XI

Alga semanas plu tarda

La soldatos de la rena Ham ia trae con se fondas diversa. La site Gijancanti ia es ensircada par la enemis. An si Rancur ia comanda construi un otra muron pos la murones cual ia esiste, lo no ia servi per evita ce Nhan Ghun Phen, con sua soldatos, destrui los. A esta ves, la re de Ham ia envia ance elefantes, cual ia es usada per transporta con plu fasilia la fondas.

“Me no pote crede ce los ia trae elefantes,” Rancur ia pensa. Ma el ia prende un fonda e ia lansa un petra a la oios de un de acel animales, ci ia revolta e, ansiosa, ia comensa ataca tota cual ia es en la campa de la enemi.

Riente, Rancur ia comanda sua soldatos a lansa petras a la oios de acel animales, ci ia debe es lasada distante de la site afin los no destrui la campa de Nhan Ghun Phen.

“Bon, alga min cosa,” Rancur ia pensa. Lo ia es un vinse peti en acel gera en cual el ia debe retira se pos cada batalia. El ia sabe ce la batalia final va debe es lutada en la site capital, protejeda par la acua cual ensirca lo. Txamadevi ia reseta ja la comanda de forti la site, de prepara furnis e comeda e de espeta ce el e la soldatos survivente reveni a lo, probable persegueda par la armada enemi.

“Ta ce nos pote vinse los, an si lo es en nosa capital,” Rancur ia pensa.

En acel dia, un pluve de rocas ia ataca la mures de la site. Sin para, la armada de Nhan Ghun Phen ia continua lansa petras e petras con foco per destrui completa la mures. A esta ves, en loca de abri un buco, Nhan Ghun Phen ia vole lasa la site sin defende, per continua sua ataca e fini con la plu soldatos posible, como venja contra lo cual Curjan ia fa en sua campa.

“A esta ves, tota de vos va mori asi, Rancur, incluinte tu,” Nhan Ghun Phen ia cria.

Rancur ia comanda flexi con foco la fondas, e multe de los ia es ardeda, ma la plu de la mures ia cade. Alora, Nhan Ghun Phen ia comensa ataca la site con lansas e flexas, cual ia es evitada par la colie de scermos unida, como un tortuga, de la cantijangianes ci ia crea linias diversa de defende.

“Rancur,” un de la soldatos ia dise, “la site va cade pos alga oras. Vade con la soldatos la plu bon per defende la capital.”

“Me no va lasa mea soldatos solitar!” Rancur ia responde.

“Rancur, mea re, tu ia dona libria a nos, tu ia dona a nos un vive cual nos ia pote nunca an sonia. Oji nos va mori asi, lutante contra los ci ia cadeni nos, contra los ci ia flajeli nos, contra los ci ia sclavi nos. Nos es grasiada par tota cual tu fa per nos, e, si on ave sola un modo probable per gania esta gera, lo va es si tu survive e pote ariva a la site. Vade!”

Rancur, vidente como sua soldatos ia dise acel, ia prende cuatro otra omes, la plu bones de la armada, e ia comensa vade a la capital.

“Ta ce dio aida vos, mea soldatos,” Rancur ia dise ante parti. “Vos dona orgulo a Cantijangi!”

Acel omes ia pote resiste tra alga tempo, e pos la momento cuando Nhan Ghun Phen ia pote abri un buco entre los, la batalia ia deveni un lago de sangue. Colerida, la cantijangianes ia xerca mata tan multe omes como posible, e los ia ataca an la rejimento de Nhan Ghun Phen, asasinante sua comandor la plu bon.

Ma tota de los ia mori, pos lunlotra, e la site Gijancanti ia cade, lasante sola la capital como la site ultima de acel popla de sclavos librida.

---

Rancur ia reveni a la capital, do Txamadevi ia es espetante el en la salon reial pos sabe (par la spiores cual el ia envia per sabe alga sur sua sposo) ce el vive ancora.

“Alo, mea amada!” el ia dise, lansante se a sua brasos. “Grasias a nosa dio ce tu es vivente!”

“Alo, mea amada!” Rancur ia responde. “Me es joiosa de pote vide tu denova, ma la novas cual me trae no es bon. Nos ia perde tota nosa teras, e la armada de la enemis es prosiminte a nosa site. An si nos ia mata multe de sua soldatos, la re de Ham ia envia plu, e nos no sabe multe bon como nos va pote resiste la atacas de la fondas.”

“Donce, ta ce esta note es nosa,” Txamadevi ia dise a sua sposo, e ambos ia vade a la leto.

O site Cantijangi! Tua dias ultima es ja asi!,
acel sclavos ci ia vole un site per casi
la esperas de un vive nova, a! la enemis va descasi
vos, la dias ultima veni,
esce vos va pote manteni
vosa libria? esce vos va pote seni
vosa enemis? esce vos va pote reteni
acel libria cual vosa jenitores ia sonia?

Acel note ia es la note la plu longa de la anio, e on ia ave no esperia en la cores de la abitores de Cantijangi. Totas ia sabe cual es la futur cual espeta los ma, an tal, los ia vole luta asta sua respira ultima. Lo cual los no ia sabe, e cual los ia descovre a la matina seguente, es ce la enemis ia ave un flotila a fronte de sua site. Lo ia es en acel momento ce panica ia core entre la cantijangianes! Ma Rancur ia parla a totas, de la alta de la templo en la sentro de la site:

“Cantijangianes, la ora de mori es prosiminte. Esce vos va encontra lo con teme? Esce vos va lasa ce vos enemis encontra tal los? Nos sabe cual es la destina cual espeta nos! Ta ce nos encontra el, e no el nos; e ta ce nos encontra el con la armas en nosa manos, disente ce nos no teme an mori, car nos pote mori oji, ma nos va mori como omes librida! A ante, cantijangianes, temente no cosa e no person!”

