En marxa

Mestre Sun dise:

Situa la armada per oserva la enemi:

En traversa montes, resta prosima a vales. Campa alta, a fas de sol. En combate sur tera alta, no asende. Esta es situa un armada en montes.

Pos traversa acua, move a via de lo. Si la enemi traversa acua, no engrana los a media. Permete un dui a traversa poi ataca per vantaje.

Si on desira batalia, no engrana la enemi prosima acua. Campa alta, a fas de sol. No avansa contra la flue. Esta es situa un armada sur acua.

En traversa pantanes salosa, move urjente sin retarda. Si on encontra un armada en un pantan salosa, resta entre canas, con dorsos a arboretas. Esta es situa un armada en pantanes salosa.

Sur un plano, situa se en loca asedable con destra e retro a la tera alta afin mori es a ante e vive a pos. Esta es situa un armada sur planos.

Par esplota esta cuatro situas la Imperor Jala vinse cuatro renores.

Jeneral armadas prefere tera alta, odia basa, valua sol, despeta ombra. Situa secur promove vive. On dise ce un armada sin sento maladias vinse serta.

Sur colina, colineta, teraplen o paramar, situa se sur la lado solosa, con la inclina a retro destra. Esta benefica la soldatos, con la aida de la tereno.

Pos pluve a monte, acua spuma. Para traversa e espeta asta cuando lo calmi.

Pos encontra torentes sielal, fontes sielal, prisones sielal, cajes sielal, trapas sielal o fesures sielal, parti urjente. Ta ce nos distanti los, e la enemi prosimi los. Ta ce nos fasa los, e la enemi dorsi los.

Do la armada es prosima a ostaculos perilosa, lagos o stanges, canas o juncos, forestas o bosces o subosces densa esamina los asidua e repeteda, car estas es locas per emboscores e spias.

Si [la enemi] es prosima ma calma, los fida sua situa forte.

Si los es distante ma provoca batalia, los desira ce la otra lado avansa.

Si sua campa es asedable, lo es vantajosa.

Si multe arbores move, los veni.

Si ostaculos apare en la erba densa, los intende confonde.

Si avias leva, lo indica un embosce.

Si animales panica, lo indica un ataca.

Si polvo es:

• alta e agu, caros veni.
• basa e larga, infantriores veni.
• en bandetas sperdeda, los colie lenio.
• en nubes flotante, los campa.

Si los parla umil e prepara, los va avansa.

Si los parla egosa e avansa, los va retira.

Si los proposa pas sin un trata, los scema.

Si caros lejera vade a ante a la lados, los formi per batalia.

Si on ave freta e soldatos fili, lo es la momento.

Si un dui avansa e un dui retira, lo es un trapa.

Si los sta ma apoia contra sua lansias, los fami.

Si acuores bevi prima, los sidi.

Si los vide un vantaje sin avansa, los es fatigada.

Si avias asembla en alga loca, lo es desocupada.

Si los cria a note, los teme.

Si la armada es disturbada, la jeneral no es respetada.

Si banderas e banderetas move, on ave desacorda.

Si ofisiores es coler, los es fatigada.

Si los nuri sua cavalos con gran e sua omes con carne, e si los fali pende sua casolas e no reveni a campa, los va combate asta mori.

Si los xuxa e anui e parla cuieta, [la jeneral] ia perde sua omes.

Si los recompensa tro multe, los despera.

Si los puni tro multe, los es trapida.

Si [la jeneral] es prima violente e teme a pos sua cuantia, lo es noncapasia suprema.

Si enviadas veni con parolas amin, los desira sesa.

Si soldatos es coler e fronti lunlotra, ma longa no engrana e no parti, esamina esta multe cauta.

En gera, cuantia no importa. On nesesa sola no avansa agresiva. Lo sufisi per combina fortia, evalua la enemi, e oteni persones. El ci no pensa e suestima la enemi va es serta caturada par los.

Si soldatos ancora no ia deveni personal liada [a la jeneral] e on puni los, los no va obedi. Si los no obedi, los va es difisil per usa. Si soldatos ia deveni ja personal liada [a la jeneral], e on no puni los, on no pote usa los.

Donce gida los con cortesia, uni los con disiplina militar. On nomi esta vinse serta.

Si on esecuta abitual comandas per instrui la popla, la popla obedi. Si on no esecuta abitual comandas per instrui la popla, la popla no obedi. Si on esecuta abitual comandas, on ave benefica mutua.