Capitol 3

1 El ia entra denova en la sinagoga. On ia ave un om ci ia ave un mano atrofiada. 2 Los ia regarda el per vide esce el ta cura el en la dia santa afin los ta pote acusa el. 3 El ia dise a la om con la mano atrofiada: “Veni asi ante nos”. 4 Alora el ia dise a los: “Esce lo es legal fa bon o mal en la dia santa, salva un vive en loca de destrui lo?” Ma los ia resta cuieta. 5 Alora, regardante los colerida e lamentada par la calosia de sua cor, el ia dise a la om: “Estende tua mano”. El ia estende lo e sua mano ia es sanida. 6 La fariseos ia sorti e direta ia conspira con la herodianes contra el per fini con el.

7 Jesus ia retira a la mar con sua disiplos. Multe persones ia segue de Galilea e de Judea. 8 Escutante lo ce el ia es fante, un grande numero de persones ia veni a el ance de Ieruxalim, de Idumea, de ultra la Rio Jordan, e de la visineria de Tiro e Sidon. 9 El ia dise a sua disiplos ave un barco preparada per el par causa de la fola, afin los no crase el. 10 El ia cura multe e, como resulta, aceles ci ia es malada ia es presante a el per toca el. 11 E sempre cuando spiritos nonpur ia vide el los ta cade ante el e clama: “Tu es la Fio de Dio”. 12 El ia avisa sever a los ce no descovre el.

13 El ia asende la monte e ia comanda a aceles ce el ia vole e los veni a el. 14 El ia nomi des-du (a ci los ia nomi apostoles) per es con el e per envia los a predica, 15 e per ave autoria per espulsa demones: 16 (el ia nomi la des-du): Simon, a ci el ia nomi Petro; 17 Jacobo, fio de Zebedeo, e Joan la frate de Jacobo, a ci el ia nomi Boanerges, esta es, fios de la tona; 18 Andres, Felipe, Bartolome, Mateo, Tomas, Jacobo la fio de Alfeo, Tadeo, Simon la cananean, 19 e Juda Iscariote, ci ia tradi el.

20 Jesus ia reveni a casa. Denova la fola ia asembla, fante nonposible per los an come. 21 Cuando sua relatadas ia oia esta, los ia sorti per prende el, car los ia dise: “El es un demente”. 22 La scrivistes ci ia veni de Ieruxalim ia dise: “El es poseseda par Beelzebul!” e “Par la prinse de la demones el espulsa demones”.

23 Clamante los, Jesus ia comensa a parla los con parabolas: “Como pote Satan espulsa Satan? 24 Si un rena es divideda contra se mesma, acel rena no pote survive. 25 E si un casa es divideda contra se mesma, acel casa va pote sta. 26 E si Satan ia divide contra se mesma, el no pote survive, esta es sua fini. 27 Ma nun pote entra a la casa de un om forte per saca sua propria estra si prima lia la om forte. Alora, el pote saca sua casa. 28 Me serti vos ce tota pecas e blasfemas cual la popla dise va es pardonada a los. 29 Ma cualcun ci ta blasfema contra la Spirito Santa nunca va es pardonada, car el es culpable de peca eterna”. 30 Jesus ia dise esta car los ia dise ja: “El es poseseda par un spirito nonpur”.

31 Sua madre e sua frates ia ariva e, stante estra, los ia comanda clama lo. 32 Un fola sentada a sirca el ia dise a el: “Tua madre e tua frates es estra demandante per tu”. 33 Ma el ia responde los: “Ci es mea madre e mea frates?” 34 E regardante a sirca a aceles sentada en la sirculo el ia dise: “Asi es mea madre e mea frates. 35 Car cualcun ci fa la volunta de vole de Dio es mea frate e mea sore e mea madre”.

Capitol 3