Capitol 5

Cuando me ia reveni a mea casa per la vacanse de estate en 2025, me ia visita la tombas de mea avo e mea tio madral. La contrasta entre la du locas de reposa es asustante e turbante.

La tomba de mea avo es situada en la semetero publica en la suburbe, ensircada par arbores verde e isolida de la ruido de la mundo. Mea ava dise a me ce mea jenitores ia eleje lo con cura a la comensa de marto 2023. A acel momento, mea avo ia es ancora en leto, ma sua dias ia es contada. La semetero es bon mantenida; an si lo no es lusosa, lo espresa un calmia serta.

A contrasta, la tomba de mea tio pare spesial modesta. Lo es situada en un semetero desordinada a lado de la via, do on escuta frecuente la claxones e la colpas de palos de la construeria visina. Mea padre dise a me ce, orijinal, esta loca no ia es considerada como un semetero vera, ma sola un tera dejetada e nonatendeda. Cuando el ia visita lo a la ves prima, la erbas savaje ia crese entre la tumulos. La semetero de acel tempo ia pare como un tomba coletiva.

Notable, mea tio, en sua vive, ia es multe jenerosa: tota la membros de la familia ia profita de sua aida e sua bonvole. Final, el ia es enterada sin dinia en un loca privada de pas. La xineses valua la idea de “reposa en pas su la tera”, ma en sua loca de dormi final, an la calmia es un luso.

Mea ava dise frecuente a me: “Tua avo no ia conose multe dias de felisia en sua vive. Tua tio madral ia es multe plu capas ca tua avo; sin un maladia sever, el no ta ave un tal fini.”

Me comparti esta senti.

En sua autobiografia, mea avo ia resoma sua vive en cuatro periodos: “Un enfantia plen de turba”, “Un adolese trapida en difisiles”, “Un jovenia de labora forte” e “Un eda matur cuando me releva mea testa con dinia”.

Mea avo ia nase en 1940 en un familia rica. Como diseda par el mesma, “an si me no ia ave difisiles grande, me ia esperia la altas e basas de la mundo.”

Seguente el, en sua enfantia, par causa de la conflitas militar e la descrese de la fortuna familial, el ia es constante forsada a migra e ia studia en scolas diversa. Tal, sua des anios prima ia pasa sin cosas notable.

Longo la raconta ofisial, la anio 1949 marca la “Libri” de tota la popla xines. En realia, per multe persones, esta anio ia es la comensa de un trajedia. La governa nova ia lansa un serie de moves political intendeda per elimina la tal nomida “fortes restante de la sosia vea”: la strutures sosial esistente ia es intera rompeda, la ideolojias ia es sistemosa remodelida, e la economia ia entra a un prosede de nasionali, en cual tota propria privata ia es colieda. La Stato ia declara ce Xina ia prepara se per avansa con pasos grande a la utopia comuniste.

En 1950, mea avo ta debe selebra joiosa sua aniversario des. A contra, la reformi de tera ia ave un efeto ruinante sur sua familia: el ia es clasida entre la “elementos de la Cuatro Categorias” e an forsada a partisipa reunis reservada per acel grupos. ¹

En 1953, sua jenitores ia divorsa, e mea avo e sua madre ia resta sola, dependente la un de la otra. A cada matina, sua madre ia transporta “tortas de soia” per vende los en un mercato peti a cuatro cilometres de sua casa, ganiante sola des o dudes desimes per dia per sua studias.

Seguente mea ava, mea avo, alora un joven, ia es cargada con laboras pesosa, como la repara de escavas e la transporta de tera, probable par causa de sua “orijina political” desfavorable.

En la estate de 1954, un deluvia grande ia invade sua vila de nase. Sua madre ia debe abandona sua comersia peti de tortas de soia e, con un grupo de bon persones de la familia visina, ia comensa la “prosede de ris” en casa. Ela ia es paiada sola con un cuantia peti de ris refinada. A acel momento, mea avo ia debe interompe sua studias tra ses menses.

