Capitol 6

En mea rexercas dotoral, me ia identifia un fenomeno: la obras de scrivores de orijina xines, spesial los de Xina continental e Malaisia, es frecuente infestada par memorias de avenis traumante. En Stranjeres sur la Molo, Tash Aw sulinia ce multe lejores ueste pare senti poca empatia per la naras de trauma.

Onesta, como autor, esce me no desira scrive sagas familial plen de aventuras? Ma me no es capas de imajina la vive de la desendentes aristocrata. Lo cual me erita es sola la memorias de persones comun, ci labora dilijente a cada dia per survive.

A mea reveni a casa, me ia parla con mea padre sur sua vive. Como la plu de xineses, el ia resta sempre multe reservada sur sua pasada.

Cuando me ia mensiona a el mea projeta de scrive la istoria de nosa familia, el ia dise a me ce la jeneras de mea duavo e avis ia ave ancora multe naras cual merita es racontada, en cuando la sua ia conose sola la Reformi e la Abri e ance la tende de desempleas.

Me fida ce lo es esata la istoria cual debe es conservada per la jeneras seguente.

Mea ava ia confida a me ce, cuando el ia es multe joven, mea padre ia repete frecuente ce sua vive va es difisil. Triste, esta frase ia deveni un profetida.

Mea padre ia nase en 1968. Sua resultas scolal ia es sempre mediocre. De un xico enerjiosa e estrovertida, el ia deveni introvertida e sin autorespeta. Esta evolui ilustra un problem profonda en la educa xines: la resultas scolal judida como nonsasiante sufisi per nega la valua de un individua.

En London, me vide frecuente ce studiantes de liseo sorti de scolas sirca la ora tre o cuatro posmedial, paseante en grupos en la strada, con sua uniformas bon taliada, espresas de fas destensada e ries joiosa.

Esta sena fa sempre ce me recorda jovenes xines. Los leva ante la lus prima per la sesion prima de studia, e fini la ultima tarda en la note per vade a leto pos un lava rapida. Dia pos dia, los es enterada su montones de libros e paperes de esamina, e la enerjia de sua jovenia desapare gradal. Cuando los susede final entra en la universia, los sembla un peso de carbon consumada, noncapas de revive la pasion ardente de sua adolese.

Consernante la economia, Xina ia pasa la Rena Unida.

A contra, regardante la dinia de la individua, nos stania ancora.

En realia, nos ta debe ave la espera de cambia tota acel.

La Reformi e la Abri en la desenio de 1980 ia dona un aspeta political e economial tota nova a Xina. La reformistes ia mostra un coraje grande e ia atenta vinse la problemes sosial cual ia cumula tra un tempo longa.

Xina ia conose alora un renovi de ideas e de la sosia. La reformis economial ia causa cambias vidable. A la ves prima, la popla ia senti ce sua destina pote es parte de la progresa nasional. La studiantes universial ia discute la politica, en cuando en la stradas, la vendores peti ia parla con curiosia sur esta terma nova, la “economia de mercato”.

La cade de la ordina sosial vea, con la velia de ideas nova, ia provoca en la mesma tempo esita e ansia. La persones ia desira plu libria, ma los ia pare ance persepi la borda proibida.

A la fini de la desenio de 1980 e la comensa de 1990, la mundo intera ia conose un tende de democratia.

En 1987, la Move de Democratia de Junio ia aveni en Corea Sude. En onora de Lee Han-yeol, un studiante de la Universia Yonsei, ci ia mori par feris en un protesta, e ance de Park Jong-chul, un studiante de la Universia Nasional de Seoul, ci ia mori pos un interoga violente liada a sua ativia political, plu ca milion sitadanes ia vade a la stradas tra la pais per protesta contra la autocratia militar de la presidente de acel tempo, Chun Doo-hwan. La filma 1987: Cuando la Lus Prima Veni recrea la pasion de la popla en acel estate istorial: a la fini, la sitadanes brandi la bandera nasional, canta la imno nasional e clama la slogan “Aboli la autocratia!” Chun ia es final forsada a sede e ia aseta la eleje presidental par vota direta e otra mesuras de reformi democrata.

A la dia 15 de julio de la mesma anio, Chiang Ching-kuo, alora Presidente de la Republica de Xina, ia anunsia la fini de la lege militar en Taiwan, cual ia resta en enforsa tra tredes-oto anios, e ia cansela la proibi de partitos political e de jornales. La atmosfera sosial, per un tempo longa sofocante, ia fende par sola un colpa, e la prosede de democratia de la isola ia comensa.

La tende de democratia ia traversa rapida un mundo plu vasta.

En 1987, Gorbatxov ia proposa la “Pensa Nova”, atentante salva la governa soviet cadente par reformis economial e political. En 1989, cambias political ia aveni la un pos la otra en Europa este. A la dia 4 de junio, la sindicato polsce nomida Unia (Solidarność) ia vinse la Partito de Laborores Unida Polsce, cual ia teni la potia tra un tempo longa, en la elejes parlamental. A la dia 9 de novembre, la Mur de Berlin ia cade; la poplas de Deutxland este e ueste, plorante, ia besa e abrasa se sur la ruinas.

