XII

A la matina seguente, la trompetas ia velia el. De sua prison, el ia pote escuta la crias de la popla de Ham, ci ia pleni la sirco, e el ia pote escuta la vose de Jayamarvan: “Popla de Ham! Tra alga tempo vos ia escuta la novas de la revolta de sclavos de la site Cantijangi, ci ia atenta defia la potia de nosa rena Ham!”

La popla ia comensa cria contra acel sclavos e Jayamarvan ia leva la braso per indica ce los debe silenti. “Nos ia fini acel revolta ma on ave oji un invitada multe spesial. La ‘re de Cantijangi’ tal nomida, acel om ci ia osa defia nosa armadas e ci ia mata la comandor xef de nosa armadas, Nhan Ghun Phen.”

Denova la oservores ia comensa cria e insulta Rancur.

“Per favore,” Jayamarvan ia dise, “ta ce nos bonveni… Rancur, la ‘re de Cantijangi’.”

En acel momento, Rancur ia es puxada a en la stadion de la sirco. El ia pote vide cuanto persones acel construida pote conteni: 25 000 omes ia es ala, criante a el, lansante cosas contra el, desirante sua mori.

Rancur ia xerca Jayamarvan e, cuando el ia trova el, ia dise: “Re Jayamarvan de Ham, me vide ce tu trae me per diverti tua popla. Me demanda a tu, perce tu no desende asi per luta en un combate prosima contra me?”

La re Jayamarvan ia leva e ia responde: “Tu, sclavo? Ci tu crede ce tu es, si me debe susia me par luta contra tu?”

“Me es el ci ia luta contra la armada de Ham tra anios, ci ia resiste tua comandores e soldatos per multe tempo, la sola de tua enemis ci ia pote combate contra tota los,” Rancur ia responde. “Esce lo no ta es un onora si tu ta pote mata me par tua propre manos?” E, turnante a la persones ci ia es ala: “Esce vos no ta prefere vide como vosa re mata me en un combate, defendente la onora de la rena Ham?”

E tota persones ia comensa aclama, asetante la reto de Rancur.

Jayamarvan ia leva denova la braso e ia dise: “Bon, sclavo, mea popla es joiosa per vide ce tu, an en esta situa, ave ancora coraje per defia me. Me va proposa esta a tu: si tu pote survive la probas cual me ia prepara per tu, nos va luta, ambos.”

La popla ia aclama sua re e, levante ambos brasos, el ia dise: “Ta ce la probas comensa.”

En acel momento, un porta ia abri e du leones ia apare en la stadion.

“Como tu vole ce me luta, Jayamarvan?” Rancur ia cria. “La leones ave dentes e garas, ma cual cosa me ave?”

“Afin tu no pote dise ce la re de Ham no es pardonosa, asi tu ave un spada,” Jayamarvan ia dise, e el ia lansa sua spada a en la stadion. Rancur ia comensa core en dirije a lo, e la du leones ia ataca el. El ia susede ja prende la spada cuando un de los ia salta contra el e, turnante se e cadente con la dorso sur la solo e un leon supra el, el ia puxa la spada en la ventre de la animal, taliante lo. Mor, la corpo pesosa de la animal ia impedi ce Rancur move cuando la otra leon ataca el. Rancur ia move la leon mor contra la otra, e ia profita per vade a retro. La leon ia prosimi a el, e Rancur ia pedi la arena contra la animal. Profitante car la leon no ia pote vide tra alga secondos, el ia puxa la spada en la fronte de la bestia.

La omes ia comensa cria e aplaudi.

Pos alga minutos, Jayamarvan ia leva la braso per silenti los e ia dise: “Tu ia susede en la proba prima, e tu ia mostra tua coraje, cara Rancur. On va vide esce tu es tan multe fortunosa en la proba seguente.”

En acel momento, la portas ia abri e un tigre e un urso ia apare en la stadion. Rancur ia turna per defende se ma, en acel momento, seguente un comanda de Jayamarvan, un soldato ia flexi el en la spala. El ia cade a la solo, e la tigre ia salta contra el. El ia rola sur la solo, sin sabe ce el vade en dirije a la urso, ci ia ataca el. An tal, cuando la animal ia leva sur sua du pedes, Rancur ia talia un de sua jenos, fante ce la animal cade a solo e no pote move. La tigre ia salta contra el, e Rancur ia lansa arena con un mano a la oios de la animal, profitante per fisa la spada en sua garga.

La persones ia aplaudi e ia comensa cria, desirante ce la re Jayamarvan desende per luta contra acel om.

La re Jayamarvan ia leva sua braso denova, e totas ia silenti. “Tu ia susede en un otra proba, Rancur, mostrante a nos tua coraje e, como me ia dise, me va desende per luta contra tu en combate prosima.”

Tota omes ia leva de sua sejas e ia comensa aplaudi e aclama sua re. Pos poca minutos, Jayamarvan ia apare en la stadion, aclamada par totas.

El ia entra sur un cavalo, con un lansa e un scermo, con elmo e armur. No tal cosas ia es donada a Rancur.

“Esce tu crede ce esta luta es justa?” Rancur ia demanda el. “Me ave no cavalo, no lansa, no scermo e no elmo, e tu vole luta tal contra me?”

“Me ia dona a tu multe oportunes, Rancur, ma tu, como sclavo, continua demanda plu e plu. Es contente con lo cual tu ave,” Jayamarvan ia responde, e, speroninte la cavalo, el ia prosimi a Rancur e ia proba colpa el con la lansa. An tal, Rancur, previdente lo cual el va fa, ia vade a un lado e ia pedi la arena per fa ce la cavalo capri. Con esta, Jayamarvan ia cade a solo e Rancur ia profita per pedi sua testa. El ia proba talia sua garga ma, en cuando el ia leva la mano con la spada, un otra flexa ia es lansada a sua otra spala, cadente ance el a la solo.

Criante, el ia leva se e ia vide ce Jayamarvan ia desgaini ja sua spada e es prosiminte a el. La sona de ambos spadas ia silenti la regardores, e, pos alga minutos, Rancur ia pote prende la scermo de Jayamarvan, ci ia feri el en un lado. Rancur ia colpa el en la elmo con la pomon de sua spada, e ia pote retira lo. Jayamarvan ia ave ancora sua spada e sua armur, ma estrae lo va es multe plu nonfasil.

Jayamarvan ia cria e ataca Rancur, ci ia tropeza el. En sua cade, Jayamarvan ia perde sua spada, cual Rancur ia pedi rapida e el ia leva sua mano per proba talia la garga de la re de Ham, ci ia cria: “Arcores!”

En acel momento, un cuantia nonconosable de flexas ia comensa traversa la corpo de Rancur, ci ia cade a jenos sur Jayamarvan. La re de Ham ia estrae un daga de sua armur de gama. Sin fortias per teni la spada, Rancur no ia pote crede ce el va mori sin porta con se acel om ci ia causa tan multe dole a sua popla. El ia clui sua oios, e ia abri los denova, sabente ce lo es sua ves ultima de pote fa esta. Prosima, el ia vide la daga cual Jayamarvan ia ave en sua mano. La re de Ham no ia pote move par causa de la pesa de la corpo mor de Rancur sur el. Con sua fortias ultima, Rancur ia prende la daga e ia puxa lo en la garga de Jayamarvan. A tre veses acel daga ia entra en la garga de la re de Ham, e a cada ves, Rancur ia dise: “Per mea madre, mea sposa e mea popla.”

E, lasante la daga en la corpo mor de Jayamarvan, Rancur ia mori, la ultima de la cantijangianes.