X

Nun ia sabe cuando la dia triste de la comensa de acel gera va veni, ma lo ia aveni. La matina de acel dia ia ave un lus clar, con un sol cual no ia dona multe caldia, ma cual ia dona vidablia sufisinte a la armada de Nhan Ghun Phen. Lo ia es la leva de sol cuando sua soldatos ia traversa la rio asta ariva a la otra riva, e los ia comensa construi un forteria ala. A esta ves, la forteria ia es plu grande ca la otra sur la otra riva de la rio, afin los ia pote manteni un grupo plu grande de soldatos en acel loca. Pos alga dias, en cual la spiores de Rancur ia informa sur la moves de acel soldatos, la fortres ia es finida e grupos de soldatos ia es situada ala.

La spiores de Rancur ia envia la novas a Jangicanti, de do mesajores ia es enviada a la capital. Cuando Rancur ia reseta la nova, el ia prepara la armada: “La dia e la ora ia ariva en cual on debe luta per defende nosa libria e nosa vives. Oji Cantijangi no va es destruida, oji es la dia en cual nos va venja tota cual ia es fada a nos, oji es la dia cual on ia espeta pos tan multe tempo, oji on comensa la fini de la rena Ham.”

E, lasante Txamadevi governante e protejente la capital, el ia avansa con sua soldatos a Gijancanti, la site prima en dirije a la otra braso de la rio. Ala el ia resta per un note, e a pos el ia continua asta ariva a Cangijanti. A la dia pos ariva, un mesajor enviada de la fortres de Jangicanti ia anunsia ce la cuantia de soldatos ci ia traversa la rio es multe grande, e ce los ia comensa ja avansa en dirije a la fortres, con la comandor xef Nhan Ghun Phen gidante los.

“On va vide como es esta comandor xef de la armada de la rena Ham,” Rancur ia dise. E el ia deside continua en acel dia sua viaja asta ariva a Jangicanti, a esata un dia ante ce la armada de Nhan Ghun Phen ia descovre lo.

En acel matina, Nhan Ghun Phen ia trova la fortres e ia envia un soldato per parla. Nun ia responde, e Rancur ia apare en la alta de la fortres e ia dise a Nhan Ghun Phen: “Comandor de la armada de Ham, me es Rancur, re de Cantijangi, sposo de Txamadevi, fia de la re Yip e eritor de la trono de la rena Haripuñjaya, cual tua re ia concista a alga anios ante aora. Esta teras entre la du brasos de la rio parteni a la rena Cantijangi e me consela ce tu retira tu a la otra riva de la rio e ce on lasa acel braso de acua como frontera de ambos renas.”

Nhan Ghun Phen, reconosente Rancur, ia dise: “O, difisil es fini con pestes como tu, Rancur, sclavo de Cantijangi. Tu e la tuas ia arde vosa site e vos ia deside fuji a la junglas do vos ia crede ce nunca vos va es trovada par la rena Ham. Esce tu crede ce nos teme un armada de sclavos? Si tu no vole mori, me consela tu a abandona tua fortres e fini tua dias como tu ia comensa los, esente un sclavo de la re de Ham. Me es Nhan Ghun Phen, comandor xef de la armada de la rena Ham e me comanda ce tu sede.”

Rancur ia sputa e ia dise: “Ta ce la rena Ham es destruida par nosa manos, per tota cual lo ia fa a nosa popla. Nos no va sede, nos no va dona an un sentimetre de tera a acel rena cual no conose contentia, cual vole sola estende sua potia de autoria e autocratia tra la mundo, asasinante poplas, destruinte cultures, sclavinte persones. No, Nhan Ghun Phen, comandor de la armada reial, nos no teme tua soldatos; nos teme no cosa.”

“Tu ia deside mori oji,” Nhan Ghun Phen ia dise. E el ia reveni a sua soldatos e ia comanda ce los comensa ataca la mures de la fortres, lansante petras con foco par lansapetras peti (car los no ia pote trae armas plu grande a acel loca).

Tra un dia completa la mures ia resiste, ma poca petras ia es trovable en la jungla, e par esta causa la mures no ia pote resiste multe. La armada de Ham ia ataca, ma ia es salutada par lansas e petras peti, lansada de fondetas par la soldatos de Rancur.

