Posa
Mestre Sun dise:
En eda antica, la bon geror serti prima sua nonatacablia, poi espeta la atacablia de la enemi. Nonatacablia es en se, atacablia con la enemi.
La bon geror pote ateni nonatacablia, ma no pote reali la atacablia de la enemi.
Donce on dise: “On pote reconose vinse sin ateni lo.”
Nonatacablia es defende; atacablia es ataca.
Defende implica manca; ataca implica abunda.
Un bon defendor asconde su tera nove. Un bon atacor move supra sielo nove. Donce el proteje se e vinse intera.
Predise un vinse evidente a persones comun no es la plu bon.
Batalia e vinse e ce cadun su sielo dise: lodas no es la plu bon.
Leva pelo autonal no mostra fortia grande. Vide la sol e luna no mostra oios agu. Oia tona no mostra oreas rapida.
En eda antica, on ia nomi un bon geror el ci ia vinse vinses fasil. Donce vinses de un bon geror no trae fama per astutia o coraje.
El vinse par no era. Sin era vinse es serta car la enemi ia perde ja.
Donce un bon geror sta do el no pote perde e no fali vinse la enemi.
Donce un armada vinsente vinse prima, poi xerca batalia. Un armada vinseda batalia prima, poi xerca vinse.
El ci gera bon cultiva la dau e oserva la regulas e donce pote maneja vinse e defeta.
Regula jeneral de gera:
- Mesura
- Evalua
- Calcula
- Compara
- Vinse
Tereno pari mesura, mesura pari estima, estima pari calcula, calcula pari compara, compara pari vinse.
Donce un armada vinsente es como un cilogram contra un gram. Un armada vinseda es como un gram contra un cilogram.
Cuando un popla vinsente pare como acua cumulada crevente en un canion de du mil metres de profondia—esta es posa.