Nove adatas

Mestre Sun dise:

Regula jeneral de gera: La jeneral reseta comandas de la renor, enscrive sua soldatos, asembla sua armada.

1. Sur tereno difisil, no campa.
2. Sur tereno abrida, fa alias.
3. Sur tereno isolida, no espeta.
4. Sur tereno ensircada, fa projetas.
5. Sur tereno matante, combate.
6. On ave vias cual on debe no segue.
7. On ave armadas cual on debe no ataca
8. On ave sites cual on debe no aseja
9. On ave terenos per cual on debe no compete

On ave comandas de renor cual on debe no obedi.¹

Donce un jeneral ci comprende bon la vantajes de esta nove adatas sabe gera. Si un jeneral no comprende bon la vantajes de esta nove adatas, an si el conose la forma de la tereno, el no pote usa la tereno vantajosa. Si el maneja armadas sin comprende esta nove adatas, an si el comprende la vantajes de la tereno, el no pote usa omes bon.

Un saja considera serta vantajes e desvantajes en junta. Par tempera vantajes, el pote ateni ojetos. Par tempera desvantajes, el pote evade desastre.

Debili prinses feudal con dana. Ocupa los con labora. Freta los con vantajes.

Regulas jeneral de gera:

• No fida ce los no va veni, ma fida ave medias per trata los.
• No fida ce los no va ataca, ma fida ave lo cual on no pote ataca.

On ave sinco periles per un jeneral:

• Noncautia — el pote destrui
• Timidia — on pote catura el
• Disputosia — on pote provoca el
• Orgulo —on pote umili el
• Amablia — el pote ansia

Esta sinco falis en un jeneral es ruinosa per gera. Si un armada es vinseda e sua jeneral matada, lo es serta la resulta de esta sinco periles. On no pote iniora los.