Tereno

Mestre Sun dise:

En relata con tereno, on ave:

• Asedable
• Maraniante
• Staniada
• Constrinjente
• Presipe
• Distante

Si nos pote vade e los pote veni, lo es asedable. Sur tereno asedable, prima nos ocupa tera alta e solosa cual conveni per vias de furnis per batalia vantajosa.

Si nos pote vade ma no reveni fasil, lo es maraniante. Sur tereno maraniante, si la enemi es nonpreparada, nos sorti e vinse los. Si la enemi es preparada e nos sorti sin vinse, reveni va es difisil—esta es nonvantajosa.

Si nos sorti e lo es nonvantajosa e los sorti e lo es nonvantajosa, lo es staniada. Sur tereno staniada, an si la enemi ofre un vantaje, nos no sorti. Nos retira per tenta la enemi. Cuando un dui de la enemi sorti, nos ataca los vantajosa.

En relata con tereno constrinjente, si nos ocupa lo prima, nos pleni lo e espeta la enemi. Si la enemi ia ocupa lo prima, nos no entra si la enemi ia pleni lo. Nos entra sola si los no ia pleni lo.

En relata con tereno presipe, si nos ocupa lo prima, nos ocupa tera alta e solosa e espeta la enemi. Si la enemi ia ocupa lo prima, nos retira per tenta, e no entra.

Sur tereno distante, la situa es egal, provoca batalia es difisil, e combate es nonvantajosa.

Tota esta ses tipos de tereno es la encarga de la jeneral. El no pote iniora los.

Entre soldatos, on ave los ci deserta, los ci desobedi, los ci dejenera, los ci colasa, los ci deveni caososa e los ci sufri defeta: tota esta ses no es desastres de sielo e tera, ma la falis de la jeneral.

1. Si ceteris paribus on ataca con un per cada des, lo resulta deserta.
2. Si soldatos es forte e ofisiores debil, lo resulta desobedi.
3. Si ofisiores es forte e soldatos debil, lo resulta dejenera.
4. Si ofisiores alta es coler e desobedinte e ataca la enemi sua sponte ante cuando la jeneral sabe sua capasia, lo resulta colasa.
5. Si la jeneral es debil e laxe, con comandas nonclar, ofisiores e soldatos sin regulas fisada e soldatos ci fili desordinada, lo resulta caos.
6. Si la jeneral no pote evalua la enemi, comandante poca contra multe, debil contra forte, sin soldatos forte a fronte, lo resulta defeta.

Tota esta ses es la via de defeta. Los es la encarga de la jeneral e el no pote iniora los.

Tereno aida un armada. Evalua la enemi per controla vinse; evalua periles, colos, prosima e distante—esta es la via de un jeneral suprema.

El ci sabe esta en batalia va vinse; el ci no sabe esta en batalia va perde.

Si vinse es serta, ma la senior dise: no batalia, alora batalia conveni. Si defeta es serta, ma la senior dise: batalia, alora batalia no conveni.

El ci avansa sin xerca fama, retira sin evita puni, proteje la popla e servi sua senior es un tesoro nasional. El regarda sua soldatos como enfantes e los va segue el a en un canion profonda. El regarda sua soldatos como fios amada e los va sta con el asta mori. Ma si el es bonvolente ma no pote usa los, amante ma no pote comanda los, caososa e no pote maneja los, sua omes va es como enfantes regalada e sin usa.

Si nos sabe ce nosa soldatos pote ataca, ma no sabe sur la nonatacablia de la enemi, nos ave vinse duida. Si nos sabe sur la atacablia de la enemi, ma no sabe ce nosa soldatos no pote ataca, nos ave vinse duida. Si nos sabe sur la atacablia de la enemi, e nos sabe ce nosa soldatos pote ataca, ma no sabe ce la tereno no conveni per ataca, nos ave ancora vinse duida. El ci sabe gera move sin confusa, ata sin fatiga.

Donce on dise:

• Si on conose [la enemi] e conose se, vinse no es en peril.
• Si on conose sielo e conose tera, vinse pote es completa.