo, vera? Cual cosa tu ia fa con lo? »

A esta momento, me ia sensa ce la sofla calda de un note de estate pasa sur mea fas. De la basa de la falesa rocosa, la ruji de la ondas ia asende. Distante, la venta de la mar alta ia furia. Asi, la strada de la costa, tan streta, ia desapare, tota covreda par cades de petras. E me, me ia atenta fuji.

Me ia trepa febrosa la rocas liscosa salpicada par la mar, protejente la plu bon cual me pote un arcivo ja manxada par la sal, contra la ataca de la ondas jigante cual flajeli la pariete. An tal, me ia atenta evade alga cosa plu temable ca la esplodes de la ondas, e la refuja cual me xerca ia debe es plu nonrevocable ca un roca cava. E la discutes longa con Franscu no ia sesa reflue, fratal, en mea memoria.

« La xerca de la fusa direta de la cuadro a en la sirculo ia es considerada donce como la cosa la plu diniosa, como la gol ultima. La cuadro es la imaje limitada de nosa mente; la sirculo ia pare es la plu simple de la desinias… En fato, lo es un realia cual on no pote saisi. Lo es la conclui ultima. On no pote vade a ultra.

« Par un construi jeometrial, on pote sempre transformi la mesma surfas de cuadro a otagon; seguente, duplinte sempre la cuantia de la lados, on ta desinia lo poligon, en tal modo ce la forma ta sembla plu e plu la sirculo. On ta prosimi a la gol, sempre nonpotente ateni lo.

« A contra, on no va pote aumenta o diminui la cuantia de lados de un sirculo. La sirculo es stable: pos ce on ia entra en la sirculo, on no pote vade a retro de lo o a ultra de lo.

« On ave un via de la cuadro a la sirculo, ma lo es sin fini. On no ave cualce via de la sirculo a la cuadro. Lo es la gol ultima, la limita de la mundo. Vera, on no pote vade a ultra. »

E me, me ia atenta fuji! Alora, me ia trepa febrosa la falesa bateda par la mar, en cuando la recorda de la avenis asustante cual me ia vive reveni, per intervales, como la move de la ondas. Lo ia pare en pasa ce on debe asende sempre plu alta per fuji la violentia de la ondas : a supra, si on trepa la presipe, on ta pote ateni la entra de la cava.

La remente de mea corpo forte teninte la pariete, de protende a protende, a cada ves cuando la ondones colpa lo, asta ce, a un ves ultima, la mano reteni la manoscrito de la ami. A esta momento mesma, la otra mano perde la protende, e tota es scopida en un esplode asustante. Cuando la vertije nase, do es la supra, do es la su?

En cuando me sumerji en la note, la responde de la mostror de imajes fisa me en la instante. Sua lanterna majial lumina ja. Vistas supranatural projeta sur la vapores flotante en la tunel ante me: la rua conclui ala, a un grado cual desende e profondi en un acua oscur; supra lo un aira fresca pasa cargada con odores de plantas putrinte. Lisa es la surfas de la acua.

A la otra lado de la estende acual, sur un petra plata protendente, la servor sacra[¹] garda la entra de la cava, sua templo, en cuando la toca lejera sur sua arpa composa la juas armonial de un fonte visina cual jeta un spuma marmin a la surfas oscur de la stange, su la inclina de ramos umida. E mea balsa lisca, sin secute, en dirije a esta molo strana.

Lo lisca a estra de la tempo, prosiminte sempre a la molo final ma sempre spasida de lo, gradal prendeda par la vortis lenta envolvente en la momento presente do la tempo apare plu prosima, plu vasta.

Pos ce on ia pasa la dui de la traversa, la dui de la interval restante pare tan longa ca la curso presedente.

Como un cosa, prima distante videda — tan pico ce on no ta persepi lo fasil — grandi gradal, cuando nos prosimi a lo, e final asorbe nos en lo, la campo de la tempo esvasa par causa de un perspetiva movente, en tal modo ce on pote previde ce esta viaja no va conclui, sempre traeda a un fini cual lo no va pote ateni.

Probable, si aora la estima de la dura de la fenomenos no plu ave refere stable, si la norma de la tempo pare lenti gradal, la causa es sin duta alga aselera en la projeta de la flaxes de consensia, lo no es causada par un modifia en la continua asoluta de la tempo mesma. Ma perce la brilia de la lus, entre la folias e la ramos, comensa pali periodal, pico e pico debilinte e fortinte?

Un vibra lenta de flaxes de lus interompeda par un silentia oscur. Seguente, plu lenta la momentos de secia, plu rara la instantes cuando me retrova la capasia de vide: alora la grandia de la servor apare plu forte, la molo plu nonasedable.

La mano de la pretesa, periodal luminada, es aora tan larga a lado de mea mano cual me estende: la mea ta es contenida sin duta tota en lo, ma si la minuto, la secondo cual separa nos es eterna dividable, nosa manos nunca va junta!

Denova, la fondo negra invade la scermo, canselante tota la sensas, tra tan longa aora ce lo aveni ce on perde la memoria de la instante presedente e ce la flax seguente es como nova, nonespetada.

Un otra dia nase, segueda pos corta par un note profonda, nonfininte; a pos un nase subita repone me a la mundo: un mano ia saisi mea mano e trae me asta la tera nova.