Solomon e la re de demones
La biblia nara ce cuando la Santa, Beata es El, ia demanda ce Solomon ta construi la Templo, El ia esije ce la Templo ta es fada de petras taliada per cabe a lunlotra. Ma ance, longo la biblia, on no ia oia marteles, axas o utiles de fero en cuando on ia construi la Templo Prima. Solomon ia demanda, “Como me pote construi la Templo sin esta utiles?”
La sajas de acel tempo ia dise a el, “Lo esiste un verme nomida la xamir cual pote talia la petras.”
“Do me pote trova esta verme?”
“Veni demones, ambos de mas e fema. Los sabe do tu pote trova lo.”
Solomon ia lia du demones, mas e fema, a junta, e ia demanda a los, “Do me pote trova la xamir?”
“Nos no sabe,” los ia responde, “ma Asmodeo, la Re de Demones, ta sabe lo.”
“Do es Asmodeo?”
“El vive sur alga monte. A cada dia el vade a un scola teral per aprende tora, e a cada note el vade a un scola sielal per aprende plu. A pos, el revade a sua monte e bevi acua.”
Solomon ia sustitua vino per la acua de Asmodeo, ci ia refusa bevi lo a prima, sitante la biblia: “Vino es un burlor, e bevidas forte es furiosa. El ci es enganada par esta no va deveni saja.” (Proverbos 20:1) El ia recorda ance, “Putia e vino e vino nova sutrae la cor.” (Hoxea 4:11) Ma sua sidia ia grandi e el ia recorda, “Vino felisi la cor de la om, fante ce la fas es plu radiante ca olio!” (Salmo 104:15) Alora el ia bevi la vino e ia adormi. Solomon ia lia el e ia veni el a Ieruxalim.
Solomon ia demanda a Asmodeo, “Esce tu sabe do la xamir es?” El ia dise, “Me no ave lo, ma ia dona lo a la avia upupa, ci usa lo per siseli la montes.” Solomon ia vade a la montes, ia trova un upupa, e ia asusta lo per fa ce lo cade la verme. El ia fura la verme e ia veni lo a Ieruxalim.
Asmodeo ia dise a pos, “Me ia aida multe tu; esce tu pote libri me aora?” Solomon ia acorda e ia libri Asmodeo, ci ia envia Solomon distante a via e ia comensa finje el. No person ia sabe ce Asmodeo no ia es Solomon tra multe anios.
Solomon ia vaga mendicante e predicante como Coelet (Eclesiaste) ante ce la sajas ia descovre la engana de Asmodeo e ia xerca Solomon, trovante el e reveninte el a Ieruxalim. Asmodeo ia fuji, ma Solomon ia teme sempre sua reveni.
Demandas
- Asmodeo ia pote trova en la biblia sitas cual ia pare dise ce el no ta debe bevi, e un sita cual ia pare dise ce el ta debe bevi. Como esta es posible?
- Perce un demon ta studia tora? Cua esta sinifia per nos umanas?
- Como iudisme vide la rol de demones?