Prefasa

La talmud es un libro multe malcomprendeda e temeda. On ave multe sitas falsa de lo e multe sitas sin contesto, car la libro es esensal un colie de disputas, con multe opinas oposante la un la otra. No tota la opinas en la talmud es bon, ma sola un minoria de los es oji segueda par iudis.

Par esta libro me vole introdui lejores a la talmud vera, ma no pote descrive la libro intera, cual es enorme. La naretas en esta libro es an tal elejeda per es representante de la libro intera.

Me ave ance un otra motiva per esta libro: naras de la atesta nova es ja trovable en la Salon de Elefen, e la talmud es per iudis lo cual la atesta nova es per cristianes. Diversia rici la lingua. Iudis estima opinas oposante, e la talmud representa bon esta estima. E plu perspetivas esiste en nosa leteratur, plu nos mostra ce nosa lingua es vera internasional e conveni a tota persones.

Iudis no pote dise la nom de la Omnipotente, e an evita dise la parola “Dio” mesma. Par causa de esta, tra esta libro, me refere a El como “la Santa, Beata es El”, un tradui prestada de ivri (הקדוש ברוך הוא), o la Omnipotente (הכל־יכול), o a un ves, la Senior (un tradui tradisional de אדוני).

On dise ce nos iudis gusta responde a un demanda par un otra demanda. A basa de cada capitol es alga demandas per fasili pensa e largi la mente. La plu de los no ave un responde coreta, ma los intende fa ce tu pensa plu.

Rebecca Krause (רבקה בת צוי הכהן וחנא־לאה)