V

La re Jayamarvan, senior de la rena Ham, ia es con sua jenerales en la comanderia reial, con sua jeneral suprema Ken Tai Bren.

“La ora ia ariva en cual nos va estende la fronteras norde de la rena, concistante la rena Haripuñjaya,” la re ia dise.

“Acel rena es multe peti, senior,” Ken Tai Bren ia ajunta. “Nos va ave no problem per concista lo.”

“Me sabe lo,” la re ia ajunta. “Ma nos no debe es tro fidante. On sabe nunca cual ta pote aveni. Me va dona la comanda jeneral a Nhan Ghun Phen, car el conose ja la enemi. Me prefere ce tu continua la concistas en nosa fronteras este.”

“Como tu vole, mea re,” Ken Tai Bren ia responde.

De acel momento, Nhan Ghun Phen ia comensa prepara la armadas de la rena Ham per la concista de la rena Haripuñjaya, cual va aveni en tre menses.

---

Tre menses a pos

Acel note, Rancur no ia pote dormi. An si el ia es en sua propre salon en la palasio reial de la re Yip de Haripuñjaya, el no ia para sonia con sua popla, ancora sclavida. El ia senti ce el no merita la lusos cual el joia, car la suas no ia pote vive como persones, ma como animales en acel prison a cual la rena Ham ia cambia Cantijangi.

Subita, el ia senti ce algun es regardante el, de la oscuria de la porte de sua sala de dormi.

“Ci es ala?” Rancur ia dise, prendente sua spada.

“No teme, Rancur de Cantijangi,” Havam ia dise en cuando el ia prosimi a la lus cual entra tra la fenetra. “Lo es me, Havam.”

“Cual tu fa asi a esta oras?” Rancur ia dise.

“Me veni per velia tu e per dise ce tu debe prepara tu, car la gera va comensa oji, con la leva de la sol.”

“Cual?” Rancur ia dise sin comprende.

“Regarda tra la fenetra,” Havam ia dise.

Rancur ia fa esta e ia vide como, distante, un armada es prosiminte a la palasio de la re Yip. El ia pote reconose la banderas de la rena Ham.

“La rena Ham ia deside ataca nos,” Havam ia dise. “La ora de la batalia final ia ariva.”

“… Final?” Rancur ia demanda.

“Tu va comprende tota cuando la momento va ariva,” Havam ia dise.

Cuando Rancur ia es preparada, el ia sorti, gidada par Havam, estra la castel, do la soldatos de la armada reial de Haripuñjaya ia es preparada, en la ordina de batalia, per reseta la ataca de la invadores.

El ia pone se a lado de la re Yip, ci ia dise a el, cuieta: “Me grasia tu per tua vole de aida nos en esta batalia, ma tu debe sabe ce tota de nos sabe ce nos va perde lo. En alga momento, cuando nos no va pote fa plu, tu debe sorti de la batalia e vade a la palasio de la prinsesa Txamadevi, prende el e fuji, per salva asi algun membro de mea familia e crea tua dinastia propre, cisa, a esta ves, librinte tua rena de Cantijangi. Nos sabe ce la rena Haripuñjaya va fini oji, ma nos va proba mata tan multe soldatos enemin como nos pote. Asi los va ave min fortias cuando los va luta denova contra tu, cuando tu proba libri tua rena.”

Rancur ia dise no cosa. El no ia nesesa dise alga cosa, car tota ia es diseda.

La re Yip ia avansa sua cavalo e el ia comensa pasea ante la soldatos, disente: “Fios de Haripuñjaya, fidosa a la re Yip, oji la dia ariva cual ia es prediseda par nosa sajas. Nos sabe cual va es la resulta de esta batalia e, an tal, oji nos va luta asta cuando la scermos deveni rompeda, nos va luta asta cuando nosa lansas es destruida, nos va luta asta cuando nos ave no plu aira en nosa pulmones, asta cuando la ultima de la omes de Haripuñjaya no va pote move se, asta cuando la sangue de nosa enemis tinje la campos de nosa pais propre. Fios de Haripuñjaya, fidosa a la re Yip, esce oji la mano de la corajosas va trema? Esce oji va es la dia cuando nosa enemis vide teme en nosa oios? Esce on ave asi oji alga om ci va dise: ‘Me prefere survive e es regardada como coarde?’ Tota nos sabe la responde, car la parola ‘teme’ es nonconoseda entre nos. Donce, fios de Haripuñjaya, fidosa de la re Yip, ta ce la dios aida nos, e oji, cavali, cavali tan rapida como la ventas ci secute nosa teras cuando la tempo de la monson reveni. Oji nos va es la tempesta cual va mostra a la rena Ham cuanto multe nos ama nosa libria. Esta es la ultima cual vosa re demanda de vos: A ante, fios de Haripuñjaya!”

E la re ia speroni sua cavalo e ia lansa se contra la armada enemin, segueda par sua omes fidosa, e acompaniada par Rancur.

A! Cual on pote dise de acel batalia? Esce on ave parolas per parla sur tan multe eroisme? Do me va comensa nara la atas de acel omes anonim ci ia segue sua re asta la ora ultima de lor esistes? Ta ce la sielos garda en la memoria lor coraje! Me va nara sola lo cual Rancur ia fa, car lo es la ves prima cuando sua coraje ia es librida; lo es la ves prima en cual la eritor de la trono de Cantijangi comensa venja la vives en sclavia de sua popla, la moris de tota sua familia, la colpas de flajelo a la dorsos de la enfantes. En acel dia, la armada de Ham ia vide la furia e la coleria de un popla en la oios de sua re futur; en acel dia, la re de Ham, pos multe tempo, ia esperia un senti cual el no ia conose: teme.

Rapida, multe rapida, tal Rancur ia cavali entre la soldatos enemin, moiante la solo con la sangue de sua enemis. El ia envia multe vives a la otra mundo, el ia causa multe feris con sua spada en la armada enemin, ma on no pote fuji de la destina, e la ora ia ariva cuando el ia debe speroni sua cavalo en dirije a la castel de la prinsesa Txamadevi.

La castel ia es ardente, e pos mata alga soldatos enemin, el ia prende la prinsesa, levante el a sur la cavalo, e ambos ia fuji de la rena de Haripuñjaya.