0. La secreta de la orijina

Tra cuando la oservor senta sur un roca plana, en la ombra, con la regarda dirijeda a interna, con la spirito permeada par la sabor de sua nom real veculida par la flue e la reflue de la aira sur la lingua, sur la labios, la imajes mental, orijina de cada instante, nase e mori.

La foresta deveni alora mal focada, mal contrastada, nonmesurable profonda. Un intermete lenta de flaxes de lus e de oscur comensa pulsa ante la oservor.

« Entre la instantes la eternia reposa », la viajor pensa, reveninte a la mundo en un flax nova, en cuando el recorda la refuja justa lasada, en cuando sua sensa desende, a interna de el mesma, la rampa rigorosa reta de un coredor.

Apena el nota ce la mures de beton ia deveni parietes rocosa ru cual verje plu e plu a sinistra, e ce la protendes de roca pasa con un rapidia cresente, nonestimable, tal ce la pedes de la viajor no toca plu la solo. Apena el nota la depintas parietal nonumerable.

La inertia de la viajor pare aumenta sin sesa, en tal modo ce el abandona se a la move, sin atenta de lenti sua curso: el lisca, en la cava oscur, en dirije a la punto estrema abrida: un punto pal cual crese rapida, tro rapida!

En cuando la lus crese e la imaje neti, la viajor vide ce la neblas disipa e ce la sielo abri ante un baieta streta a borda de la mar e, a mar, distante, la isola briliante Lepsos. El sorti alora de la cava e desende cauta la lado presipe do la bosceta ardente agu crese, asta la rocas cual sudui en la mar.

El mesma, aora, sumerji en la estende licuida e comensa nada asta la isola, en media de la vortises joiosa de la balenas ci acompania el e jua sirca el. No fatiga ateni el longo la traversa longa, e, a retro de el, asta la infinita, sin duta, no cosa resta plu!

E, en fato, un fondo negra invade la scermo, disolvente denova tota la pensas — un note eterna desende, un note profonda, asoluta.

E, subita, un nase nova opera: un mano ia prende la mano de la viajor e estrae el asta la tera, asta la molo de petra.

El pasea sur la petras jigante cual pave la strada, ante la colonas con sua capitales dorian; el traversa la pergolas en petras taliada longa, culminante supra la mar; el senti, vidente los, un mesaje de bonveni.

Aora, el sta entre la suas, en la asembla pur de los ci ia completi la viaja. El prende sua loca en la prosegue longa cual asende lenta la colina en dirije a la altar de la templo de Apolon de Lepsos, e el modula con los, en la aira plenida par la xilias de la sicalas, la sete vocales sacra, la encantas de la fini de la tempos.

On no plu ave cualce a ante, cualce a pos. En sua refuja contra la dias avenida e aveninte, stante ante la portico de la templo, el regarda per sempre la realia eterna, de sur la colina de la olivos, tota parfumida par la fenogreco. La raios oblica de la sol reposante indica a el, en dirije a la orizon, la falesas de la continente de do tota veni, a do tota reveni.

A basa de la falesa, prosima a un concava de roca do la trapos ultima de un manoscrito laserada completi sua gasta, la venta de la mar alta cansela un sirculo grande trasada sur la arena, sirca un corpo reposante ala. Alora, un silentia grande oscur estingui lenta la rumor disolvente de la mar.

Me ia pote asconde, como me ia intende, a la fini de la filma, espetante pasiente pos un cortina asta ce la asembla de la regardores e de la empleadas ia abandona la sinema.

Cuando la silentia ia es completa, me ia osa regardeta: sentante sur un seja de la linia de la fondo, a la seja mesma cual me ia ocupa a ante, a la limita de la salon sumerjida par la oscuria, algun ia pare permane en un razona profonda tra cual el atenta dedui cual dimension ia desapare en sua universo sensable, e par cual segue de causas.

Suspetante un trucioio do la pasada aneli sur la futur, como la scalera asendente ariva a la plataforma basa sur la poster de La table esmeralda, cual, con sua du dimensiones, sujesta un dimension tre, el ia dise a se ce, en la zona de persepi tempal (sua memoria), la sensa de ordina cronolojial es posible destruida — sola la persiste de la dimensiones de spasio ia conserva la ilude de sua esiste, tal como un membro fantasma.

A esta realia unica cual penetra en nos, sola nosa sensas dona dimensiones, par la modo mesma de sua operas.

La perde de alga sensas ia pote lojical causa la perde de un dimension. On ia conserva la recorda de cada cosa, ma la perspetiva cronolojial ia desapare: tota ia apare sur la mesma nivel, per dise en modo paralel, en tal modo ce en un mesma loca on ia encontra persones e avenis de epocas diferente.

Ma como la perde de la sensa tempal ia es produida? Sola car me ia es serta ce el ia sabe ja, me ia avansa ancora.

Tra cuando me ia prosimi con cautia de la pensor sacra — temente ce me velia el — e me ia comensa distingui sua fas, vide asi lo cual mea memoria retrae: me mesma ia es sentante en esta seja de la linia de la fondo, sumerjinte en un razona profonda do la luses colorida de la filma projetada sur la scermo perde sua brilia, alora velida, distante.

Distante, ance, la asembla de la fanes acaso de sinema sirca me. Me ia es xercante, tra la detalias de la arciteta spetaculin de la amfiteatro, un loca do me va evade la atende jeneral asta ce la asembla de la regardores e de la empleadas ia abandona la sinema.

Me ia es eliminante pico e pico la locas difisil asedable, asta ce me reteni sola esta parte de la salon, a destra de la sena, do on divina la sorti de securia, e do la plias de la cortina ofre un refuja posible: me ia es imajinante ce me profita de la pausa entre la projetas per prosimi a esta cortina de sena e, seguente, ce me leva ja secreta la stofa pos cual me ta asconde e espeta pasiente asta ce la silentia es completa.

E, en fato, en cuando me es imajinante esta ata en mea mente, la silentia ia deveni real completa sirca me: la linias de sejas ia es vacua, la lus ia es estinguida ja. Esce me ia adormi en la tempo de la presenta?

Alora me ia persepi un xuxa lejera de stofa, veninte de la sorti de securia; tra la oscuria, me ia persepi final la move de la cortina de sena e la desveli de un esente ci, probable embarasada par mea presentia, ia resta fisada.

Sola pos alga instantes, el ia deside move en dirije a me, con cautia: pico e pico, tra cuando el ia avansa, me ia es descovrente — tan stonante ! — la similia de nosas fases.

« Me es movente en dirije a me! me ia pensa. Me, a du momentos cual fusa asi. »

Me no ia pote es veliada: me ia es rementente en efeto, multe neta, ce me es avansante ja en dirije a un me mesma dorminte. Esce lo ia pote es otra? Car, si me ia ave la oios abrida, cual realia me ia pote persepi, si no lo de la presenta de sinema en cuando me ia es adorminte?

Mea palpebras ia deveni plu lejera, en cuando me ia es sensante un dole a la spina dorsal, causada par un mal posa. Alga secutes ia velia me completa. Tra la vitro, me ia regarda distraeda la rejion: un via streta de campania a lado de colinas, bordada con ortetas pico, ru sercida par palos de troncos cargada par un strato de neva nonmanxada.