Capitol 1

Cuando me abita estra la pais, on fa frecuente a me esta demanda: “De do tu veni?” Esta frase, aparente simple, ave un pesa spesial en la aira de un pais stranjer. Mea pel, cual pare deveni un frontera, stimula la curiosia de europeanes. Algas demanda a me: “Esce tu es nion?” o “Esce tu veni de Corea Sude, no?”

Mea responde es sempre corta, cuasi seca: “Me veni de Xina.” An tal, un ajita persiste en me, car la mensiona simple de la conseta grande de “Xina” no sufisi per esplica la complicadia de mea identia.

Cuando me ia parti de London per Seoul, la mundo sirca me ia cambia en modo subita. A la momento de pone la pede en la airoporto de Incheon, me ia vide per la plu un mar de fases de Asia este, con capeles negra e pel jala, simil a mea aspeta. Nos ia fronti la un la otra, e la frontera de la nasionalia ia desapare. Asta un momento:

Un halmeoni (fema vea corean) amin, ci ia malreconose me posible como un camerada, ia indica la dirije a me en corean. Me ia responde a ela con un surie de amargia en un mal corean: “좨송해요. 한국어를 못해요.” (Pardona. Me no parla corean.)

Un shōjo (xica nion) ia clama ante la desinia de cartun sur sua carta de transporta: “かわいいですね。” (Lo es amable, no?)

Un nühai (xica xines) ia calcula la taso de intercambia en mandarin: “La taso de intercambia entre la yuan xines e la won corean es…”

Nos ia pare simil, ma cuando nos ia parla, nosa partenis cultural ia deveni evidente.

En la oios de europeanes, Xina, Nion e Corea pare comparti un mesma fas e un mesma cultur. Los ave probable difisiles per comprende perce xineses, niones e coreanes es tan fasil capas de distingui sua nasionalias entre se mesma.

A un ves, me ia parla con un om de orijina cimrica a la club de esperanto de London. Cuando me ia confesa a el: “Me es un comensor en nion; me pote pronunsia sola alga frases simple”, el ia demanda a me, multe surprendeda: “Ma esce la niones no usa ance la sinias xines?” El no ia pote imajina probable ce la mesma sinias, cual el considera como parte de la cultur xines, pote es descomposada, reconstruida e mutada a un modo de espresa multe diferente en un otra lingua.

Ma la sutil es ancora plu evidente: an su la eticeta “xines”, la diferes desapare nunca. En la raconta dominante en la Ueste, Xina es frecuente descriveda como un pais multe omojen: un economia florinte, un popla obedinte, instruida per pensa e ata seguente un mesma ideolojia. La sistem de educa xines, en fato, forma la memoria coletiva en esta sensa. De la scola prima, me sabe ce pos la fundi de la Republica Poplal en 1949, la popla xines progresa a la modernia, e ce an con problemes, la futur resta briliante, la nasion deveni plu forte a cada dia e la cualia de vive de la popla boni continuante.

Contra esta, la realia es multe plu complicada.

A universias brites, me ia encontra multe studiantes xines ci ia comensa sua studias a un eda temprana en la Rena Unida. A la biblioteca de mea universia, un studiante pregraduada ia dise a me ce, pos sua fali a la esamina nasional per entra a la universia (Gaokao), sua jenitores ia deside envia el per studia estra la pais.

El ia parla de lo con lejeria, ma me ia comprende pronto ce, an si nos ambos posese un pasaporto xines, nos veni de du Xinas diferente. Per el, studia estra la pais ia es sola un de la elejes pos sua fali a la Gaokao, en cuando, per mea jenitores, empleadas simple ci no ia ave la recursos per finansia mea studias estra la pais, lo ia pare sola un sonia distante. Esta divide economial es un realia autoevidente de la Xina contempora. En la comunia ultramar de studiantes xines, esta difere es spesial saisinte la oio: algas fa compras sin stresas finansial en botecas de lusos, en cuando otras abita folida en apartes compartida en la suburbe e calcula cada sentim de sua spende semanal. Nos es nomida coletiva “studiantes xines” par la locales, ma nos vive en mundos diferente.

An tal, europeanes tende iniora esta divides, car los considera frecuente Xina e la popla xines como un intera monolitin. Cuando la naras ofisial en Xina pone la foca sur la unia e la coere de la nasion, la reportas ueste desinia frecuente Xina o como la “Otra” asustante, o como un stereotipo de un mervelia economial. Ma ambos fali nota un punto esensal: Xina e la popla xines es composada par voses diferente, e estas no es sempre armoniosa e unida.

A cada ves cuando mea amis stranjer demanda a me la situa presente de Xina, un descomforta invade me. En realia, Xina es un pais enorme, e cada provinse posese sua propre tradisiones e costumes. Me no pote resoma la complicadia en alga frases. La modo la plu bon per comprende Xina es posible reconose sua nonreduablia: cada peso de tera posese un istoria unica, cual contribui coletiva a forma la fas de la nasion.

En mea anios de studias en London, me ia comprende ce la istoria vera de Xina es no la nara grande de la “asende a potia” promoveda e selebrada par la propaganda ofisial, no la simboles political portada par la medias ueste. Lo es plu esata un colie mosaica de memorias individua.

Mea istoria personal no pote es reduida a la epica de “un nasion florinte e un popla felis”.

De do me veni?

Cual es mi istoria, en fato?

Estas es la demandas a cual me intende responde.