La tora intera sur un pede
En la tempo de la Templo Du, en la sentenio prima de la eda comun, la popla iudi ia es divideda a setas diversa. La saduseos ia defende la ierarcia tradisional, en cual res e pretes ia governa un popla noneducada. Lor oposores xef ia es la fariseos, ci ia estima la sabe de un individua sur tora plu ca la pretia e la monarcia.
La fariseos ia es plu divideda a du scolas, acel de Xamai e acel de Ilel. Xamai ia es un om sever, Ilel tolerante. Xamai ia gusta dise, “Fa ce tua studia de tora es un pratica fisada.” Ilel ia gusta dise, “Si no aora, cuando?”
A un dia, un noniudi ia veni a Xamai e ia dise, “Me va converti me a iudisme si tu pote ensenia a me la tora intera en cuando me sta sur un pede.” Xamai no ia ave pasientia per esta om e ia envia el a via.
La mesma om ia veni a Ilel e ia repete la proposa. Ilel ia lasa ce la om sta sur un pede, e ia dise a el, “Lo cual es odiada par tu, no fa a tua camerada. Acel es la tora intera; la restante es la esplica. Vade aprende.”
La iudisme moderna desende de la scola de Ilel.
Demandas
- Esce tu ia oia alga cosa sur la fariseos a ante? Como esta nareta difere de lo cual tu ia oia?
- Esce la resoma de Ilel es vera completa?
- Cua es la sinifia de “la restante es la esplica” en esta contesto?