Tarda en 1954, con la suporta de sua tio madral, el ia entra en la scola prima. El ia oteni sua diploma en 1955 e ia es entrada a la scola media. Sua padre ia promete alora un paia mensal de des yuanes per sua custas de vive. Regretable, car sua padre ia es clasida como un “ultra-destriste” en 1957, la paia per mea avo ia para, e el ia vole abandona la scola.

Desperante, sua madre ia demanda sua tio per interveni. El ia insiste forte ce mea avo debe continua sua studias. Per suporta el, la tio ia dona a sua madre la stofa de coton texeda par sua sposa, afin ela ia pote vende lo per la paia de la instrui de mea avo.

En maio 1957, mea avo ia pone sete yuanes, sua spende mensal, en la pox de sua jaca. Malfortunosa, la soma ia es furada.

Mea avo ia colasa en un sola note. El ia abandona la idea de studia, ia demanda per un vacanse de sua instruor e ia reveni a casa. Sua madre, pos suplica el sin sesa, ia acompania el par barco a la scola. Ma el no ia ave plu la cor per studia: el ia fali la esaminas a la fini de sua anio scolal e ia debe repete la clase. El ia nesesa cuatro anios per oteni sua diploma, en loca de tre como prevideda. Sua madre ia sufri ance un presa psicolojial e finansial enorme.

Fortunosa, mea avo ia susede oteni la diploma en 1959 e ia intende enscrive la liseo per entra a la universia plu tarda. An tal, par causa de la tal nomida “problemes political” de sua padre, el ia es forsada a abandona esta ideal. Donce, con un regrete grande, el ia scrive en la parte de “solisita” de sua “fix de graduada”: “la Scola Pedagojial”, do el ia es final asetada.

El ia fini sua tre anios de studia en la Scola Pedagojial e ia oteni sua diploma en julio 1962. En esta periodo, el ia esperia a multe veses la nonjustia par causa de sua “orijina political”. El ia es frecuente tratada con despeta e ia es cuasi escluida de la scola.

Pos sua gradua, mea avo ia es enviada a un vileta cual on ia nomi alora la “Sibir”, par causa de la manca de sereales e ance par sua propre desira de distanti se de sua familia. El ia resta ala tra dudes-ses anios.

Mea avo ia considera esta periodo como un de la plu felises de sua vive e ia nomi esta vileta sua “vila de nase numero du”. En sua vive, multe de sua studiantes, ci ia ave susedes en sua careras, ia visita el frecuente, lo cual ia fa a el un joia grande.

Con la recovre political de sua padre a la fini de la desenio de 1970, mea avo ia restora ance sua onora. En 1984, un membro de sua familia estendeda ia viaja a la vileta con la intende spesial de clari la “pasada political” de mea avo. Per el, pos tota la probas de sua jovenia, lo ia es final la momento de releva sua testa en la eda matur. La documentos de merita e la onoras ia comensa ariva en abunda. En otobre 2000, el ia jubila de labora.

Mea ava ia nase en 1941 e ia es la camerada de clase de mea avo en la Scola Pedagojial. En 1959, cuando ela ia comensa sua studias en la Scola Pedagojial, la instituida no ia ave an un program sistemosa. La instrui ia insiste la prinsipe de “labora como la considera xef”, e la studiantes ia debe partisipa laboras de cultiva. Ela ia es an enviada per labora en un fabrica de brices en la campania. Car la xicos de la clase ia es atendosa a la xicas, la labora pesosa no ia es jeneral donada a los. La forno de brices ia es situada a lado de la abitada de la instruores, ensircada par filos de fero. A alga dia, la filos ia rompe e la brices ia cade, cuasi causante un asidente.

En la periodo de la Avansa Grande a Ante, la comedas en la comeria poplal ia es servida sin custa, lo cual ia causa un perde enorme e an un consuma de la reservas. En la Famia Grande, la clase ia ave un cuota de sereales de sirca 16 cilogrames, ma par causa de la fura par la laborores de la comeria, cadun ia reseta en realia min ca 100 grames per cada come. Mea ava no ia es tro afetada par lo, car ela ia ave sempre un apetito peti.

