VII

La comandor Nhan Ghun Phen ia ariva a la palasio de la re de Ham pos alga semanas.

“Me debe parla con la re, lo es multe importante,” el ia dise.

Pos alga minutos, el ia pote vade a la salon reial.

“Mea re, me veni de la site Cantijangi.”

“Esce acel site no es la site de sclavos cual nos ia concista a multe tempo ante aora?”

“Si, ma me es la sola survivor de la grupo de soldatos ci ia es ala.”

La fas de la re ia cambia sua color.

“Ma los ia es sclavos, sin armas, an sin espera – perce los ia deside rebela? Me recorda ce nos ia concista acel site a dudes anios ante aora e nunca, nunca on ia ave an un sola rebela.”

“Me no sabe lo, mea re. Lo cual me sabe es ce los ia veneni la soldatos e me ia survive car me no ia come la comeda cual los ia prepara.”

“Esta no es multe bon en esta momento, car me ave lutas en la bordas norde de la rena, ma me crede ce si on envia un grupo peti de soldatos, nos va pote concista fasil la site. Me va dona dusento soldatos a tu e si tu nesesa mata tota la abitores de Cantijangi, fa lo.”

“Si, mea re,” Nhan Ghun Phen ia responde.

“Vade tan pronto como posible,” la re ia dise, e Nhan Ghun Phen ia sorti de la salon reial per vade a la comanderia de la armada reial.

---

La popla de Cantijangi ia comensa ja forti la murones de la site, construi defendes nova e crea plu armas, e Rancur ia comensa instrui los sur tecnicas de gera e luta.

“Recorda esta parolas, popla de Cantijangi,” Rancur ia dise a los. “Plu bon mor ca sclavos!”

“Cantijangi libre!” la popla ia cria.

La prete Cantxajin ia sposi Rancur e Txamadevi, comensante un dinastia nova en la site Cantijangi.

“Ta ce nosa dio proteje vos, e dona a vos fortia per defende esta site e sua popla,” el ia dise.

---

Tre menses a pos

La armada de la re de Ham ia apare ante la murones de Cantijangi. La dusento omes ia es pico plu ca la cuantia de persones en la site.

La trompetas ia sona, veliante tota la mundo en acel site.

“Sclavos de Cantijangi,” Nhan Ghun Phen, la comandor de la armada ia dise, “si vos ama vose vives, sede a la armada reial de Ham e resta sclavos, como lo ia aveni con vosa asendentes.”

Rancur ia prende un lansa e ia lansa lo a la pedes de acel jeneral.

“Plu bon mor ca sclavos!” el ia cria.

“Bon, donce oji vos va mori!” Nhan Ghun Phen ia ajunta. E, con un sinial, alga canones ia apare ante la murones de Cantijangi, e pos alga oras de xuta, no un sola petra ia resta en los.

“Ma cual arma es acel cual la armada de Ham usa?” Txamadevi ia demanda a Rancur.

“Me no conose lo, ma esta no va fa ce me sede,” el ia responde.

La cantijangianes ia asende un plu nivel de la site e, de ala, los ia comensa lansa flexas a la armada e ia pote arde alga persones de lo, en junta a la elefantes cual los ia trae.

“Si nos va perde oji,” Rancur ia dise, “a la min nos va trae con nos la plu vives de nosa enemis.”

La soldatos de la armada de Ham ia comensa entra a la site, e los ia es salutada par petras lansada par fondetas, e par flexas e lansas. An tal, acel no ia pote fa multe contra la pistoles cual acel dusento omes ia porta con se.

“Asende un plu nivel!” Rancur ia dise a sua popla.

E los ia fa tal: la omes e femes de Cantijangi ia es lutante, unida, per salva sua site, per no deveni sclavos denova. La enfantes ia es lasada en la rio, pos la site, en barcos peti.

“Rancur, me no crede ce nos va survive!” Txamadevi ia dise.

“No es preocupada,” Rancur ia dise. “Tota de esta segue un scema.”

Alga cantijangianes ia mori, ma la plu ia survive cuando los ia ariva a la nivel ultima, a la mur de cual Rancur ia lansa se a alga anios pasada. De ala, los ia arde un via de olio cual ia crea un parador entre los e la armada enemin. Par causa de la niveles de la site, los no ia pote asende con sua canones, e pos tan multe xuta, la fusiles ia ave no plu baletas.

“Aora es la momento,” Rancur ia dise. E la cantijangianes ia comensa xuta sua flexas contra acel armada, ma sin multe susede, car los ia es nunca soldatos, e los no ia es multe tecnical capas.

“Totas a la acua!” Rancur ia dise. E la cuatro-des survivores ia fuji en la barcos pos lasa la site ardente.