Capitol 7

En la Rena Unida, me vide frecuente ce familias estende sua telas de picnica per jua sur la erba. Los es joiosa e destensada, como si la politica no conserna los.

Ante la abitada de la Ministro Xef, protestores mostra banderas e espresa en modo abrida sua demandas political. A la club marxiste de la Universia, me ia encontra un grupo de studiantes ci ia discute con pasion la gera en Ucraina e ia clama per organiza un protesta contra la atas militar de Rusia.

La imaje cual impresa me la plu es lo, videda en un video, de un studiante xines ci ia partisipa la move de studiantes de 1989. Sur sua bisicle, con la fas luminada par zelo, el ia declara con autofida a un jornaliste engles: “Going to march. Tian’anmen Square. Why? I think it’s my duty.” (Me va protesta. Sur la Plaza Tian’anmen. Perce? Me pensa ce lo es mea debe.)

Sua fas brilia con un pasion e un fida cual me ia vide nunca en otra loca. Me ave sirca la mesma eda como el, ma sua joia e sua enerjia velia en me un tristia nonesplicable. Me no sabe perce. Cisa la ombras de la pasada impedi me a aseta plen la presente. Cisa ance mea carater reservada construi gradal un mur nonvidable entre nos.

La mur cual separa nos no es sola un distantia psicolojial; lo es ante tota la produida de la bon e mal periodos de mea vive. Lo ia dilui mea pasion e ia inonda un parte grande de la creosia cual ta pote flori.

En 2015, me ia oteni un nota regretable nonsufisinte per entra a la instituidas prestijiosa en la esamina nasional per entra a la universia. Me ia es forsada a eleje un universia modesta en un vila modesta.

Ante entra a la universia, un de mea relatadas ia consela me a oteni un documento de cuali per instrui, afin me pote ave un posto en un scola media pos mea gradua. Ma esta perspetiva ia causa a me un desilude profonda. A la eda de des-sete anios, con la convinse ce me merita plu, me ia refusa vide mea vive desiniada ante proba otra vias.

Lo cual ia fa la situa an plu difisil es la despeta apena ascondeda par alga relatadas padral. Mea cusina (la fia de la frate de mea padre), ci ia partisipa la esamina en la mesma anio, ia es asetada a un universia de grado du en la capital provinsal. Nos instituidas ia parteni a la mesma categoria, sin difere real de nivel. An tal, mea tio (la sposo de la sore de mea padre), en la asentia de mea jenitores como sempre ¹, no ia fali umili me. El ia trata mea cusina con cortesia e bonvole, ma per me, el ia reserva sola despeta e noncurantia. Pos esta farsa, me no ia manteni plu relatas intima con la relatadas padral.

A la Anio Nova Xines de 2018, la familia de mea tio padral ia invita mea cusina e sua jenitores a la sinema, lasante a lado mea jenitores e me como sempre. Mea cusina ia proposa alora compra un bileta per me, lo cual me ia refusa con iniora.

A la momento de parti per la vila cual me ia visita nunca, me ia senti confusada e sin defende. Me ia previde ce un vive nonconoseda, sin duta plen de probas, ia estende ante me.

A poca tempo ante aora, me ia scrive un declara sur la largi de partisipa (widening participation statement), en cual me ia debe recorda mea curso de educa e la situa de mea familia desfavorable. Acel cuatro anios universial ia reveni alora a mea memoria. Me ia usa la parola “resilience” (resistablia) sin cualce esita, car me ave tota razonas per fa lo. A la dia prima de mea vive universial, arivante a la abitada, me ia trova la visina de mea sala, con la tronco nuda par causa de la clima calda, asorbeda par un jua de video. Vidente esta, me ia comprende pronto con tristia ce me es ambieda par studiantes poca dilijente. Un de mea coabitores no ia es min dedicada a la juas de video: a la fini de la semestres, el ia pasa frecuente notes intera juante, fante ruido nosente a mea dormi pasosa.

An plu mal, a la comensa de la anio du, el ia abri un boteca de comedetas en nosa sala. A cada sera, multe studiantes, la un pos la otra e sempre en grupos, ia veni per fa compras, parlante forte e riente. Me ia vade frecuente a leto multe temprana afin me va pote leva temprana en la matina per la clases. Ma me ia debe adormi con la lampa ensendeda, ambieda par grupos de studiantes ci ia veni e vade con ruido e ries, en cuando la odor de tabaco ia flota en la sala.

