Projeta
Mestre Sun dise:
Gera importa multe a la pais — campo de vive e mori, via a survive e ruina. On no pote iniora lo.
Sinco fatores governa lo, cual on debe considera per compara e comprende la situa:
- Dau
- Clima
- Tereno
- Gida
- Disiplina
Dau: lo fa ce la popla acorda con sua gidor, suporta el con sua moris e vives, e no teme peril.
Clima: nube e sol, calda e fria, oras e saisones
Tereno: prosima e distante, difisil e fasil, larga e streta, vive e mori
Gida: sajia, fidablia, compatia, coraje e severia
Disiplina: organiza, cadena de comanda e lojistica
Cada jeneral ia oia esta sinco. El ci sabe los vinse. El ci no sabe los no vinse.
En considera per compara e comprende la situa, demanda:
- Cual renor ave la dau?
- Cual jeneral es plu capas?
- Cual clima e tereno favore?
- Cual disiplina plu eficas?
- Cual armada es plu forte?
- Cual ofisiores e soldatos es plu bon instruida?
- Cual recompensa e puni plu clar?
Par estas me predise vinse e defeta.
Un jeneral ci segue mea consela e aplica lo va vinse serta: reteni el! Un jeneral ci no escuta mea consela o aplica lo va perde serta: desemplea el!
En oia la vantaje de mea consela, esplota situas estracomun.
Cambia projetas per usa vantajes situal.
Gera es engana. Si capas, pare noncapas. Si ocupada, pare osiosa. Si prosima, pare distante. Si distante, pare prosima. Mostra abris per tenta la enemi. Finje confusa per catura los. Si los es solida, prepara. Si forte, evita los. Si coler, burla los. Si umil, pleni los con orgulo. Si osiosa, labora los. Si unida, divide los. Ataca do los es nonpreparada, apare do nonespetada. Tal un stratejiste susede, par revela nunca a ante.
En la templo ante batalia, vinsores ave projetas con multe meritas. Perdores ave projetas con poca meritas. Multe meritas vinse; poca no. Tan multe mal per los sin meritas!
Par considera estas, me predise vinse e defeta.