Capitol 8

1 Ci es como un saja, e ci sabe la interprete de un cosa? La sajia de un umana lumina sua fas, e la noncortesia de sua fas muta lo. 2 Oserva la comanda de la re como un jura a Dio. 3 No freta per parti de el. No ostina un mal cosa. Car tota cual el desira, el fa, 4 car la parola de un re es potia e ci pote dise a el, “Cua tu fa?” 5 El ci oserva la comanda va conose no mal cosa, e la cor saja conose la tempo e modo. 6 Car on ave un tempo e modo per cada conserna, car la malia de la umana abunda sur el. 7 Car on no sabe lo cual va es, car lo cual va es—ci pote dise lo? 8 No umana ave potia supra la venta per enclui la venta, e on ave no potia supra la dia de mori, e on ave no descarga de gera, e malia no va fa ce los ci fa lo evade. 9 Tota esta me ia vide e ia fisa mea cor sur tota cual on fa su la sol. On ave un tempo cuando un umana ave potia supra un umana a sua nose. 10 E ance me ia vide la mal portada a la tomba e estra la loca santa, en ce on oblida los ci fa bon en la site. Esta es ance vapor. 11 On no esecuta rapida la condena per un mal fada. Donce la cor de la fios de la umana pleni en los per fa mal. 12 Car la ofendor fa mal a sento veses e vive tra longa, an si me sabe ance ce lo va vade bon per los ci teme Dio, ci teme ante El. 13 E lo no va vade bon per la mal, e como un ombra, el no va vive tra longa, car el no teme ante Dio. 14 On ave un vapor cual on fa sur la tera—on ave virtuosas a ci lo aveni como si los ia fa mal, e on ave males a ci lo aveni como si los ia fa virtuosa. Me ia dise ce esta es ance vapor. 15 E me ia loda joia, car on ave no cosa plu bon per un umana su la sol ca ce el come e bevi e diverti e acel va resta con el en sua labora per la dias de sua vive cual Dio ia dona a el su la sol. 16 Cuando me ia fisa mea cor per sabe sajia e per vide la ocupa cual on fa sur la tera, tra dia e note mea oios no ia vide dormi. 17 E me ia vide cada fada de Dio, ce la umana no pote comprende la fada cual on fa su la sol, cuanto la umana labora per xerca el no pote comprende lo. E an si la saja vole sabe, el no va pote comprende lo.

Capitol 8