A la fini de la esajo presedente me introdui simple la Raŭmismo e Finvenkismo. Serta, me no va critica esperanto como un amato divertinte de un grupo peti — lo es sin sinifia. La intende de mea criticas es de la punto de vista de Finvenkismo, per analise esce esta lingua es conveninte per deveni la lingua comun internasional, spesial considerante ce la plu de persones en la comunia de esperanto acorda la idea de Finvenkismo. A fas de la demanda grande de “esce lo es bon ce la espera de un grupo peti es realida en tota paises”, par justia, me debe pensa sur lo con un disposa plu sever.
Esta es mea opina: si esperanto recambia direta la posto de engles, me ta aseta lo apena, car an pos tota esperanto es a alga grado plu fasil e neutra ca engles. Ma si un otra lingua aidante, per esemplo mea favoreda simplingua,[¹] recambia la posto de engles, me ta aseta lo sin esita. On pote valua linguas con parolas como “bon” e “mal”, si? Per linguas natural, no, car tota ideas de “un lingua es plu bon ca un otra” es fundal nasionaliste. Ma per linguas construida, spesial aceles cual vole deveni la lingua comun de la mundo, on pote resenia los par un colie de normas cual es mostrada en esta serie e va es discuteda en esajos futur.
Alga esperantistes dise a me ce on ave ja mil montones de criticas sur esperanto en la pasada e en la eda moderna (cual indica ce esperanto no pote es prefereda par la majoria de persones, no?), donce como usosa es mea criticas? Esta es cisa la intende ultima de la scrive de esta serie. Me no vole “fini completa la disputa en la comunia de linguas construida”, car tota opinas debe ave sua oposores sin depende de sua argumentablia, e en ajunta, esperantistes tende evita la argumenta a multe veses. An con tota, nos ave un bon cuantia; an con tota, nos es developada la plu longa e ave la potia la plu grande; an con tota, nosa istoria es la plu longa e nosa potia es la plu grande… (“La sola lingua construida susedosa” es ance un diseda comun en la promoves esperantiste. Lo es evidente ce la usa de parolas como “sola” e “susedosa” no es justa. Me teme ce no sola la comunia de klingon o otra linguas cual es tan grande e influente como acel de esperanto vole ave un comenta sur “sola” e “susedosa”, ma ance, usores e suportores de otra linguas aidante cual esperantistes despeta vole fa un batalia cuando los oia la du parolas.)
An si me no espeta ce mea serie pote fini la disputa, me espera ce lo pote dona un colpa con punio bon a la debiles de esperanto. A cada ves cuando un comensor como me cexa sur esperanto, esperantistes ataca sempre el como un veteran burla un avieta: “El ci gusta cexa es un mulo de scola.” Esente un comensor, me ia pote sola engoli la sentis amarga, o perde la autofida e sesa aprende esperanto como multe persones.
Ma me es un gic de linguas, o per dise plu spesifante, un person intensa interesada a linguas aidante, me no ia despera. Me ia es un komencanto “comensor”, donce me ia debe studia plu. Cisa an aora me no pote parla esperanto multe bon, e me no osa nomi me un “esperantiste” (un otra razona es ce me ave zero fida a esperanto), ma ancora, pos ce me fini la curso de esperanto de Duolingo, e parleta en comunias con esperanto, e colie multe recursos de esperanto, e leje multe libros gramatical de esperanto… Me debe es un aprendor de esperanto a nivel media, no? Como cual es ja notada, me es un gic de linguas, donce me atende multe problemes cual esperantistes vea no atende o regarda como triviales. A la eda vea, esperantistes no ave tan multe recursos per aprende esperanto, o aprende cualce lingua an si lo es un lingua vasta usada como engles o rusce. Aprendores de linguas en la eda vea ia debe memori tota cosas nonelegante, e par esta razona lo es difisil ce los comprende per cual razona aprendores nova vole “studia tro multe” alga sonas, tipos de frase o parolas.
Donce par cual me serti ce mea serie pote fa un colpa bon? Par mea sabes linguistical. Me desconstrui total esperanto con sabes de cada campo de linguistica: fonetical me analise la lista de sonas, fonemes e la strutur de silaba; gramatical me critica detaliosa la sintatica; vocabulal me trova la problem a cor cual no es curada par multe otra linguas aidante, per dise, la rompe de relatas etimolojial.
