LA MOSTROR DE IMAJES
1. Perspetivas revolual2. La limita de la mundo3. La foco4. Lepsica5. La sinema permanente6. Aporias7. La vila de la costa8. A este9. La esperia0. La secreta de la orijina

5. La sinema permanente

Cuando on entra en la salon vasta oscur, lo es como si on ta reveni a se. La ronrona familiar de la macinas e la clica lejera de la bobines en jira pare es como sonas venida de la interna de la corpo.

La atende, a prima integrada a la vibra de la sonas, persepi final ce neblas de lus vibra con la mesma frecuentia; sur los, multe colores pasa continuante, fusa nonsesante en sua tinjes completinte, desforminte sua contornos nonstable.

Gradal, la lus multicolorosa, refletada par la scermo, distanti de la regardor, tra cuando la netia de la imaje crese: lo es un bulbo de lus nuda cual balansi ante la stala de un vendor vagante de litografis, a la cade de la note.

A destra, venida de la fondo de la plaza, un fem joven e sua fia prosimi. Lenta. Los traversa la plaza, pasa ante la stala, a pos los desapare a sinistra de la scermo. Lenta. La camera no segue los.

A loca prima, aora, on divina la oservor. El sta nonmovente sur la troteria de un rua alta, ante la des grados cual desende a la plaza de la vileta, e sua regarda xuta ladal la des-ses lados de la plaza, asta la fondo, a destra; ala, la note oscur preveni distingui cualce cosa ultra la mureta de serca. Seguente, la xuta reveni a la sentro.



Un construida nonmoderna, con du niveles, a un canto de la plaza: la nivel de tera es intera ocupada par la repareria de un garaje. La atende es atraeda ala. Un fenetra es luminada, a la nivel prima: la fem joven veni de entra en la sala.

En esta tempo, la oservor desende la grados de la scalera. En la aparte, la fem joven clama sua fia. Acel no responde.

La oservor traversa aora la plaza, asta un de la des-ses angulos, el pausa tra un instante ante la entra de la garaje, a pos el sonia ce el embarca en la sala de entra.



El sonia ce el entra en la repareria labirintin, verde oscur a basa de la mures, verde pal a alta.

Pos un misca desordinada de caxas de posta, un coredor fini a un patio interna luminosa. A esta momento, esata, on ta senti se banida en un claria dulse, calda; on ta senti se prosima a la gol, « tan prosima ce on no ta vole move plu », la oservor pensa, ancora fisada ante la entra de la garaje, en la oscuria sempre plu densa de la note, sin deside traversa la portes de ivor o de corno[¹].

A fondo, on ta afonda en un pantan de caxas de posta, xercante un nom. Plu distante, en un saleta do on pone la bisicles e la caretas de bebe, on ta descovre la desinias fada par un xica, paperes fisada sur la mures, a altia de enfante.

La xuta seguente ta mostra real, en pasa, la fem joven: a fronte, sentante a la table de sua cosina, el ta pare parla con joia a sua fia estra vista, ci on ta divina sentante a la lado oposante de la table.

Tra cuando la fem ta rie, la camera ta move ladal — lenta, lenta! — e ta fisa se sur la conversor silente de la fem joven: un pupa peti apoiada a un seja asustante vacua. Un cria de dole interna ta lasera la asembla de la regardores.



Un cria de teme lasera la salon de sinema. En la oscuria, on videta ce un fem joven panicada abandona sua seja e core a la porte de sorti. Subita, un otra regardor, a fondo de la salon, leva direta e comensa segue ela en la note, a distantia de la crias de la publica.



Tota es tro rapida, alora tota es tro puxada, tro saltetante; apena si on pote nota, en la labirinto de la ruas fujinte, la cambiones cual afeta la distritos poplal la plu povre de la vila, do on vide un misca de botecas de la comersiores iudi, de comederias levantan, de taliores o de vendores de litografis mostrante con lado a lado la carateres cuantiosa de la divines indu, elinica e ejiptian miscada.

Lo pare en efeto ce la abitantes de la distrito es afetada par un panica noncontrolada: en la ruetas mal luminada, do la brilietas distante de un focon refleta, lo pare tan difisil de pasea tra la fola: a cada parte, la persones move ajitada e, fretante, pila en faxos enorme la benes cual los vole salva de la desastre prosiminte! On debe parti multe pronto, on debe abandona la pais ante ce lo es tro tarda!

La ruas torsosa segueda par la fem joven pare familiar, como si on ia ta vive ja en acel locas, a un otra tempo. On crede reconose la botecas e la nomes de la ruas. On susede an previde la fini de la curvas cuantiosa de la curso, la fini de esta vietas paveda, con rampas ru liscante e fusante en lunlotra, bordada aora par construidas vagante e jardinetas savajida: esta rua alta, ante la des grados de la scalera desendente a la plaza do on panorama aora un colie de tredes-du lados. Ala, la oservor senti se prosima a la gol, « tan prosima ce on no ta osa move plu », el pensa alora cuando el xerca con oios ela ci el no plu vole perde.



Venida de la fondo de la plaza, a destra, la fem joven e sua xica sorti de la oscur e avansa lenta, pasante a lado de la stala de un vendor vagante do un bulbo de lus nuda cual lumina la sena pende.

Sur la fas turbada de la fem joven, sola videtada acaso, on leje un despera apena contenida: alga lus invade la campo e abalia la oservor, ascondente la resta de la vista pos la areolas consentral de du faros, en cuando la ronrona familiar de la motor, la clica lejera de la latas, la vibras mesma pare veni de la interna de la corpo, a la plu profonda de se.

La angulos de lus diverje a sinistra, a dirije de la stasion de bus, ma la oservor resta ancora siecida tra un momento.

« Los vade a embarca la bus de note », el pensa, sin ce el vide alga cosa de la sena, ma convinseda ce el no pote era. « Ance los abandona la pais! »

6. Aporias


[¹] Homero, Odisea, libro 19, linias 560-570. – Ance, vide: Verjilio, Eneida, libro 6, linias 893-896.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 23 marto 2024 (17:14 UTC).