2. La limita de la mundo

En la amfiteatro grande do la regardores senta scalerin sirca la piramide sentral, on persepi alga sinias gradal de nonpasientia tra cuando la silentia, la oscuria e la nonmove forsada agi la escuta, la regarda e la mente : frota de la vestes, craci de la sejas. On divina alga moves nervosa per atenta fora la opacia de la spasio e locali la situa de la lampa majial : la projetor, a retro, pare asente.

Cuando la luses ia desapare, la scermo ia ta debe lumina pos corta per la filmeta costumal ; la conversas ia ta estingui, la atende ia ta instala se, la oios ia ta es fisada a la scermo.

A fini de alga instantes de oscuria, la idea permea la mente : « Cual cosa on espeta? Perce la presenta no comensa? » La regarda vade plu distante ca la scermo, la espeta prende la loca de la atende, alga toses responde a lunlotra. A pos, la silentia, denova; on vijila per la entra de la mostraseja ci ta cuieti nos: « Espeta ancora per alga secondos; no cosa grave, no teme » — ma no cosa move. La retarda, nonesplicada, crese ; la pensa de la fali es plu probable car no ruido veni de la macineria.

On leva, desidente colie informas sur la situa de cual la empleadas cisa no es instruida; longo la linias de la regardores sentante, on avansa, nonfasil, asta la fem joven e sua xica, en fini de linia, a lado de la sorti de securia, seguente on puxa la porte duple con fenetretas ronda.

En la coredores de la niveles diversa, on avansa como estra la tempo. La rampas curvi, lisca en lunlotra, fusa, crea spesies de plazas pico; la scaleras cual desende a la atrio es debil luminada; la bileteria: abandonada. Lo pare ce la empleadas ia fuji la construida, ma par cual causas?

Cuando on vade de un sala a un otra, la locas mesma pare deteni alga secreta, en tal modo ce on senti como traversante un site proibida, ascondeda su tera, do la orienta — an sujetal — no es sensada.

Su la mures blanca de acel talperia, on ta imajina fasil parietes granitosa; on ta trova pos corta, en fesures, alga abris tra la lado de la monte, tra cual on ta deteta, multe distante a su, la caniones de la torente tumultosa cual separa nos de la otra lado vertijosa, con plantas abundante, sua bunceres sperdeda en la rocas, sua vietas serpente, cual on esamina con un regarda agu, como si on ta remente ce on ia asende ja un de los, cual ia fini subita, pos un curva de roca, ante la porte de un otel obsoleta, perdeda, con sua du niveles ruinada perilosa dominante la presipe.

On ta recorda alora la tre femes vea nonsosial ci maneja lo; la solo cuadretosa jala e negra de la cosina, rascada par ojetos pesosa cual on ia tira; la lucarnas plen de gras, abrida partal; e la vista disturbante de esta fusil de mitralia poneda contra la mur ocer palida, imaje ultima do la filmeta fisa se aora per desenrola sua titulos codal.

Como reveni? Lo no pare posible retrosede, tan atraeda par la scalas metal cuantiosa gidante en dutos tubal a veses tan streta ce on es forsada a rampe per avansa, convinseda ce on va ariva pos corta a esta sala sirculo cual la prima venida ta identifia prima como un laboreria fotografial, con sua grandadores e sua fotos pendente, si el no ta descovre esta macinas pesosa poneda a la cuatro dirijes ante lucarnas streta.

Tra un de acel lucarnas, el persepi a su la amfiteatro do el ia veni, sumerjida par la oscuria, e la regardores ci espeta la presenta. Algas turna nervosa e leva la testa a el : « Alora! maneja, funsiona la macinas ! »

Con la leveres apena manobrada, la motores anima, la ronrona pleni la salon de sinema silente, sulinida par la clica linietosa de la bobines en jira, tra cuando angulos de lus opalin projeta, sur la scermos en fronte, plural filmas diferente cual on pote regarda simultan, an si on presensa ce on vade a misca tota multe pronto.

Sentante a la fini de la linia de sejas, a lado de la sorti de securia, la fem joven turna se a sua xica: « Cuieti, lo comensa! »

A alga metres de los, en efeto, un bulbo de lus brilia nuda, pendeda ante la stala de un vendor vagante de litografis do la atende fisa se per un momento ante move pico a destra: la fem joven, teninte par la mano sua xiceta, entra alora en vista, venida de la fondo de un plaza otagon, a la cade de la note, e prosimi lenta, en dirije de la stasion de bus. Sur sua fas turbada, on leje un despera apena contenida.

Los distanti de la stala, cual la xica no ia sesa regarda, plu forte presante la mano de sua madre: acel para, inclina a ela. On divina lo cual el no osa dise (« Tu sabe, on no ave plu mone »). El anui an tal.

Retrosede a la table de la imajor, do la xica mostra con sua dito sua vole, en cuando la fem joven xerca en sua bolsa la monetas ultima. Cuando los parti denova e traversa la campo de vide de la oservor: « Nunca me va oblida esta momento », el pensa, avansante a la des grados de la scalera cual desende a la plaza de la vileta.

A la fini de la plaza, el va apoia sin duta sur la mureta basa e va considera la vale cava cual vasti a ueste, a la teras domada, ma clui completa a este, colpante la lado presipe do la vileta onci; el va segue par oios la strada streta serpente cual asende la presipe e de do la ronrona familiar, sulinida par un clica lejera, asende, e a pos la ruas paveda de cual la rampas caososa lisca e fusa en lunlotra, la casones antica e vagante, construida a niveles diversa, con sua jardinetas savaje oscur, luminada a veses par la angulos de lus de la bus de note, a cada curva plu prosiminte la stasion final de cual la nom secreta, ascondeda en la placa oval de la destina supra la loca de la gidor, resta nonvidable per la oservor, aora real ponente sua codos sur la mureta de petra, pico gastada a alga locas.

« Esta es la limita de la mundo », el pensa, gustante la dulsia parfumida de la aira; « vera lo es la limita de la mundo. »