Capitol 10

1 Un mosca mor fa ce la olio de parfumor apesta. Plu pesosa ca sajia seria es un pico de folia. 2 La cor de un saja es a sua destra, e la cor de un fol es a sua sinistra. 3 An cuando la fol pasea sur la strada, sua cor manca, e lo dise a cadun, el es un fol. 4 Si la ru’ah de la renor vade contra tu, no parti de sua loca, car calmia reposa ofendes grande. 5 On ave un malia cual me ia vide su la sol, un era vera cual veni de la person en potia. 6 On pone folia sur locas alta, e la rica abita a su. 7 Me ia vide servores sur cavalos e nobiles paseante como servores sur la tera. 8 El ci escava un foso va cade en lo, e un serpente va morde el ci penetra un mur. 9 Petras va feri el ci move los, e lenio va perili el ci fende lo. 10 Si la fero es nonagu, e el no ia agi sua borda, el va labora multe. E la vantaje de capasia es sajia. 11 Si un serpente morde ante encanta, on ave no vantaje per la serpentor. 12 La parolas de la boca de un saja gania favore, e la labios de la fol engoli el. 13 La prima de la parolas de sua boca es folia, e la ultima de los es mal orjia. 14 E la fol parla multe parolas. La umana no sabe lo cual va es, e lo cual va es pos el, ci pote dise lo a el? 15 La labora de un fol fatiga el tal ce el no sabe como vade a la site. 16 Ai per tu, tera, si tua re es un xico, e si tua prinses come a matina. 17 Felis es tu, tera, si tua re es la fio de nobiles, e si tua prinses come a la tempo conveninte—per fortia e no per enebria. 18 Par pigria la faxon pende, par manos osiosa la casa gotea. 19 Car per rie on prepara comeda e vino felisi vive. E mone responde a tota. 20 An en tua pensas no despeta la re, e en tua sala de dormi no despeta un rica, car un avia de la sielos va porta la sona e la alida va dise la parola.

Capitol 10