Xina, en acel tempo, ia fronti ance un cambia istorial. En april 1989, la mori de Hu Yaobang, un reformiste political, ia relasa emosias represada. La move de studiantes ia estende de la campuses a la sosia sivil. Studiantes e sitadanes ia vade a la Plaza Tian’anmen per oposa la sobornosia e reclama la libria de jornalisme e reformis democrata. Lo ia es un primavera plen de pasion e espera; multe persones ia crede ce Xina es ance a punto de cambia.

Entre la sera de 3 de junio e la matina temprana de 4 de junio, la istoria ia fa un jira savaje. La armada ia entra par fortia en Beijing e ia fini un move cual ta pote gida Xina a un futur plu luminosa. La primavera de espera ia es craseda par la veculos militar.

Pos la represa de la move, la clima political de la pais ia fri par sola un colpa. La spasio de discute publica, cual ia emerje enerjiosa en la desenio de 1980, ia deveni subita paraliseda, como jelada par un onda de fria. La sitadanes ia perde denova la oportunia de partisipa la vive political nasional. La discute publica ia deveni ancora un domina reservada a la culmina de la Stato. La popla, como a ante, ia lasa ce la corente de la epoca portada el a un dirije nonconoseda.

En 1986, mea padre ia move con mea ava par causa de la cambia de sua posto de labora. El ia studia en la liseo local, ma el no ia fini sua studias e ia debe move a la scola profesal, con la intende de aprende un tecnica profesal cual ofre bon esperas de emplea. Esta desira no ia reali par causa de la politica impedinte de asinia de postos.

En 1990, el ia susede en la esamina de entra de la scola tecnical e ia oteni sua diploma en la autono de 1993. El ia es enviada per labora a la beneria de sereales. Pos anios longa de vaga, el ia ave final un carera stable. Ma la tende de desempleas en 1999 fa ce el ia perde sua emplea, e tota ia reveni como a la punto de zero.

Seguente me, la tende de desempleas ia es un de la resultas la plu profonda de la represa de la move de studiantes. La proposa de Zhao Ziyang, un reformiste political ci ia recomenda solve la conflitas sosial “en la cuadro de la democratia e la lege”, ia es rejetada, e la sosia ia perde sua canales de discute publica e negosia.

An si la sistem economial ia es relansada en 1992, un balansa ia manca de lo en sua dirije: la interesas de la Stato e de la coletiva ia domina sur la bonstate de individuas. En la reformi economial de la desenio de 1990, miliones de empleadas de companias statal ia es forsada a abandona sua postos abituada, frontinte sola a un desemplea subita e la manca de un proteje sosial. La periodo de cambia economial tan dolosa, cual ta debe es discuteda e solveda coletiva par la politicas publica e la atores sosial, ia cade en modo savaje sur la individuas, ci ia debe sufri lo en silentia.

“Ta ce un parte de la popla rici prima.”

“Ta ce la ricas prima gida la ricas tarda.”

Esta du sloganes ia sona tra Xina, deveninte disedas clasica de la eda de la Reformi e la Abri.

Ci ia rici prima? E la otras, esce los ia rici a pos?

Pos sua desemplea, mea padre ia conose difisilias nova, como en sua jovenia. El ia labora prima per un compania de petrolio, poi ia dirije un scola de instrui a casa, e ia ocupa a pos un posto en la sentro per emplea.

En setembre 2003, el ia entra en un supramercato, do el ia asende la scalera de grado asta la xef de la parte de comedas fresca, un posto cual el ia es forsada a abandona per cura mea avo malada. Aora, el labora en un otra supramercato per gania sua vive.

En la tempo cuando el ia labora en la supramercato prima, el ia ave cuatro dias de vacanse per mense. Oji, el ave sola un dia de vacanse. Cuando me ia es un enfante, me ia oia frecuente ce el debe resta tra la note en la supramercato per “fa la lista de benes”. El ia conose cuasi nunca un reposa vera.

Esta realia dur de labora no ia toca sola mea padre. Mea tio madral (la frate de mea madre) ia studia en un universia en la desenio de 1980. Pos sua gradua, el ia es asiniada a un fabrica de mobilas. Cuando la tende de desempleas ia ariva, el ia debe vaga en rejiones diversa per trova labora, alternante entre periodos de nonativia a casa e xercas de oportunias de emplea a estra. Oji, el, jubilada, reseta un pension de un pico plu ca 2 000 yuanes per mense. An si lo es modesta, esta pension afirma a el a la min un securia relativa per sua dias de veia.

La tal nomida clase de “la ricidas prima” resta estra nosa ateni, contra ce persones como mea padre e mea tio madral labora con asiduia en la periferia de la sosia per un vive stable.

No tota pote rici “prima”, e no tota pote es “portada” a en la corente de rici.

A esta momento, me pensa denova a la frase de acel fem: “Esce tota xineses no ama gania mone?” (Leje la Capitol 2)

En realia, nos labora asidua e dilijente, sola con la espera de un vive plu bon. A contra, la bonstate de la popla pare deveni un favore donada.