Capitol 8

Lo cual ia consola me es ce, an con dias plen de difisiles e nonsertia, me ia fini par colie, entre 2015 e 2019, corajis e esperias valuosa cual ia largi mea vista de la mundo e ia forti mea vole de continua mea via.

En un clase de engles parlada, la instruor, orijinal de la Statos Unida, ia raconta a nos sua vive en Corea Sude.

“Me ia instrui engles en un liseo corean. La xef de la scola ia dise a me: ‘Esta studiantes es tro stupida per mestri engles.’ Me ia responde alora a el: ‘Los es stupida car on dise ce los es stupida.’ (They are stupid because they are told that they are stupid.)”

En fato, studiantes xines reseta lodas de sua instruores a poca veses. Ironiosa, lo es xef instruores stranjer ci ia coraji me e ia ofre sua suporta a me. Esta bonvole nonespetada ia velia en me un curiosia profonda per la educa ueste. Como, me ia demanda a me, on educa la studiantes a la otra lado de la mundo?

En la vila modesta, me no ia pote ave alga responde a esta demanda. Longo un profesor sustituinte, lo ia es un loca ideal per la persones jubilada. Lo cual ela ia implica es ce per los ci xerca oportunes plu bon de educa, la vila no es un loca conveninte.

Me ia ave la mesma opina con ela. Me ia vole parti.

Me ia vole vide la mundo esterna, an si sola per un mense.

En la primavera de 2018, la profesor xef ia informa nos ce la Ofisia Provinsal de Educa va organiza un viaja de studia a la Universia de Cambridge en la vacanse estatal. Me ia vide ala un oportun eselente per fuji per alga tempo e asede un instituida prestijiosa. Me ia presenta donce mea solisita a la program, cual, a mea joia grande, ia es asetada.

Como spesifiada, du de mea cameradas de clase e me, en junta con studiantes de otra universias, va parti a England a 29 de julio 2018. No sin difisiles, me ia fini par oteni mea pasaporto e visa ante la comensa de la vacanse.

A la mesma tempo, me ia prepara me per la esamina de entra a la posgraduada. Como me ia teme, esta viaja de studia ta fa ce me perde un mense valuosa e dana mea prepara. Ma, pos pensa plu, me ia dise a me ce lo va lasa bon memorias a me. Restante a la universia, su la caldia sofocante, en la biblioteca do la frescadores ia deveni nonusable, me ia studia per la esamina e ia pasa sirca dudes dias en esta modo, espetante la dia de parti.

Final, la dia de parti ia ariva. Me ia ateni la airoporto internasional poca pos la ora 14. Pos encontra la membros de mea grupo, me ia colie la biletas de avion e ia consinia mea bagaje. La vola, prevideda per ariva a la 17:30, ia es tardida par causa de la mal clima.

Me ia espeta donce en la sala de espeta con mea acompaniores. Regardante tra la fenetras, me ia vide un arco de sielo. Multe membros de la grupo, atraeda par sua belia, ia core per fotografia lo. Ta ce la vive sembla esta arco de sielo, tan merveliosa e bela pos un tempesta violente.

La avion ia ariva sola pos la ora 22:00. A la momento de enaira, me ia sabe ce la viaja ia comensa vera. Car on no ia ave alora un vola direta, nos ia debe fa un cambia en otra site. A acel dia, cuando nos ia ariva ala, lo ia es ja medianote. Poca pos la ora 1:00 de matina, nos ia core a la otel. Sirca la ora 5:00, un clama de telefon de la acompanior ia velia me. Me no ia senti alga fatiga, an si me ia dormi per min ca cuatro oras.

Poca pos la ora 9:00, on ia permete nos a entra en la avion, cual ia enaira esata a la 9:30. La vola ia dura sirca des-du oras. En esta tempo, me ia atenta dormi a veses per abitua a la desfase de ora. Ma como me ta pote adormi? Aora e alora, me ia oserva la scermo eletronical per segue la curso en tempo real. Pos oras de alterna entre un dormi lejera e un regarda ansiosa a la scermo, me ia vide final ce la avion vola supra England. Gradal desendente, lo ia toca la tera a la 14:30.

Atendente mea vola per Seoul en Heathrow en la estate de 2025, me ia recorda a un plu ves esta viaja. Oji, un vola internasional no es un cosa nova. Me pote trova la macina per oteni la carta de embarca, pasa la esamina de securia e traversa la duana sin difisiles. Oservante la pasajores ci parla linguas diversa, me ia deveni consensa de la via cual me ia traversa de la comensa.

Sortinte de la airoporto, me ia vide ce la pluve cade. A acel momento, tota sirca me ia pare nonreal. Pos multe anios, en 2022, me ia retrova la senti, cuando me ia senta en silentia en un avion, ensircada par studiantes xines riente e babelante, ci ia es partinte ance per sua studias en London.

