VIII

La barcos vade rapida en la rio
O Cantijangi, nos dise a tu: Adio!
Nosa popla va recorda esta anio
en cual nos vade a esclui,
un propre pais nova nos va construi,
acel vive de sclavia, o si! nos conclui.
Los arde ja, la cadenas,
nunca nos va ajena,
nos fini ja la condena.
Adio, Cantijangi, adio,
nos va construi un site nova,
Adio, Cantijangi, adio,
tu ia arde, nos lasa tu sola.

Tal es la canta cual la popla de Cantijangi ia canta en avansa longo la rio, en dirije a la rena vea de Haripuñjaya.

“Esce tu recorda como tu ia naviga asta ariva a Haripuñjaya?” Txamadevi ia demanda a Rancur.

“No, me ia es nonconsensa,” Rancur ia responde. “Ma no teme, car me sabe ce nos va trova la via coreta, car nosa dio va aida nos.”

“Me espera tal,” Txamadevi ia dise. “Ma tu debe recorda ce mea rena no esiste plu.”

“Tua rena es Cantijangi,” Rancur ia responde.

“Cantijangi ia es ardeda.”

“Cantijangi es nos, Txamadevi,” Rancur ia dise, “no la mures cual ia garda nosa sclavia e nosa cadenas. Cantijangi es la popla, la persones ci ia es sclavos en acel site. Cantijangi vade sempre do nos vade. Cantijangi es nos.”

“Ta ce nosa dio aida nos a trova un loca nova per vive en libria,” Txamadevi ia dise.

“Ta ce lo aveni tal,” Rancur ia responde.

La jungla ia apare a ambos lados de la rio, e no cosa ia pote es videda tra acel spesia; an la raios de sol no ia pote crusa entre la folias de la arbores. La acuas, an si pur, no ia lasa ce on vide la fondo de la rio, e la popla de Cantijangi, ci ia es nunca un popla de navigores, ia teme perde se, pico e pico, en acel viaja. Cuando la note ia ariva, los ia segue la rio con torxas luminante la via. E tal la dias ia pasa, e tal la notes ia segue lunlotra; los ia vide la sol aparente e desaparente en la sielo, lasante a la luna acel rena de la altia. Asta cuando? Asta cuando la popla de Cantijangi va debe naviga? Nun ia sabe lo; an Rancur ia comensa teme per la futur de la suas, ma el ia dise no cosa; an de Txamadevi el ia asconde sua temes, car el ia sabe ce totas, totas sin eseta, ia ave lor esperas en el.

Pos alga semanas, comente la pexes cual los ia pote pexa, los ia ariva a un forci en la rio.

“Si on prende la via de la destra,” Txamadevi ia dise, “nos va vade a la loca do ia es la rena Haripuñjaya.”

“Do, on prende la via de la sinistra,” Rancur ia dise.

“E do nos va vade?” Txamadevi ia demanda.

“A nosa futur,” Rancur ia dise, e turnante se a la resta de la barcos, el ia cria:

“Nos vade a sinistra, totas segue mea barco!”

E tal, la prosegue de barcos ia turna a sinistra e ia continua sua viaja a la nonconoseda.

---

Alga semanas a pos

Pico e pico la popla intera de Cantijangi ia continua la curso de la rio en dirije a alga parte nonconoseda. Ma, en un matina, Rancur ia vide un isola grande en media de la rio, cual ia es ensircada par du brasos no multe grande de la rio. On ia ave no cosa sur acel isola, ma el ia vide como un corvo ia vola de la jungla e ia posa se sur acel isola. El ia estende sua alas e ia comensa abaia, regardante Rancur direta en la oculos.

“Esta es la loca,” Rancur ia cria a la cantijangianes.

“Asi?” un om ia dise. “Esta es un isola en media de la rio, e nos no sabe cual es en la jungla, o plu distante longo la rio.”

“Nos sabe ce on ave no cosa en la via asta asi, e nos naviga ja tra alga semanas,” Rancur ia responde. “Per sabe cual es en la jungla o plu distante longo la rio, on va descovre esta plu tarda, ma aora nos debe comensa construi un site asi,” Rancur ia dise.

La cantijangianes, joiosa per sabe ce sua peregrina ia fini, ia comensa desende de la barcos a la isola.

“La teras pote es produosa per cultiva,” un fem ia dise.

“Nos va debe construi murones per defende la site, e nos va debe aprende naviga e construi barcos plu bon,” Rancur ia dise. “Ma tota esta pote es fada par la cantijangianes, car nosa dio es con nos e nos ia survive sclavia e un viaja tra la nonconoseda.”

“Ta ce la re Rancur e la rena Txamadevi vive!” un om ia cria.

“Ta ce los vive!” la popla ia cria.

---

Alga anios a pos

Acel isola ia deveni un site, un belia noncredable, un miracle de arciteta, de urbanisme. On ia vide nunca un site tan multe bon arcitetida, e tota esta ia es con grasia a Txamadevi, ci mesma ia deside dirije la construi de un forma lojical, desiniada asta la detalia ultima.

Acuadutos e palasios ia covre la site; la dui de la vias ia es de acua, do la canoas ia es un media de transporta multe comun. La stradetas de entra a la site ia es cuatro: cadun en la dirije de la puntos cardinal; acel vias ia es de tera, mortero e arjila, e la cuatro ia conflue en la sentro de la site, do la templo ia es construida. Lo ia es tan multe alta e grande ce de tota la jungla lo ta pote es videda. Tal, la esplorores ia pote sempre sabe do dirije se si los ia perde se en sua esploras per conose la teritorio cual la site nova ia reclama per se. Par causa de la cualia de la solo, la cultiveria ia es multe produosa e esta ia aida a la developa de la popla, cual ia ateni 50 000 persones en poca jeneras. La plu cultivas ia es sur la terazas en la zona sude de la site.

Rancur ia ateni stablia en la site, e grasiante la fato ce no otra popla ia es prosima, los ia pote estende sua dominas sin geras. En alga desenios, la site ia developa distritos en la zonas de la jungla pos la rio, e la sitadanes ia developa un sosia fundida sur cultiveria (cual ia es posible par causa de la paramares, portones e pararios) e ia estende a zonas nova, con construidas de petra.

Tota ia pare es perfeta, e Rancur ia pare pote trova un loca secur per sua popla, do los va pote vive en pas. An tal, la rena de Ham ia segue sua estende e, en poca anios, ambos va encontra denova se.