La soldatos ia es divideda en la cuatro distritos cual la site ia ave; cada ia proteje un porte. Ma multe difisil ia es luta contra la barcos de la enemis, an si la cantijangianes ia envia canoas con foco per arde acel barcos de do la enemis ia lansa sua petras. La ponte cual ia uni la site con otra distritos ia es destruida par la mesma Rancur, per evita un invade sur tera. Ma Nhan Ghun Phen ia usa alga barcos como paseria per lasa ce la cavalores entra a la site.

Como descrive tan multe teror, tan multe viole, tan multe sangue lansada a la solo de la site? Cada via ia deveni un campo de batalia; de cada casa la cantijangianes ia luta per sua vive, per sua libria. En un de la distritos la foco ia comensa estende, e multe femes, volente evita es violeda, ia lansa se a la foco con sua enfantes. Como me ta pote descrive esta senas? Como me pote parla de la dole de Rancur, pos vide tota cual el ia atenta per dona un vive de libria a sua popla? Locida, el ia comensa mata tota omes ci ia trova se en sua via. El ia fura un de la cavalos de la enemis e ia comensa xerca Nhan Ghun Phen. El ia pasea tra la du distritos cual ia resta en la site, car la foco ia estende a la otras, e el ia reveni a la palasio, do el ia escuta un cria cual ia jela sua sangue.

“Do es tua sposo?” Nhan Ghun Phen ia dise. El ia es prendente Txamadevi par sua garga, e el ia leva el contra la mur.

Txamadevi ia pedi el en la inguin, e el ia cade a la solo, un momento de cual el ia profita per respira denova.

Nhan Ghun Phen, colerida, ia colpa el en la jena con sua ganto de armur, fante ce el sangui estendosa de la boca.

Vidente acel, Rancur ia core en dirije a los e, Nhan Ghun Phen, vidente el, ia dise: “Regarda como tua sposa mori, sclavo!” E el ia afonda sua spada en la peto de Txamadevi, ci ia sputa sangue en junta con sua respira ultima.

Rancur ia salta sur Nhan Ghun Phen e ia comensa colpa el con sua punios, locida, sin para. Nhan Ghun Phen ia puxa el con sua pedes, ma la mori de sua sposa ia dementi Rancur e el ia pare ave la fortia de des omes. Nhan Ghun Phen ia pote fa poca contra acel om ci ia es a fini de perde sua sposa. Rancur ia nesesa no spada, no scermo, no otra cosa ca sua punios per malformi la cranio de Nhan Ghun Phen.

A fini, fatigada, el ia reveni a sua sposa e, prendente la corpo mor de el, ia comensa plora con tan multe fortia ce la tota site ia pote oia el.

La pico survivores ia vade do sua re ia es, per atenta resiste contra la atacas enemin, ma an con sua comandor xef mor, la soldatos de Ham ia continua ataca. Los ia lasa sola Rancur vivente, e los ia porta el a la capital de la rena Ham. Los ia obliga el a pasea, nuda, esente flajelida en vade, pico e pico, a la palasio de Jayamarvan, re de Ham.

---

“Bonveni a me rena, Rancur!” la re ia dise cuando Rancur ia es ante el. “Me es ja informada sur tota cual tu ia fa per resiste la ataca de mea armadas.” El ia leva se de la sejon reial e ia prosimi a Rancur. “Me ia es ance informada sur la mori de Nhan Ghun Phen, ci ia es asasinada par tu con tua propre manos!”

Rancur ia regarda la re, e ia proba leva se per mata el, ance con sua manos, ma la soldatos controlante la cadenas cual ia ensirca sua corpo ia tira los, tal ce el ia cade a la solo.

“No, no, no, Rancur. Asi tu es un invitada, tu debe respeta la ospitor,” Jayamarvan ia dise, riente. “Me ta vole mostra a tu un de la tradisiones de nosa popla, de la rena Ham.”

“Tua tradisiones es concista otra poplas, sclavi los, mata sua enfantes e viole sua femes. Tu, re Jayamarvan, a alga dia va reseta lo cual tu merita, cual es mori,” Rancur ia responde, con sua regarda fisada direta a la oios de la re enemin.

“O, tu es tan egosa, Rancur!” Jayamarvan ia dise. E, levante sua mano plen de anelos, el ia colpa la jena de Rancur, ci ia comensa sangui de sua nas e boca. “Tu debe es plu respetosa a tua ospitor.” E, prosiminte sua fas a lo de Rancur, el ia xuxa: “Cisa tu prefere es torturada asta la punto cuando tu va suplica ce me mata tu?”

Rancur ia leva sua regarda denova, e ia sputa a la fas de Jayamarvan. “Vade a merda!” el ia dise.

“Soldatos! Soldatos!” Jayamarvan ia cria. “Porta esta stupida a la sirco, do nos va diverti la popla.” E, regardante Rancur, el ia dise a el: “Tu va mori divertinte mea popla, ci va vide tu como tu es, un sclavo egosa.”

La soldatos ia porta el a un prison su la sirco de Ham, do el ia reseta no come a la dia seguente, e el ia es flajelida.