Me leje ja multe criticas sur esperanto par otra persones. La plu de los no es profonda e convinsente, donce lo es natural ce esperantistes considera los como cexas sin sinifia e novia. (Ma ancora, la problemes como “leteras con xapo” esiste sempre, e los es sempre mal tra plu ca un sentenio, donce perce la comunia de esperanto no introspeta e reformi los? Perce tra sento anios esperantistes dise ce la criticas es sin novia en cuando los continua es embarasante conservaliste?) On ia ave multe linguisticistes ci studia esperanto (multes ia eleje esperanto car los mesma ia es esperantistes), ma par causa de sua posa per esperanto o neutra, “criticas” vera e linguistical es poca.
Cisa algun scrive ja esajos linguistical per critica esperanto ante me. Ma me pote serti ce mea serie es la critica linguistical prima cual es publicida en un plataforma xines per lejores xines, donce lo debe es plu o min valuosa. Aora, tu sabe per cual razona e sur cual cualias me critica esperanto, e tu sabe la sinifia de esta criticas. Me crede ce multe esperantistes o persones ci no aprende esperanto ma suporta la promoves esperantiste va desacorda. Me bonveni tota opinas diferente e plu discutes.
A fini, me vole dona un sujesta consiensosa si tu no oia sur esperanto en la pasada, o si tu vole aprende esperanto ancora — esce esperanto merita tua tempo?
Un demanda strana, cisa, pos oto esajos. Considerante ce me critica esperanto como un tortor bate sua pasta, perce me pensa ancora ce esperanto merita la tempo de cualcun? Lasa ce me parla sur la beneficas de aprende esperanto asi. Si tu aprende esperanto, tu ta conose un grupo de persones, cual es un fortuna de esperia la ambiente de unia e fratia en un grupo peti per persones malsolitar. Si on es en la comunia de esperanto e ave la tempo e mone sufisinte, on pote partisipa plu la reunis o conferes organizada par esperantistes, car cisa los ave un ambiente de unia e fratia plu bon ca avenis comun en la comunia. Par causa ce esperantistes es sperdeda tra la mundo, si tu aprende esperanto, tu ta pote ave la fortuna de conose persones de cada pais sin nesesa de parla engles o sua linguas prima (spesial si tu no gusta engles). Plu, esperantistes debe aida lunlotra, donce cuando tu viaja a un pais stranjer, tu ta es resetada par esperantistes; esta es un servi nomida Pasporta Servo. (An tal me es naseda en un familia povre e no pote fa un tal viaja…)
Ma lejores astuta ta dise: la beneficas de aprende esperanto es la mesma como la beneficas de converti a cristianisme, no? Lo es vera. En un comunia relijial vera (no un culto), credores es ance unida e fratin, e ta ofre se per aida viajores de paises stranjer. Me oia estas frecuente de cristianes. E la cosa la plu importante — la cuantia de cristianes es a sentuples, an miluples plu ca la cuantia de esperantistes. Lo es posible ce on trova du o tre esperantistes en un pais stranjer, ma lo es plu posible ce on trova sento cameradas de relijio ci vole ofre sua aida ance.
Esce esperanto merita mea tempo? Amis, vos nesesa ariva a vosa propre concluis sin aida.
En fato, par mea oserva, la plu de persones ci es beneficada par esperanto en modos notada a supra es “esperantistes”. Ma si on es un esperantiste a un ves, on es un esperantiste a tota veses. El ci pote parla esperanto multe bon e contribui sua tempo a la promoves esperantiste es como lutores ci dedica sua vive a la aspira de esperanto. Esta es la diseda de promove la plu acordante con la realia: on no pote cambia la mundo par aprende esperanto, ma on pote cambia sua vive pos deveni un esperantiste.
Si tu no pensa ce acel defetos de esperanto es defetos vera, e vole dona tua tempo, enerjia e an mone a esta aspira nobil e ambiente fratin, e vole joia la bonia de aprende la lingua, alora esperanto merita un atenta.
Lo es evidente ce esperanto es un cosa de cual sua simpatia, aspira e comunia es multe plu importante ca la lingua mesma. Ma tro poca foca a la cualia de util e tro multe asentua a la simpatia e aspira fa ce cada esperantiste sacrifia sua vive. Esce esta vade contra la intende prima e la plu importante de un lingua aidante internasional?
Cual es, aida tota umanas a comunica fasil e egal.
[¹] Un lingua aidante internasional creada par la autor de esta serie e otra persones.
Esta paje es presentada con la lisensa CC Attribution-Share Alike 4.0 International.
Lo ia es automata jenerada de la paje corespondente en la Vici de Elefen a 5 junio 2025 (18:19 UTC).