Desirante fini la vive de acel sclavo, Nhan Ghun Phen ia speroni sua cavalo e, traversante la restas de la mures, ia lansa se a la media de la batalia, taliante con sua spada tan multe persones como el ia pote. Ma Rancur no ia es min corajosa, e el ia fa la mesma sur sua cavalo. La du omes ia encontra se, prosima a la mures destruida.

“Esta va es tua batalia ultima, sclavo,” Nhan Ghun Phen ia cria. “Lasa la armas e aseta tua futur.”

“Si tu vole mea armas, veni e prende los!” Rancur ia dise.

Ambos ia leva sua lansas, e, speroninte sua propre cavalos, los ia comensa core la un en dirije a la otra. A! la xoca de la lansas contra la scermos ia fa un sona cual ia velia acel avias cual ia es ancora dorminte. La fortia con cual ambos ia ataca lunlotra ia cade la du omes a la solo. La lansas ia es rompeda, e ambos ia estrae sua spadas e, levante sua scermos, los ia comensa prosimi a lunlotra. Nhan Ghun Phen ia comensa core e, saltante, ia proba puxa la spada en la garga de sua enemi, entre la armur e la elmo, ma Rancur ia pote proteje se con la scermo. An tal, la colpa ia fa ce el cade a tera, e Nhan Ghun Phen ia profita per pedi el a la testa, lasante Rancur alga xocada par la colpa. Nhan Ghun Phen ia proba puxa sua spada, ma Rancur ia pote pedi sua tendon pos la jeno, e ance Nhan Ghun Phen ia cade a tera.

Rancur ia leva se e ia lasa ce sua enemi leva. Pos esta, ambos ia ataca lunlotra con la spadas e la scermos. Nhan Ghun Phen ia talia un de la sintas cual ia teni la armur de Rancur ci, vidente como sua proteje xef ia cade a solo, ia deside abandona la batalia, car la soldatos de la rena Ham ia comensa flexi el.

Tan fortunosa ia es Rancur, car no un sola flexa ia ateni sua corpo, e el e sua soldatos ia pote fuji a Cangijanti, do el ia deside espeta la armada de Nhan Ghun Phen en cuando el ia forti la fortres per evita la mesma problemes cual el ia ave en Jangicanti. El ia comanda an construi un foso pos la mures, per difisili a la soldatos de Nhan Ghun Phen la invade de la site.

En cuando el ia fa esta, Nhan Ghun Phen ia continua sua avansa longo la vias construida par Rancur per uni la fortreses diversa.

“Tan stupida es esta Rancur, ci ia dise a me do me debe vade per continua la concista de sua rena!” el ia dise en avansa, tra dia pos dia, en dirije a Cangijanti.

Pos tre dias el ia ariva, e ia comensa la aseja. An tal, Rancur ia pote arde alga de la fondas enemin e, par causa de la teras umida de acel jungla, sola du de los ia resta a Nhan Ghun Phen.

“Esce tu crede ce tu va pote evita lo cual es nonevitable?” el ia demanda a Rancur. “Con o sin mea fondas, me va pote destrui tua sites, pos lunlotra, e tota de vos va deveni lo cual vos ia es sempre: sclavos de la rena Ham.”

Rancur ia lansa un lansia en dirije a Nhan Ghun Phen, ma el no ia susede prosimi a el.

“Tu va nesesa alga plu ca un lansa per mata me, bastardo!” el ia dise.

La cavalores ia avansa en dirije a la mures de la site, e los ia comensa lansa sua flexas contra la defendores, ci ia responde en la mesma modo. La sielo ia es covreda par la cuantia de flexas cual ambos ia lansa, e multe mores ia es lasada sur la solo. Con la du fondas cual ia resta a se, Nhan Ghun Phen ia comensa lansa petras a un loca do la mur ia pare min dur, e pos alga tempo, el ia pote abri un buco do la cavalores ia pote entra. Ma esta ia es ja prevideda par Rancur, ci ia pone alga soldatos en acel loca de la mur, preparada per envia un pluve de flexas contra la cavalores. Los, seguente la instruis de Rancur, ia mata ance la cavalos, afin los reposa sur lunlotra e preveni ce otra enemis pote entra a la site. An tal, pos vide esta, Nhan Ghun Phen ia dirije sua fondas a un otra loca de la mures, e el ia pote abri ala un buco du, tra cual sua otra soldatos ia entra. Car esta no ia es prevideda par Rancur, el no ia ave multe soldatos en acel loca, e la enemis ia pote entra e ataca la lado sinistra de la defendes de Cangijanti.

