Capitol 4

1 E me ia reveni e ia vide tota la opresa cual on fa su la sol, e vide: la larmas de la opresadas—nun per comforta los, e la potia a la lado de sua opresores—nun per comforta los. 2 E me ia loda la mor ci ia mori ja plu ca la vivente ci ancora vive. 3 E plu bon ca ambos es el ci ancora no es, ancora no vide la mal fadas cual on fa su la sol. 4 E me ia vide tota la labora e tota la fadas astuta—ce lo veni de invia entre un om e sua visina. Esta es ance vapor e xasa venta. 5 La fol junta sua manos e come sua propre carne. 6 Plu bon un plenimano de reposa ca du plenipunios de labora e xasa venta. 7 E me ia turna e ia vide vapor su la sol. On ave un sin un numero du, el ave no fio no frate. 8 E on ave no fini de sua labora, e ricia no sasia sua oios. “E per ci me labora e priva me de bon cosas?” Esta es ance vapor e un mal ocupa. 9 Plu bon du ca un, car los reseta bon recompensa per sua labora. 10 Car si la un ta cade, la otra ta leva sua ami. Ma ai per el ci cade e on no ave un numero du per leva el! 11 E si du reclina se, los ave caldia, ma como un es calda? 12 E si algun ta forti se, la du ta resiste el. E un corda truple no es fasil rompeda. 13 Plu bon un xico povre ma saja ca un re vea e fol ci sabe cautia no plu. 14 De prison el ia sorti per es re, car en sua rena, la om povrida ia nase ance. 15 Me ia vide tota la viventes ci pasea su la sol con la xico seguente ci va sta en sua loca. 16 On ave no fini de tota la popla, de tota ante ci el ia sta, e los ci ia veni plu tarda no va felisi con el. Car esta es ance vapor e xasa venta.

Capitol 4