8. A este

La bus ia ariva a la borda de la vila: con la testa contra la vitro, la pasajor ia regarda distraeda, tra la nebla, la paneles grande de propaganda governal erijeda sur la terenos savaje do alga construidas masosa prima sperde.

On ia divina la ocer jala vestijial de la fasadas en media de la gris de la semento orijinal. On ia imajina salas de entra manxada, caxas de posta gastada, do on no plu desifri cualce nomes.

Sin recorda neta, an tal, on ia ta ave la impresa osesente ce on ia vive ja ala, en un aparte vea e nuda, a un epoca nondefinida, e ce cisa on ta pote reconose esta vacua triste de la suburbes de la Este sentral.

La pasajor ia sumerji en la contempla de esta no cosa vidable: la via larga ia es traversante en linia reta zonas abandonada constelada con plataformas de beton, fundas de construidas mor naseda, con colonas noncompletida de cual feros de armatur emerji miscada.

A prima, el ia senti ce no cosa ia cambia; seguente, en sua regarda vagante, la convinse formi ce cisa nunca el ia parti, ce la veculo do el sta no ia es otra ca la bus dial cual retrae el a casa.

En cuando lamas de vapor ia pasa sin sesa sur la vitro, el ia sensa un lenti gradal en la pasa de la panorama urban. El ia crede a esta momento persepi, a retro, la move de algun levante se, recoliente sua bagajes; seguente, a estra, en la distante, entre du ondas de nube oscur, la refuja de un parabus.

La fem joven pasa final ante el, cargada con valises pesosa, e avansa laborosa a la porte de sorti, en cuando final la veculo para, prosima a un crus de vias, pronto pos du paneles de propaganda poneda sur un tereno savaje ultima.

Pos ce la porte abri, la fem joven desende la grados e entra en la nebla. Ela no pare oia la vose de la veculor ci clama a ela: « Esce tu va sabe retrova tua via en acel nebla? »; ance, ela no vide ce un pasajor ia leva de sua seja e ce el profondi, seguente ela, en la nubes cual pasa a retro de ela: ela desapare, simple, silente, en cuando, alora mesma, la bus clui la porte e desapare ance, en la flue nonmutable de sua curso.

An sin cualce loca de orienta, la viajor ia senti un fida asoluta, como si el ia vive ja esta momento, como si el sabe lo cual va surje ante el, pos un curva de la rueta, pos la botecas de la comersiores iudi, la comederias levantan, la taliores o la vendores de litografis e de imajes relijial.

El ia senti ce el pone sua pasos direta en un curso ja desiniada. Pos ce el pasa la stala de un imajor, la rua ia conclui subita a un grado suduinte en un estende de acua oscur.

Un estende de acua oscur supra cual un aira fresca pasa, cargada con odores de plantas putrinte. La venteta fuji la nebla, e la vista deveni intensa neta: lisa es la surfas de la acua.

A la otra lado de la estende acual, sur un petra plata protendente, la fem joven sta, desiniante con un palo streta e longa, con un move cuasi nonpersepable e continuante, sur la plaia de arena, ante la entra de un cava de roca a cual la viajor sensa ce el mesma es traeda, con vortisetas lentas, sur un balsa liscante sin secute.

La balsa lisca sin secute en dirije a la molo strana. Tra cuando esta viaja, dulse e ultima, opera sin forsa o intende personal, puxada a la otra riva mera par la sofla lejera de la aira, la oservor sabe ce el entra en un mundo do la tempo no plu ave sinifia.

La intui ce la orijina de cada instante sta en la sicle nonsesante de la nases e mores de sua propre pensas sujesta a el un fini posible de sua curso: par la disolve de la imajes mental e, con los, probable, de la limitas ultimas.

Aora, la pretesa espeta, stante ante sua desinia misteriosa en la arena. Ma, plu on ipotese lo cual debe aveni, plu la imajes mental nase en la mente de la viajor, e plu la corentes confusa la move de la balsa e devia sua curso; a contra, direta cuando la pensas cuieti, la curso rearmoni, la vortis lenta atrae gradal la esente asta la momento presente. On presensa la ariva a la molo: on comensa persepi la flue de sua pensas como un segue rapida de descargas de vibras; en acel modo la imajes mental nase e desapare, mostrante ce la viajor prosimi en cuando la gardor de la cava trasa dulse sur la arena la linias de un desinia labirintin simil a la curso simultan de la balsa sur la acua.

Gradal cuando on prosimi a ela, cuando la atende forti en tal modo ce la campo mesma de la tempo esvasa, ce la secondo pare un dia, un alterna de clar e de oscur comensa pulsa ante la oservor.

On persepi, aora, entre la instantes, entre la pensas orijinante acel instantes, un vacua, un silentia oscur cual, con la crese de la atende, estende se en un note profonda, nonfininte, asta ce un punto clar apare en la pariete e ce la lus surje e invade la oscuria de la cava. La imajes ta es multe neta: ante la viajor, un baieta streta, rocosa, ta apare alora a la riva de la mar, e, distante, la isola brilietante Lepsos do el ta ariva nadante e do, per sempre, el ta junta se a la suas, a los cual ia completi la viaja.

Un otra dia nase — un mano ia saisi mea mano e trae me asta la tera nova.

 

Fasinada par la reveni constante de la mesma imajes sur la scermo, me ia entra gradal en un state de sonia do la senti osesente ce me vive un dia sempre recomensante es simbolida par un sena mostrante un bande sinematografial anelida e movente a un rapidia de tre sento mil cilometres per secondo. Car la dura de un sicle es dudes-cuatro oras, me ia dedui natural la longia de esta bande — dudes-sinco bilion nove sento dudes milion cilometres — ma mea consensia ia estrae sola dudes-cuatro imajes per secondo. Entre aceles cual me persepi, cisa otra imajes, de un otra realia, ia interpone. Me ia desira tan vide, sabe!

En la pasa aparente continuante de la imajes, interstisios inserta, fesures cual on no persepi usual, vacuas cual la consensia no saisi.

Cisa imajes de otra filmas interpone en la bande, imajes cual es, per la presente, nonasedable, ma cual un desloca simple, par avansa o par retarda, en la pulsa luminante ta pote fa ce me vide los. Cisa ance, como vacuas separa la puntos de un linia o la imajes de esta filma, silentias oscur, estra tempo, separa la instantes luminada par la pulsa consensa.

Entre la instantes, ala la eternia reposa: la refuja nonrevocable cual me xerca locali en esta interstisios nontempal. Par un aselera simple de la pulsa luminante, me ta entra e permane en lo. Par un desloca simple.

Esta calculas laborosa ia estrae me de la sonia: reposante sur un leto con strutur metal, duxida par la lus dur de un bulbo nuda, invadeda par un onda de caldia cual fa ce mea camiseta mesma es nonsuportable per me e invita ce, cuando la umidia pegosa de la stofa es tan desplasente, me leva per abri plu la fenetron cual fasa la plaza multe spasiosa, cuasi sirculo, con terenos savaje asta perde de vista: sur un via larga, tota reta, en la fondo ueste, un bus ruinada surje, rolante con rapidia grande.