Enerjia
Mestre Sun dise:
Maneja multe es como maneja poca: divide de cuantias.
Combate multe es como combate poca: formis e sinias.
Un armada pote serta resiste la enemi sin defeta: direta e indireta.
Un armada debe colpa como un petra contra un ovo: debil e forte.
En batalia, engrana direta, vinse nondireta.
Donce la bon aplica de modos indireta es nonlimitada como sielo e tera, nonconsumable como rio e mar; lo fini e comensa denova, como sol e luna, mori e nase denova, como cuatro saisones.
On ave sola sinco notas, ma sua permuta produi plu ca on pote escuta.
On ave sola sinco colores, ma sua permuta produi plu ca on pote vide.
On ave sola sinco sabores, ma sua permuta produi plu ca on pote proba.
On ave sola du tipos de ataca en batalia, modos indireta e direta, ma permutas de modos direta e indireta es nonlimitada.
Modos indireta e direta pari lunlotra, como move sirculo—no fini. Ci pote consuma los?
Cuando la rapidia de acua sufisi per flota rocones—esta es enerjia.
Cuando la rapidia de un falcon sufisi per colpa e mata—esta es esatia.
Tal per un bon geror—enerjia bruta, esatia rapida. Enerjia como un balesta tirada, esatia como un gatilo relasada.
En turba e tumulta, combate pare caososa, ma on no ave desordina. En confusa e confonde formis pare sirculo, ma on no ave defeta.
Desordina veni de ordina, teme de coraje, debilia de fortia
Desordina ordinada—divide, teme corajosa—enerjia, debilia forte—posa.
Donce el ci move bon la enemi crea formis cual la enemi segue serta. El dona e la enemi prende serta. El move los con tentas poi soldatos embosce los.
La bon geror esplota enerjia per evita depende de individuas. Donce el pote eleje persones e usa enerjia. Cuando usa enerjia, combatores deveni troncos o rocones rolante. La natur de troncos e rocones es resta calma sur tera plana e move sur inclinas. Si cuadro, los para, ronda, los rola.
Donce bon combatores es como rocones ronda rolante a su un monte de du mil metres — esta es enerjia.