IX

La re de Ham ia parla con sua jenerales: “Nos ia securi tota la fronteras este, sude e norde, ma nos pote ancora estende plu a la ueste.”

“A la ueste on ave no otra cosa ca jungla,” Nhan Ghun Phen ia responde. “No popla pote abita ala e lo es un ostaculo natural contra invadores.”

“Esce on sabe ci abita pos la jungla?” la re ia demanda.

“On ave no informa en la libros de la biblioteca reial e no informa de la armada,” Nhan Ghun Phen ia ajunta. “Me crede ce on pote prima envia spiores e, a pos, comensa avansa con la armada tra la bosces, desforesti un zona e construi un forteria per la avansa de la soldatos. Tal, pico e pico, nos va pote conose la teritorio e vide esce on ave alga popla abitante en la jungla.”

“Bon, me crede ce lo es un bon idea,” la re ia responde. “Ta ce lo es fada tal.”

“Grasias, mea re,” Nhan Ghun Phen ia ajunta, e el ia sorti de la salon reial.

La soldatos de la armada de la rena Ham ia comensa avansa pico e pico tra la jungla e, pos avansa per cuatro dias, los ia comensa desforesti un area de la jungla per construi forterias. Aceles ia es fada con la lenio de la arbores desforestida, e la regula ia es ce on avansa per cuatro dias e desforesti la area per construi forterias nova. Pos fa esta a tre veses, los ia ariva a la rio.

“Envia un mesajor a la re,” Nhan Ghun Phen ia dise a sua aidor, “e dise a el ce nos ia trova un rio. Nos va segue la corente a sude, en dirije a la mar, per sabe do lo vade e esce on ave otra poplas ala.”

“Si, mea comandor,” sua aidor ia dise.

Pos des-du dias, la aidor ia ariva a la palasio reial con la novas, e la re ia responde: “Me dona tota la potia a Nhan Ghun Phen per deside como fa en sua esploras, car on no pote espeta ce la mesajes ariva a la palasio pos la pasa de du semanas. Dise a el ce el pote deside, e ce el debe envia mesajores per informa me cual es aveninte, ma no per demanda per mea permete per avansa.”

La mesajor ia porta un tal mesaje con se asta Nhan Ghun Phen, ci, en cuando esta ia aveni, ia prepara ja un flotila peti per vade a sude, e el ia construi plu forterias sur la riva de la rio.

“Bon,” Nhan Ghun Phen ia dise a sua soldatos, “aora nos va lasa alga soldatos en la forteria e la resta va vade con me tra la rio, seguente la corente en dirije a la mar, per vide cual nos pote trova en nosa via. Tota debe es estrema cauta, car on no sabe esce otra poplas abita sur la rivas de la rio, e los ta pote ataca nos.”

Pos esta parla, la soldatos ia asende a la canoas e los ia comensa segue la corente de la rio. Pos alga dias, los ia ariva a la forci a cual Rancur ia veni ja en la migra de la popla de Cantijangi.

“Si nos continua reta, nos va vade a la mar, ma esta otra estende de la rio pote porta a alga otra loca, con poplas abitante ala,” Nhan Ghun Phen ia pensa. “An tal, tota la teritorio entre la du brasos de la rio es probable nonocupada, e nos ta debe crea forterias con grupos de soldatos per securi acel teras per nosa rena.”

“Bon, on va construi un forteria en esta loca, esata en la forci de la rio,” la comandor xef ia dise a sua arcitetor. “On va lasa alga soldatos e la resta va reveni per parla con la re, car on debe prepara un stratejia per concista esta teras.”

Tal lo ia es fada e, pos plu ca un mense, Nhan Ghun Phen ia reveni a la palasio de la re de Ham per parla sur lo cual el ia vide e ia fa en sua esploras.

---

Rancur ia continua avansa con sua soldatos tra la jungla, creante viletas fortida a cada tre dias de avansa, per proba coloni acel loca. Los ia trova no otra sivilia, no otra popla, no otra site en acel loca.

“Lo es bon,” Rancur ia dise, “ce nos es asi solitar. Tal nos va pote continua crese e vive sin ave problemes o geras con otras. La vive en pas es bon per un popla ci ia secute se de sua cadenas de sclavia pos tan multe anios.”

