Capitol 10

1 El ia sorti de ala e ia vade a la distrito de Judea (e) tra la Rio Jordan. Denova folas ia asembla a sirca el e, como lo ia es sua abitua, el ia ensenia los denova. 2 La fariseos ia prosimi e ia demanda “Esce lo es legal per un sposo divorsia sua sposa?” Los ia es probante el. 3 El ia responde los: “Cual ia comanda Moxe a vos?” 4 Los ia dise: “Moxe ia permeti scrive un declara de divorsia e divorsia de ela”. 5 Ma Jesus ia responde: “Par causa de vosa cores noncompatiosa el ia scrive esta comanda a vos. 6 Ma de la comensa de la crea ‘Dio ia fa los om e fem. 7 Par esta, la om va lasa sua padre e madre, 8 e ambos va deveni un carne’. Donce los no es ja du, ma un carne. 9 Tal, ta ce la om no separa cual Dio ia junta”. 10 En la casa la disiplos denova demanda el sur esta. 11 El ia dise a los: “Cualcun ci divorsia sua fem e sposi otra adultera contra ela; 12 e si ela divorsia sua sposo e sposa otra, ela adultera”.

13 E la popla ia es traente enfantes a el afin el toca los, ma la disiplos ia reproxa los. 14 Cuando Jesus ia vide esta El ia coleri e ia dise a los: “Lasa la enfantes veni a me; no impedi los, car la rena de Dio parteni a los ci es como esta. 15 Me dise a vos, cualcun ci no aseta la rena de Dio como un enfante no va entra a en lo”. 16 Alora el ia abrasa los e ia bondise los, ponente sua manos sur los. 17 Cuando el ia sorti per sua viaja, un om ia core a el, ia ajena ante el, el demanda el: “Mestre bon, cual me debe fa per erita la vive eterna?” 18 Jesus ia responde el: “Perce tu clama me bon? Nun es bon ma Dio sola. 19 Tu conose la comandas: ‘Tu no va mata, tu no va adultera, tu va no fura, tu va no atesta falsa, tu va no froda, onora tua padre e tua madre’”. 20 El ia responde e ia dise a el: “Mestre, tota esta me ia oserva de mea jovenia”. 21 Jesus, regardante a el con ama, el dise a el: “Tu sola manca un cosa. Vade, vende tota cual tu ave, e dona lo a la provras e tu va ave un tesoro en la sielo; alora, veni, segue me”. 22 Cuando el ia oia esta, el ia tristi e ia vade triste, car el ia ave multe poseses.

23 Jesus ia regarda a sirca e ia dise a sua disiplos: “Como difisil lo es per aceles ci ave ricia entra a la rena de Dio!” 24 La disiplos ia es stonada par sua parolas ma Jesus ia dise denova: “Enfantes, como difisil lo es entra en la rena de Dio! 25 Lo es plu fasil per un camel pasara tra la oio de un ago ca per un ci es rica entra a la rena de Dio”. 26 Los ia stona plu e ia dise entre los: “Alora, ci pote es salvada?” 27 Jesus ia regarda a los e ia dise: “Per umanas lo es nonposible, ma no per Dio. Tota cosas es posible per Dio”. 28 Pedro ia comensa dise a el: “Tu sabe ce nos ia lasa tota e ia segue tu”. 29 Jesus ia dise: “Me dise a vos, on no ave nun ci ia lasa o casa o fratres o sorores o madre o padre o enfantes o teras per me e la evanjelio 30 ci no va reseta multiplida par sento plu aora en esta eda presente: casas e fratres e sorores e madres e enfantes e teras, con presegues, e vive eterna en la eda veninte. 31 Ma multe ci es prima, va es ultima, e la ultima va es la prima”.

32 Los ia es en via, asendente a Ieruxalim, e Jesus ia vade a fronte de los. Los ia es merveliada, e aceles ia ia segue ia es temosa. Prendente la Des-du a lado de nova, el ia comensa dise los cual va aveni a el. 33 “Regarda, nos es vadente a Ieruxalim, e la Fio de Om va es traeda a la pretres xef e la scrivistes, e los va condena el a mori e trae el a la noniudis 34 ci va burla el, sputa sur el, tormenta el, e mata el, ma pos tre dias el va revive”.

35 Alora Jacobo e Joan, la fios de Zebedeo, ia veni a el e ia dise a el: “Mestre, nos vole ce tu fa per nos cual nos va demanda de tu”. 36 El ia responde: “Cual vos desira ce me fa per vos?” 37 Los ia responde: “Permete ce en tua gloria nos pote senta un a tua destra e otra a tua sinistra”. 38 Jesus ia dise a los: “Vos no sabe cual vos es demandante. Esce vos pote bevi la copa cual me bevi o es batizada con la batiza con cual me es batizada?” 39 Los ia responde el: “Nos pote”. Jesus ia dise a los: “La copa cual me bevi, vos va bevi, a con la batiza con cual me es batizada, vos va es batizada; 40 ma senta a mea destra o a mea sinistra no es me ci dona lo ma es per aceles per ci lo ia es ja preparada”. 41 Cuando la des ia oia esta, los ia coleri con Jacobo e Joan. 42 Jesus ia clama los e ia dise a los: “Vos sabe ce aceles ci es reconoseda como gidores sobre la noniudis domina sur los, e la grande fa ce los senti sua autoria. 43 Ma lo no debe es tal entre vos. Plu bon, cualcun ci vole es grande entre vos va es vosa servor; 44 cualcun ci vole es la prima entre vos debe es la sclavo de tota. 45 Car la Fio de Om no veni per es servida ma per servi e per dona sua vive como rescata per multe”. 46 Los ia ariva a Jerico. E cuando el ia es partinte de Jerico con sua disiplos e un fola grande, Bartimeo, un om sieca, la fio de Timeo, ia senta a lado de via suplicante: “Jesus, fio de David, ave compatia sur me” 47 Cuando el ia persepi ce los ia es Jesus de Nazaret, el ia comensa clama: “Jesus, fio de David, ave compatia sur me”. 48 E multe ia reproxa el per silenti, ma el ia clama plu alta: “Fio de David, ave compatia sur me”. 49 Jesus ia para e ia dise: “Clama el”. Donce los ia clama la om sieca, disente a el: “Felisi, leva, el es clamante tu”. 50 El ia lansa sua capa, ia salta e ia vade a Jesus. 51 Jesus ia dise a el: “Cual tu vole ce me fa per tu?” La om sieca ia responde a el: “Mestre, me vole vide”. 52 Jesus ia dise el: “Vade, tua fida ia salva tu”. Aora el ia reseta sua vide e ia segue el en via.