Capitol 9

1 Car sur tota esta me ia fisa mea cor per clari tota esta—ce la virtuosa e la saja e sua fadas es en la mano de Dio. La umana sabe no odia no ama. 2 Tota ante el es vapor. Car tota ave un sola destina, la virtuosa e la mal, la bon e la nonbon, la limpa e la nonlimpa, el ci ofre sacrifias e el ci no ofre sacrifias, la bon e la ofendor, el ci jura e el ci teme jura. 3 Esta es la malia en tota cual on fa su la sol, car tota ave un sola destina, e ance la cor de la fios de la umana es plen de malia, e orjia loco en sua cor en ce los vive, e a pos—a via a la mores. 4 Car per el ci es juntada a la viventes on ave sertia: plu bon un can vivente ca un leon mor. 5 Car la viventes sabe ce los va mori, e la mores sabe no cosa, e los ave no plu per los un recompensa, car on oblida sua recorda. 6 On ia perde ance sua ama e sua odia, e sua jelosia, e los ave no plu un comparti per sempre en tota cual on fa su la sol. 7 Vade, come tua pan con joia e bevi tua vino con un cor felis, car tua fadas ia plase ja Dio. 8 Ta ce a cada saison tua vestes es blanca, e olio sur tua testa no manca. 9 Vive felis con un fem ci tu ama per tota tua dias su la sol de vapor cual on ia dona a tu su la sol, tota la dias de vapor, car acel es tua comparti en vive e en la labora sur cual tu labora su la sol. 10 Tota cual tua manos susede fa con tua fortia, fa, car on ave no fa, no calcula, no sabe, no sajia en Xeol do tua va vade. 11 Me ia reveni per vide su la sol ce no de la rapida es la corsa e no de la potiosa, la batalia, no de la saja, pan, no de el ci persepi, ricia, no de el ci sabe, favore, car un tempo e mal fortuna va aveni a tota los. 12 E ance la umana no sabe sua tempo, como pexes caturada en un rede cruel e como avias caturada en un trapa, tal un mal tempo trapa la fios de la umana cuando lo cade subita sur los. 13 Me ia vide ance esta: sajia su la sol, e lo es grande a me. 14 On ia ave un site peti con poca omes en lo, e un re grande ia veni contra lo e ia ensirca lo e ia construi tores de aseja contra lo. 15 E on ia trova en lo un om povre e saja, e el ia salva la site con sua sajia, ma no umana ia recorda acel om povre. 16 Me ia dise: Plu bon sajia ca fortia, ma la sajia de la om povre es despetada e sua parolas es nonoiada. 17 On oia la parolas cuieta de la saja plu ca la cria de un renor entre foles. 18 Plu bon sajia ca armas, ma un sola ofendor destrui multe bonia.

Capitol 9