Pos avansa tra alga semanas, el ia trova la riva de la otra braso de la rio. Lo ia es multe oscur, e el ia pote vide un forteria, con foco fada par la soldatos per prepara la comeda.

“Ci pote es acel soldatos? Esce on ave un otra rena asi?” Rancur ia demanda a se.

Ma el ia clari sua dutas cuando el ia regarda la bandera cual ia es en la alta de la forteria: “La rena Ham!” el ia pensa. “Los ia ariva asi. Esta sinifia ce esta es la otra braso de la rio e ce probable los ia estende sua rena asta asi. Si esta es vera, los va trova nosa site. Cisa los ia segue la corente de la rio e los ia trova ja la forci, cual sinifia ce, en poca tempo, los va pote trova nosa site. Par esta, nos debe coloni la teras entre ambos brasos de la rio e crea un sistem de sites e forterias per gania teras ante un gera contra la rena Ham car, a esta ves, nos no va perde nosa rena.”

Rancur ia comensa reveni. La vileta prima cual el ia fundi, Jangicanti, ta deveni la loca ultima de sua rena, un loca de frontera. Par esta, el ia construi un fortres ala. Pos tre dias, el ia ariva a la loca do el ia construi la forteria Cangijanti. Pos tre plu dias, el ia ariva a Gijancanti, cual ia es ance construida e fortida. E pos tre plu, el ia traversa la pontes cual ia gida a sua capital, Cantijangi. El ia vade direta a la palasio, do la rea Txamadevi ia es governante en sua asentia.

“Mea ama,” el ia dise cuando Rancur ia entra en la salon reial. “Como lo ia vade en tua esploras?”

“Me ia ariva a la otra lado de la rio pos des-du dias de esplora. Ma sur la otra riva de la braso du de la rio, me ia vide un forteria con la bandera de la rena Ham.”

“Cual? Lo no pote es vera!” Txamadevi ia cria. “Esce los ia ariva asta la rio? Me no pote crede lo cual la re de Ham es fante. Esce el vole concista tota la mundo? Esce nos no va pote vive en pas?”

“No coleri,” Rancur ia dise a el, “car me ave un desinia per prepara nos contra la gera cual va aveni entre nosa du renas.”

---

Nhan Ghun Phen, comandor xef de la armada de Ham ia ariva a la palasio reial e ia vade direta a la salon do la re ia es.

“Mea re, on nesesa plu soldatos per comensa labora tan pronto como posible,” el ia dise. “On ave nun en acel jungla e nos debe comensa construi sites fortida.”

“Si on ave nun en la jungla, perce on debe labora con rapidia?” la re ia demanda.

“Car me ia ariva a la riva de la rio (do me ia construi un forteria), e sur la otra riva on ave plu teras. Me ia segue la corente de la rio asta ariva a un forci, e me ia construi un fortres ala, ma me no sabe esce on ave otra poplas en la otra braso de la rio, e si los es ala, ultima los va traversa la jungla e va trova nosa forteria o los va ariva a la forci e va trova nosa fortres. Nos sabe ce on pote ave alga popla ala, e si on pote ataca par surprende, nos va pote concista rapida acel teras e estende la rena Ham ultra la rio.”

“Par esta causa tu es la comandor xef de la armada de Ham, par tua intelijentia en la gera,” la re ia dise.

“Grasias, mea re,” Nhan Ghun Phen ia dise.

“Si vos trova alga popla o alga site, e los vole resiste nosa potia,” la re ia dise, “destrui los.”

“Si, mea re, me va fa tal,” Nhan Ghun Phen ia responde.

---

La armada de Rancur ia comensa construi un flotila, per vade a la forci de la rio e construi tal un fortres e un porto afin los pote controla la entra de barcos enemin. Ance, Rancur ia comensa envia plu soldatos a la fortreses en la jungla entre la du brasos de la rio, per prepara los per la gera.

El ia comensa abri vias en la jungla entre la fortreses diversa per fasili la envia de soldatos entre un fortres e un otra. Car el no ia vole ce la enemis conose sua presentia, el no ia construi un fortres sur la riva de la rio, ma el ia lasa spiores en locas de do los ia pote vide cual la enemis fa, sin es videda.

Ambos armadas ia es preparada per la gera e, car nun ia vole pas – la un car sua rena ia vole estende plu e plu, e la otra car el no ia vole deveni denova sclavo – sola la gera ia pote solve la situa.