Pos entra en la bus, me ia oserva la site pasante tra la fenetra. Me ia vide autos sirculinte, persones paseante, sinias de via scriveda en engles, e casas con aspetas esotica de cual la jardines ia es sin eseta ornada par flores colorosa. La sola vista de esta flores tan bon curada ia basta per pone me en un bon state de mente.

Esta vista nova ia fa ce me oblida mea problemes e ansias. Lo ia revive mea cor aturdida, cual ia es tra un tempo longa compresada par la pesa de la realia, e ia reativi en me un fida vera de vive.

Me ia pasa cuatro semanas en England. En la semanas du e tre, me ia abita en Cambridge e ia partisipa seminarios donada par profesores local, tota plen de bon umor. La detalias, me confesa, evade me oji. Ma la babelas bonvolente, la atmosfera destensada, e la cortesia e amablia de la instruores, tota esta cosas ia lasa un impresa durante en me.

Cambridge es vera un loca ideal per studia. On encontra ala studiantes briliante e profesores eselente, de ci la influe permete gania conoses valuosa. Cuanto joia me ta senti, si me ta ave la onora de studia ala.

Ma lo no ia es la caso. Me no ia pote resta ala, car me ia es sola un viajor ci ia abita ala en poca dias. Me ia pote sola crea bon memorias de lo.

Me ia comprende alora ce un bon universia no es definida sola par la eselentia de sua ambiente de studia, ma ance par sua abridia e la asentia de tota forma de discrimina.

En la biblioteca de Warwick, me ia vide grupos de studiantes, sentante sur sejas colorosa, babelante con bon umor. Natural, on ia ave studiantes xines ala. Me ia senti alora, me confesa, alga jelosia a los. Sua comforta, sua rie, tota acel cosas ia pare parteni a un otra mundo de cual me ia es escluida. Pos multe anios, cuando me ia scrive mea tese en la biblioteca universial en London, me ia encontra un grupo de studiantes xines, ci ia pare fante un viaja de studia ala, como me ia fa en la pasada. Oservante los, me ia ave la impresa strana de vide me mesma tra los, ci, con la mesma regarda de curiosia, ia ave la mesma desira de comprende la mundo esterna.

Vadente en la stradas, on ia vide frecuente cantores o musicistes juante un strumento, atraente multe regardores. Sur un plaza en Bath, un grupo ia jua la gitar e ia canta, e mea acompaniores de viaja e me mesma, en junta con persones local, ia senta sur la bancas visina per regarda sua performa. La clima ia es plasente e la sol ia brilia sur la tera. Avias ia veni de tempo a tempo per pica la migas de pan cual on ia jeta a la tera, e an cuando on ia prosimi a los, los no ia vola a via.

A la momento de mea parti, me ia senti un teme profonda ce mea vive va gida me a no loca. Me ia teme ce me va reali no cosa en mea studias e, pos acel, vide mea vive cadente en nonativia.

An tal, esta viaja ia ofre a me la oportun de conose plu bon me mesma e ia velia en me la desira ardente de studia estra la pais. Pos es asetada a la universia posgraduada en 2019, me ia reveni per la ves ultima a la universia pregraduada. Lo ia es en esta visita final ce me ia ave un conversa multe inspirante con la secretor de la scola.

“Lodas! Ante dias, me ia encontra un profesor de otra universia en la mesma vila. Ela ia confesa a me ce nun de sua studiantes ia es entrada a la Universia Posgraduada. Me ia dise alora a ela ce mea studiante ia es sufisinte capas per es asetada.”

Me ia grasia ela per esta comenta.

– Dise a me, per favore, esce tu ia pensa a lo cual tu va fa pos tua studias posgraduada?

– No ancora. Posible traduor en un casa de publici. O posible instruor en un liseo. Me no sabe. Me va vide. On ave sempre la eleje.

– E esce tu ia pensa studia estra la pais par un suveni per studia?

– Un suveni per studia? Lo es multe difisil per oteni.

Ela ia mostra alora a me la paje ueb de la suveni sur sua telefon e ia dise a me: “En realia, lo no es tan difisil como tu crede.”

Lo cual ia aveni pos acel, vos sabe ja lo.

Me recorda ancora la 15 de junio 2022. Asta acel dia, me ia reali ja susedes diversa en mea studias. La informa la plu bon es sin duta mea susede en la concurso per la suveni. A la mesma sera, mea coabitores ia organiza un come per selebra la oteni de nosa diplomas posgraduada. Entre la platos de bon sabor e la bevidas, me ia reseta parolas zelosa de felisi. Felis, me ia resta an tal con mente clar e sempre pronto per parti.

La vive, cual ia pare staniante tra un tempo longa, ia comensa final cambia. A la min, lo es lo cual me ia crede a acel momento.

A la dia prima de mea abita en London, me ia revisita la locas turiste cual me ia descovre en 2018. Sentante a la borda de la rio Thames, caresada par la venta fresca, me ia pensa sin sesa a la pasada.

Pos tan multe tempo perdeda, final la realia.

Un senti de susede…

Natural.

E ance lo de la efemeras.