Rancur, vidente ce la site no va pote resiste multe plu, ia comanda ce sua soldatos abandona lo, vadente direta a Gijancanti, la site ultima ante la capital. El ia envia un mesajor sur un de la cavalos ci el ia pote fura de la enemis per clari la situa a Txamadevi e dise ce lo es multe probable ce la capital va debe vide un luta final entre ambos armadas.

Triste e longa ia es la note en cual la soldatos de Rancur ia debe vade rapida a la site Gijancanti, la defende ultima contra la enemis.

---

Nhan Ghun Phen ia deside pausa per alga tempo en la ruinas de Cangijanti ante continua sua avansa a Gijancanti. Entre la soldatos de Rancur el ia pote catura un prisonida, ci, pos multe torturas, ia dise a el ce ancora du sites resta per concista: Gijancanti e la capital. En intercambia per sua vive, acel sclavo tradosa ia deside uni con la armada de Nhan Ghun Phen e gida el longo la via. El ia indica a Nhan Ghun Phen ce, en la forci de la rio, si el va segue el, el va trova la capital.

“Esta es un informa multe bon,” Nhan Ghun Phen ia dise. “Tal nos va pote ataca la capital e de la acua e de la tera.”

El ia envia un mesajor a la re de Ham, per demanda per plu soldatos e plu fondas per continua sua concista, e el ia comanda ce la soldatos sur la riva de la rio ta comensa construi un flotila per ataca la capital. Ance, el ia envia acel soldato tradosa con sua aidor afin los gida la flotila cuando los reseta sua mesaje.

“Ta ce la flotila espeta en la forteria cual nos ia construi en la forci de la rio,” el ia comanda.

---

Rancur ia parla con sua ofisior xef, Curjan.

“Me no sabe cual on pote fa per evita la destrui de Gijancanti, car los ave ancora du fondas con cual los pote destrui la mures de la site.”

“Lasa acel a me,” Curjan ia dise. “Me va vade con alga soldatos a la note e me va arde los. Tal los no va pote entra a la site.”

“Ta ce nosa dio aida tu, Curjan,” Rancur ia dise.

Curjan ia vade a la ruinas de Cangijanti, do Nhan Ghun Phen ia construi sua campa per espeta la ariva de soldatos nova e plu fondas. En acel note, Nhan Ghun Phen e sua soldatos ia es selebrante, car los ia crede ce la vinse parteni a los. Acel soldato tradosa ia dise la cuantia de omes cual resta a Rancur, e con acel cuantia, la sclavos va es multe rapida vinseda.

Profitante de lor distrae, Curjan ia divide sua soldatos en du grupos, e ambos ia vade do la fondas ia es lasada. Los ia lansa olio sur la macinas, e ia comensa arde los. La foco ia fa ce la soldatos enemin comensa vade a los, ma Curjan e sua soldatos ia ataca los, e un batalia ia developa en la ruinas de Cangijanti. A! cuanto corpos mor la soldatos de Curjan ia lasa sur la solo de Cangijanti! Cuanto soldatos enemin los ia pote mata! On pote vide la sidia de sangue cual la spadas de acel cantijangianes ia ave, car los ia fini lutante en un lago! Ma a fini, pos lunlotra, acel soldatos ia es flexida par la armada de Nhan Ghun Phen. An tal, los ia mori joiosa, sabente ce los ia arde la du fondas e ia porta a la otra vive multe soldatos enemin.

Ajenada, con cuatro flexas en sua dorso, sputante sangue de sua boca, Curjan ia vide como Nhan Ghun Phen prosimi a el con la spada en la mano.

“Bastardo! Regarda cual tu ia fa con la fondas e mea soldatos!” el ia cria.

Curjan ia pote sola sputa alga sangue a la fas de Nhan Ghun Phen, ci ia talia direta sua testa.