La forno de Ahnai
On ia porta un forno nova a la Sanedrin e ia demanda a la rabis, esce lo es caxer. Rabi Eliezer ben Urcano ia dise ce si, ma la otra rabis ia dise ce no. Rabi Eliezer no ia susede convinse los, alora el ia dise, “Si la leje iudi acorda con mea opina, esta carobo va move.”
La carobo ia move. “Cua un carobo sabe sur la leje iudi?” la rabis ia demanda.
“Si la leje iudi acorda con mea opina, esta rieta va flue a retro.”
La rieta ia comensa flue a retro. “Ance un rieta no es un fonte per la leje iudi.”
“Si la leje iudi acorda con mea opina, ta ce la mures cade.”
La mures ia comensa cade, ma rabi Ieoxua ia reproxa los. “Vos no pote interfere en un disputa sur la leje iudi!” Los ia sesa, ma no ia revade a sua loca par respeta per Rabi Eliezer.
“Si la leje iudi acorda con mea opina, la sielo mesma va mostra lo.”
Un vose ia clama de la sielo, “Cua vos fa? La leje acorda bien con Rabi Eliezer!”
Rabi Ieoxua ia sta e dise, “La tora no es en la sielo!” (Deuteronomio 30:12)
E la Santa, Beata es El, ia surie, orgulosa, car Sua enfantes ia vinse El.
Demandas
- Cua es la sinifia de “la tora no es en la sielo”?
- Cua es un fonte per la leje iudi?
- Como on pote “vinse” la Omnipotente?