Capitol 2

En 2020, Xina ia selebra la fini de la construi de un sosia de ricia moderada. La sosia de ricia moderada es la fas vidable de Xina, en cuando la miliones de persones ci luta per survive representa sua realia profonda. Sur la via de la developa de Xina, la raconta ofisial asentua sempre la progresa, la modernia e la ricia, ma la sicatrises de la istoria e la divides de la presente es puiada a la bordas de la raconta. Insiste la avenis traumante de la pasada nasional e la contradises de la presente pare frecuente un preocupa nonoportun, car la esense de la “progresa nasional” es sempre regarda a ante. Donce, la istoria de la povria e de la sudevelopa es marcada como un “regresa” e desapareda en modo cauta en la polvo de la tempo.

En mea studias de istoria en la scola media, parlante de la Famia Grande e la Revolui Cultural, la instruor ia fa un comenta pensosa: “Pico a pico, la libros de istoria futur va redui la mensiona de esta avenis.” Sua tono ia es multe calma, como si ela ia dise sola un fato. En la raconta ofisial, alga episodios, considerada como notas nonarmoniosa, es destinada a deveni oblidable en la simfonia de la progresa nasional.

En mea enfantia, un aveni pasada ia sirculi en mea familia: mea duavo, un inteletosa de la eda republical, ia es prisonida en la desenio de 1950, en la move political contra la destristes. Lo ia es la sola istoria familial cual me ia conose; ultra lo, tota ia es un vacua.

Me ia pensa nunca scrive la istoria de mea familia, e mea familia ia resta ance muda sur la pasada. Aora, scrivente esta libro e evocante la silentia cual ia rena en mea familia, me atenta comprende perce la silentia es nosa responde a la istoria. En sua autobiografia familial Strangers on a Pier: Portrait of a Family (Stranjeres sur un Molo: Portrae de un Familia), la scrivor malaisian de orijina xines Tash Aw recorda ce sua padre ia dise a el ce on vergonia regardante a retro. El razona bon: ci ta vole evoca un pasada plen de povria e de sufri? Abandona la pasada e luta per un vive plu bon e rica pare es la eleje la plu razonal.

A contra, me crede ce on ave un otra razona per esta.

En la Xina de oji, la potia de interprete la istoria es cuasi monopolida par la autorias. Avenis como la Salta Grande a Ante, la Famia Grande e la Revolui Cultural es considerada como memorias cual on prefere lasa a retro. Lo pare ce la metodo de survive es oblida, en un acorda con la autorias.

An tal, me crede ce cada xines porta en se un istoria cual merita es racontada, an si tota no ave la posible per espresa sua vose.

Me no vole oblida la istoria.

Me refusa es silentida.

Me vole esplica me mesma.

En la ueste, la xineses es frecuente reduida a du stereotipos: o la individuas silente e cauta, o la macinas de labora, moveda sola par la profita. Me ia encontra en la club de esperanto de London un fem ci ia demanda con un tono surprendeda, aprendente ce me es xines: “Esce tota la xineses no ama gania mone?”

Sua tono stonada ia lasa me sin parolas. Me ia persepi ce tan multe persones en la ueste no vide nosa joias e lutas, e no escuta nosa discutes de ideas.

Me debe esplica me mesma. Car la silentia nuri la prejudis.

Si me mesma no prende la parla, nun va fa lo per mea benefica, e me va dona mea acorda de silentia afin otras parla en mea nom.

Me debe pone a la lus la episodios de istoria ascondeda par la raconta ofisial.

Esta nesesa ia deveni plu e plu presante en mea viajas estra la pais, do la respeta e la cura donada a sua propre istoria ia lasa un impresa profonda a me. A mea ariva a un universia brites, me ia es surprendeda par la presentia, a la media de la construis de instrui moderna, de un semetero iudi de orijina espaniol e portuges construida en la sentenio 18. La tombas, veida par la tempo, porta la enscrives de la vives de esta migrantes, en cuando un table de informa prosima raconta como London ia proteje esta almas vagante.

La istoria no es composada sola par la glorias pasada. Han Kang, la scrivor corean e laurida de la premio Nobel de leteratur de 2024, ia trae denova a la oios publica la maio sanguosa de Gwangju en 1980 par sua novela La Xico Reveni (소년이 온다). ¹ Me ia vide pos acel filmas pertinente, como 18 Maio (화려한 휴가), Taxiste (택시운전사) e Escavador (포크레인). Cada de sua imajes pare demanda a me: como nos debe fronti la sicatrises istorial? Esce regarda la futur implica nesesada oblida la pasada?

Esce la pasada es vera sola la pasada?

La xineses tende consentra plu sur la istoria distante. La selebra anial de la gera contra la niones, la sinco mil anios de la sivilia xines e la sentenio de desonora (1840-1949) racontada sin sesa en la libros de istoria constitui nosa raconta istorial la plu conoseda.

A contra, cuando me turna mea regarda a la istoria plu resente, mea memoria deveni neblosa. La libros de scola evade sempre la periodo pos 1949, e la detalias istorial, tan pertinente per la vives de mea asendentes, deveni fratida en la raconta ofisial.

Cual ia es la contesto istorial cual mea duavo ia fronti? Cual cambias sosial mea padre ia traversa? Esta memorias, cual ta debe constitui la funda de mea identia, deveni difisil per saisi.

Lo cual flue en mea venas es la istoria nonfinida de mea asendentes.

Mea scriveda no es sola un confesa personal, ma un responde a la voses silentida. Como Tash Aw e Han Kang, me scrive afin mea asendentes no mori a un plu ves en la oblida.

Sua istoria es mea orijina.

De do me veni?

Me veni de mea asendentes.