Capitol 9
Pos cuatro anios en London, me senti final ce esta site es mea propre abitada. Mea aparte es en la norde de la capital, un rejion rica en spasios verde e parces. Me ama pasea ala en mea tempo libre per respira la aira fresca e per reposa.
Oji, me senti ce la avenis pasada no ave plu cualce cosa relatada a me. Me senti como nasente denova, e me desira lasa a retro tota la mal fortunas de la pasada.
Migra es egal a reconstrui intera mea identia: me comensa de zero, e tota lo cual ia presede lo es sola la polvo levada par la venta.
Me es plen libre.
Ma como me pote oblida la pasada e vive en la presente?
A alga veses, me deveni consensa ce me no parteni vera a esta tera e ce me es sola un stranjer. Pos la pandemia, me ia oserva un cambia sutil en la modo como on regarda la xineses. En mea studias posgraduada, mea familia ia oia multe casos de studiantes xines ci ia es insultada o an atacada par la locales, e los ia solisita a multe veses ce me reconsidera mea deside de studia estra la pais.
An tal, me ia fa mea deside. E a pos, me ia comprende lo cual sinifia la “paranoia”.
Pos un anio en London, a un ves, cuando me ia vade a la universia, un om paseante ante me ia returna la testa de tempo a tempo, con un regarda plen de defende e suspeta. Nos ia manteni un distantia cauta, ma el ia aselera sempre. Arivante a la crus de vias, contra ce la lus de trafica ia es ancora roja, el ia comensa core rapida per fuji.
En la vacanse estatal de 2023, me ia es forsada a fronti la egosia de locales. Cuando me ia parti de Italia pos la congresa internasional de Esperanto, la duanor, esaminante mea pasaporto, ia demanda me: “Vieni dalla Cina?” Ante ce me ia pote responde, el ia seli mea pasaporto e ia relansa lo a me con nonpasientia.
A acel momento, me ia comprende ce me es sola un viajor e ce me no es bonvenida.
Mea pais es mea orijina. A contra, esta fato simple, tan evidente per me, pare sufisinte per provoca suspetas. Cuando on demanda me: “De do tu veni?”, me debe dona un responde, car me no pote emerje de no loca. E la nom cual me dise deveni alora mea orijina.
La vileta, la pais, la pasada, cual me crede lasa ja a retro, es esensal la loca de do me veni. Como me pote nega tota estas?
Notable, mea familia oblida frecuente la avenis resente, en cuando la memorias plu distante resta gravada en sua mente. Mea ava recorda clar lo cual la familia ia esperia en la vileta. Ante mea parti per London, mea avo ia raconta a me denova un nara repeteda a multe veses: en la matinas invernal, gidante me a la scola prima sur un bisicle, el ia fa sempre un devia par la stradeta. Cuando me ia demanda a el perce, el ia responde con un surie: “Vadente direta, on va fronti la venta. En la stradeta, on ave no venta.”
Si nos no oblida esta memorias distante, lo es car los remente nos de nosa orijina. Los es un ancor valuosa cual preveni nos, en la tempestas de la vive, de perde la via de reveni.
La cursos de mea vive e de la istoria familial no es lo cual me ia imajina: plen de susedes, de lodas, e de un futur briliante; a contra, los es sempre marcada par asendes e desendes. Lo es posible ce, a fas de la cambias frecuente de la mundo, on aprende dona un sinifia a sua propre vive.
Me es tal como me vive.
(Fini)