Capitol 11

1 Cuando los ia prosimi Ieruxalim, a Betfage e Betania, esente en la Monte de Olivos, el ia envia du de sua disiplos 2 e ia dise a los: “Vade a la vileta a fronte de vos, e direta entrante lo, vos va trova un cavaleta liada, cual nun nunca ia senta. Deslia lo e trae lo asi. 3 Si algun demanda vos: ‘Perce vos fa esta?’ responde, ‘La Mestre nesesa lo e va redona lo direta’”. 4 Los ia vade e ia trova la cavaleta liada a un porta en via, e los ia deslia lo. 5 Algun oservores ia demanda los: “Cual vos fa, desliante la cavaleta?” 6 Los ia responde como Jesus ia dise a los e nun ia disturba los. 7 Los ia trae la cavaleta a Jesus e ia pone sua capas sur lo. E el ia senta sur lo. 8 Multe persones ia estende sua capas sur la via, otras ia estende ramos foliosa cual los ia corti de la campo. 9 Aceles presedente el como ance aceles seguente el ia clama:
“Hosanna!
Bondiseda es ci veni en la nom de la Senior!
10 Bondiseda es la rena de nosa padre David, la rena cual va veni!
Hosanna en la plu alta!”

11 El ia entra a Ieruxalim e ia vade a la area de la tempo. El ia regarda a sirca tota e, como lo ia es tarda, el ia vade a Betania con la Des-du.

12 A la dia seguente, cuando los ia sorti de Betania, Jesus ia fami. 13 Vidente un figo distante con folias, el ia vade per vide si el ta pote trova alga en lo. Cuando el ia ariva, el sola vide folias, lo no ia es tempo per figas. 14 E el ia dise a lo: “Ta ce nun come tua frutas denova!” E sua disiplos ia escuta lo.

15 Los ia veni a Ieruxalim, e entrante a la area de la tempo el ia comensa espulsa aceles vendente e comprante ala. El ia inversa la tables de la intercambiores de mone e la sejas de la vendores de pijones. 16 El no ia permete nun porta no cosa tra la area de la tempo. 17 Alora el ia ensenia los disente: “Esce lo no ia es scriveda:
‘Mea casa debe es nomida un casa de prea per tota la nasiones’?
Ma vos ia converti lo en un cava de furores”.

18 Cuando la pretes xef e la scrivistes ia escuta esta, los ia xerca la forma de mata el, an tal los ia teme el car la tota la popla ia es merveliada par sua ensenia. 19 Cuando la tarda ia veni, los ia sorti de la site.

20 Temprana en la matina, cuando los ia es vide la figo, lo ia sice asta sua radises. 21 Pedro ia memori e ia dise a el: “Mestre, vide! La figo cual tu ia maldise ia seci”. 22 Jesus ia dise a los: “Ave fida en Dio. 23 Car me dise vos, cualcun ci dise a esta monte: ‘Sorti de ala e jeta tu mesma a la mar’ e no duta en sua cor ma crede ce cual el dise va aveni, lo va es fada per el. 24 Donce me dise vos, tota cual vos va demanda en prea,, crede ce vos va resta lo e lo va es vosa. 25 Cuando vos erije per prea, si vos ave algo contra cualcun, pardona el, 26 afin vosa Padre sielal va pardona vos vosa violes”.

27 Los ia reveni denova a Ieruxalim. Cuando los ia es paseante en la area de la templo, la pretes xef, la scrivistes e la veas ia prosimi el 28 e los ia dise a el: “Con cual autoria fa tua esta cosas? O ci ia dona tu esta autoria per fa los?” 29 Jesus ia dise a los: “Me va demanda vos un demanda. Responde me, e me va dise vos con cual autoria me fa esta cosas. 30 Esce la batiza de Joan ia es de orijina sielal o umana? Responde me”. 31 Los ia discute esta entre los e ia dise: “Si nos dise: ‘De orijina sielal’, el va dise: ‘Perce vos no ia crede el?’ 32 Esce nos va dise: ‘De orijina umana’?” - los ia teme la fola, car tota los ia pensa ce Joan ia es vera un profeta. 33 Donce los ia responde a Jesus: “Nos no sabe”. Alora Jesus ia dise a los: “Me ance no va dise vos con cual autoria me fa esta cosas”.