La ajusta ia es mea sola stratejia de survive, car me no ia ave la posible de cambia mea sala. Pos alga tempo, surprendente, me ia pote dormi an con tota acel ruido. An oji, me susede ancora iniora la ruido sirca me, o en la biblioteca universial o en la biblioteca comunial.

Natural, me ia fa atenis en esta cuatro anios e ia deveni un de la studiantes la plu bon. En la autono de 2017, la scola ia deside dona a me un donada per studia nasional, cual es dedicada a sola un studiante de la scola a cada anio. En la mesma tempo, cameradas de clase ia informa me ce un studiante de la anio cuatro, ci ta oteni la donada, ia dise parolas desfavorable contra me. Plu tarda, me ia encontra ela a du veses, sola per razonas academial. Me ia nota nunca esta parolas e ia trata ela sempre con amia, como si no cosa ta aveni.

Fatigada par la relatas sosial a la scola, me ia retira me de la mundo esterna. Me ia desinia alora un scema de prepara per la esamina de entra a la posgraduada. An si me ia eleje un vive solitar e disiplinada, la probas ia segue la un pos la otra sin pausa.

A la fini de 2017, cuando me ia prepara me per la esamina de cuali per instrui, la xef de la scola ia invita me a partisipa un concurso de scrive. Car la dia de la concurso ia coaveni regretable con lo de la esamina, me ia refusa la ofre: me ia dedica multe tempo a mea prepara e no ia vole fali esta esamina.

Ma la presa ia crese.

En sua ofisia, la aidador de la xef de la scola ia reproxa me con un tono seca: “Nos ia dona a tu un donada per studia nasional con la espera ce tu va gania la onora per la coletiva.”

Me ia sede final e ia aseta la ofre. Ma me ia oteni no premio e no onora. Seguente, me ia oia sola parolas desfavorable.

Par causa de esta episodio, me ia consensi a un plu ves de la divide cual ia separa me de la scola. Me ia gania no cosa; a contra, me ia oteni un mal reputa. Plu, me ia fali la esamina de cuali per instrui. Tota mea prepara ia es reduida a zero: me ia nesesa recomensa tota.

Me ia eleje alora deveni silente, resta discreta e manteni un profil basa.

Malfortunosa, como sempre, me ia era.

En un clase, un profesor — sempre con un surie malvolente e un vose plen de amargia e ironia (Perce no? nos ia es, ante tota, sola studiantes de un universia de grado du, sin capasias, sin promete. Esce nos, stupidas povre, merita vera es instruida par ela, ci ia graduada de un instituida prestijiosa?) — ia fa a me un demanda.

Me ia responde con un vose basa, cisa sin autofida.

Regretable, me ia causa sua noncontentia.

– Parla plu forte! Tu es un xico, no? Perce tu ia parla tan basa? Recorda bon, tu es un xico.

Me ia senti alora la despeta en sua regarda. Como Meursault en La Stranjer, me ia es condenada a “mori”.

Me ia comprende ce me es libre per prende mea propre desides e per conose me sola tra me mesma. Car la umana es condenada a es libre, la solitaria deveni mea destina. De acel momento, me ia desfisa me gradal de la scola e de la universia. Me ia prepara me per la esamina de entra a la posgraduada, como si mea esiste intera ia ta es reduida a acel cosa.

A la sera ante Natal, pos fini la esamina, me ia dise a me: “Final, lo es finida. Un eda nova va comensa.”

Pos vive tra un tempo longa en London, me es frecuente saisida par la desira de sutrae la nom de esta universia de mea resoma de carera. Esta es, sin duta, mal fida (mauvaise foi). Como me ta pote sutrae de mea istoria un parte de mea vive, an si lo ia es plen de regretes?

Me recorda Ah Hock, la protagoniste de la novela Nos, la survivores (We, the Survivors), ci senti isolida en la festa leteratural organizada par Tan Su-Min, un esaminada per dotoria. Ah Hock e Tan Su-Min incarne du fasetas de la autor Tash Aw, a la mesma tempo un fio de la clase de laborores e un membro de la elite instruida. Como el, me es un membro de la clase educada, ma la diploma de dotoria no va dona a me un loca sosial plu alta.

Esta tensa entre la aspira e la restrinjes enforsada par la pasada constitui la aspeta trajedial de la movablia sosial en Xina. Per xasa un futur plu briliante, nos debe distanti nos de un istoria plen de dias oscur. Cuando nos regarda a retro, an con la via longa traversada, nos resta ancora partal fisada en la pasada, en un vileta distante, en nosa clase sosial de orijina.