II

La rio ia porta el tra la jungla asta ariva a la riva en la palasio de la site Lamphun, capital de la rena Haripuñjaya.

En acel momento, la prinsesa de Haripuñjaya ia es en la rio, fante la salutas matinal a la dios de acel rena.

“Prinsesa,” sua servor fem ia dise, “perce tua fas pare es fatigada oji?”

“Me ia ave un sonia strana,” la prinsesa ia dise. “Un om ia apare en mea vive, e la rena Haripuñjaya ia comensa sua fini. Me ia vide un re visina veninte asi con sua armada, e un gera entre ambos renas, e me ia vide mea padre mor, con sua sangue ensircante el. Me ia vide la banderas de nosa rena ardente, e mea palasio plenida con corpos mor de nosa soldatos. Me ia vide me escluida, sin rena… ma joiosa, e me no comprende acel sonia.”

“Cual sonia tan orible!” la servor fem ia dise. “Ma esta ia es sola un sonia, no es angusada par lo.”

Lo es en acel momento ce la corpo de Rancur ia apare, flosante en dirije a la riva do acel du femes ia es.

“Prinsesa! Prinsesa! Regarda acel!”

“O! Un om ferida! Esce tu crede ce el es mor?” la prinsesa ia demanda.

“Me no sabe lo, ma el veni direta asi.”

La corpo de Rancur ia ariva a la riva e, cuando la servor fem ia colpa el en la stomaco con un basto, el ia comensa sputa acua de la boca.

“Prinsesa! El es vivente!”

Rancur ia leva sua fas e ia regarda la prinsesa de Haripuñjaya, ci, a la mesma tempo, ia regarda Rancur. E alga cosa ia aveni en la cor de la prinsesa, ci ia crese ja en sua palasio, sola ensircada par femes, como ia es la tradision en sua rena.

“Prinsesa, tu sabe lo cual va aveni a esta om cuando la re descovre ce el es en tua palasio? Lo es nonlegal ce un om entra en la palasio de la prinsesa de Haripuñjaya!” la servor fem ia dise.

“Me sabe ja lo!” la prinsesa ia responde.

Rancur no ia comprende la lingua cual los es usante e, en sua lingua propre, el ia demanda: “Do me es?”

“E, en ajunta, el es stranjer!” la servor fem ia ajunta. “Me va clama la soldatos afin los mata el, car el pote veni de un rena enemin.”

“Clui la boca, tu pote vide ce el no veni de nosa renas visina,” la prinsesa ia dise. “Esce tu veni de la rena Ham?” el ia demanda a Rancur.

“La rena Ham ia concista mea site, Cantijangi,” Rancur ia responde.

La fas de la du femes ia cambia direta.

“Me comprende sola la parola ‘Ham’ e …” la servor fem ia dise.

“Esce tu ia dise ‘Cantijangi’?” la prinsesa ia demanda.

Rancur ia mostra sua braso, do tota la persones de Cantijangi ave un tatua con la scermo de la site.

La servor fem ia vade direta per clama la soldatos.

“Vade a la re e dise ce un om de Cantijangi ia es traeda par la rio asta asi.”

“Cantijangi? A! servor vea, tua eda es afetante tu! Acel site es sola un lejenda!”

A esta la prinsesa ia apare e ia cria: “Vade e fa como el ia dise a tu, lo es vera! Un om de Cantijangi ia apare asi!”

En un pico de minutos Rancur ia es ensircada par la soldatos de la prinsesa, ci ia punta sua lansas a el en cuando los ia espeta la ariva de novas de la re de Haripuñjaya.