En 1962, pos gradua, mea avis ia es enviada per labora en un vileta. Los ia sposi en janero 1964 en la scola prima local. La vileta de acel tempo ia es ancora isolida de la mundo esterna. A la momento de ariva, mea avo ia teni sua huqin (un strumento de musica xines con cordas), e mea ava, con capeles longa flotante, ia porta un falda. La abitantes de la loca, merveliada par esta vestes nonusual, no ia pote evita comenta: “Atores veni!”

Lor paia combinada ia es sola sesdes-oto yuanes per mense, con cual los ia debe suporta ses persones: mea avis, la madre de mea ava, e la tre enfantes. Mea ava ia cura cuasi sola tota la laboras de casa. Ela ia cultiva per se la vejetales e ia emplea un fem de la vileta per prepara la tre comes.

En 1969, la scola prima ia es desconstruida e la familia ia move a otra scola. La madre de mea avo ia veni per aida con la taxes de casa. La dirijor de la scola, un relatada, ia cura multe bon la familia.

Los ia abita en du salas peti. Un sala ia servi como la abitada per mea avo, la enfantes e la duava. Esta mesma sala ia conteni la forno do on ia coce con lenio. Cuando la caldia ia es intensa, la aira ia deveni sofocante e nonrespirable.

Con la aproba de la scola, la familia ia construi un cosina simple en la coredor esterna. Pos esta cosina on ia ave un lago peti do mea avo ia pexa en sua tempo libre.

La vive ia continua sua curso, e la taxes de casa ia es fada xef par la duava, ci ia ave alora sirca sesdes anios. A cada dia, ela ia compra vejetales, ia prepara la comedas e ia vade per estrae acua, sin reposa.

En 1989, la familia ia reveni a sua vila de nase. Con grasias a la coraji e la maneja cauta de mea ava, la familia ia reserva mone per construi un casa peti de du niveles. Mea avo ia scrive en sua autobiografia: “A acel momento, mea familia ia deveni un familia vera.”

En la anios final de mea avo, mea ava ia cura el a cada dia. El ia pone frecuente la pasientia de mea ava a un proba dur par causa de sua carater coleriosa e ostinante, ma el ia espresa a ela ance sua grasias e escusas.

En sua autobiografia, el ia scrive con emosia: “Mea sposa, nos vive en junta tra plu ca sincodes anios. Mea natur, mea modo de vive, esce tu no conose ancora los? Pardona me. Esce nos pote pasa ancora plu ca sincodes anios en junta? Ta ce nos comprende la un la otra, junta nosa manos e vive con joia asta la fini de nosa dias!”

Seguente mea ava, poca ante sua mori, mea avo ia confida a el: “Vive en junta con tu asta plu ca otodes anios es ja un felisia grande. Tu ia labora tan multe.”

Pos la mori de mea avo, mea ava ia ave du sonias.

A la ves prima, ela ia sonia un jardin de flores do mea avo, sentante en un vineria, come talietas. Pos sua velia, ela ia raconta esta sonia a sua visina, ci ia comenta: “Lo pare ce tua sposo vive bon en la loca do el es.”

A la ves du, ela ia vide ce la avo abri la fenetra e recorda a ela: “Lo pluve. Clui bon la fenetra.” Ante cuando mea ava ia ave la tempo per leva se de la leto, mea avo ia desapare ja en la nebla e la pluve. En esta du sonias, ela ia vide sola un silueta neblosa.

Como la poca parolas scriveda en la libros de istoria pote esplica plen acel epoca?

La declaras merveliosa de “ateni e pasa la Rena Unida e la Statos Unida” e la tempestas political de “oposa a la revisisme ² de la Uni Soviet e la imperalisme esuan” es, a la fini, sola naras de la Stato. Esta no es la istoria de mea familia.

Ma la Famia Grande, la move contra la destristes, e la turba de la Revolui Cultural ia trae la familia en la tempestas de la tempo. Estas es la cursos de vive de la persones comun, puiada a ante par la corentes de la epocas grande, do sua joias e sufris es miscada per desinia la istoria vera.