La dole de testa la plu efetosa en la aprende de un lingua stranjer es memori sua vocabulo. Donce, la regula de vocabulo, spesial como on eleje sua orijina etimolojial, es un cosa estrema importante per un lingua aidante.
Ma si un lingua aidante es construida par un o alga persones, perce lo debe ave un orijina etimolojial natural? La responde a esta demanda pote es descovreda de la fato ce la plu de linguas aidante eleje linguas romanica como sua orijinas.
Suposa ce on ave un lingua construida sin orijina, per dise, sua vocabulo intera es desiniada de zero (per esemplo, me pote inventa acaso un parola “vrabh” e dona lo la defini “un gato” — lo pote es ce par coaveni on ave un parola cual ave un pronunsia e sinifia simil a “vrabh”, ma un tal caso solitar no ave importa etimolojial), alora esta lingua construida ta es multe difisil per tota poplas de la mundo. La leson es simil a un proverbo popular en la comunia de linguas construida: la lingua asoluta neutra es la lingua egal difisil per cadun.
Par esta razona, on debe fundi sua lingua aidante sur la natur, ma como on fa lo bon? Restrinje la eleje de parolas en un sola familia de lingua? O eleje parolas de cuantia simil entre cada familia de lingua per un neutria plu? Per solve esta dilema, lasa ce nos esamina como alga linguas aidante e esperimental desinia sua vocabulos.
La vocabulo de volapuk es xef orijinal de linguas germanica e romanica. La proportio de parolas de linguas germanica en la vocabulo de volapuk es plu alta ca cuasi tota linguas aidante famosa, probable car sua creor ia es un deutx. Ma volapuk cambia la parolas orijinal a la forma de CVC- en modo strana, per esemplo sua nom Volapük veni de vol (conaseda con “world” engles) e pük (conaseda con “speak” engles), cual fa ce an un germanica no pote reconose sua orijinas.
La vocabulo de esperanto es xef orijinal de linguas romanica e germanica; la cuantia de parolas romanica es plu ca la cuantia de parolas germanica (xef deutx e engles), ma la otra no es peti. No como volapuk, esperanto reteni usual la formas completa de parolas orijinal e sola ajunta sua coda (pd. temperaturo veni de temperature), cual es multe beneficante en la temprana de la developa. En ajunta, esperanto ave sua propre metodo de crea parolas nova con “corelatantes” e la sistem de afisas.
Pos la crea de ido, tota linguas aidante vade a la via romanica. Lo es posible ce parolas de otra familias apare en acel linguas, ma la proportio es multe peti en compara con esperanto. Interlingua e glosa considera la influe de linguas clasica e eleje los como sua orijinas etimolojial, xef latina, ma glosa inclui ance multe parolas de elinica antica. Projetas pur romanica como Lingua Franca Nova[¹] eleje xef la linguas romanica moderna (franses, espaniol, italian, portuges, etc.) como sua orijinas etimolojial.
Ambos de la du linguas esperimental la plu bon conoseda vade a la via neutra, an si los difere a alga grado. Lojban fundi sua orijina etimolojial sur ses linguas vasta usada — engles, espaniol, arabi, rusce, xines (putong) e hindi, ma cada parola es un misca de ses parolas de la linguas ja notada con un strutur uniforma, resultante ce la vocabulo de lojban no es fasil reconosable como acel de volapuk. A la otra lado, tocipona fundi sua orijina etimolojial sur plu ca des linguas de la mundo, e reteni la formas de parolas bon (pe. jan “person” veni de “人” /jɐn/ en la lingua guangdong).
La plu de otra linguas esperimental vade a la via apriori. Per esemplo, alga linguas vole un coresponde a lunlotra entre fonemes e sinifias, per dise, on pote dedui la defini de un parola si on sabe sua pronunsia o spele. Comprendable, tal linguas es “asoluta neutra” donce difisil per aprende.
Conclui: a) neutria asoluta es nonpratical; b) la parolas debe conforma con la strutur interna de la lingua (volapuk e lojban es bon modeles); c) la famila romanica es la orijina etimolojial favoreda.
On pote vide ce linguas este no vade bon si la razona du e tre es considerada, car la tronco e coda de la plu de parolas romanica es fasil distinguable; la tronco fini con un consonante a la plu de veses (pd. la tronco de vento italian e ventus latina es vent-, e la coda es -o/-us per nomes masin), cual fa ce on pote conveninte cambia sua coda o ajunta un sufisa a lo. Ma lo es nonposible ce on aplica la sistem de codas e ajuntas a la vocabulo de un lingua este, an tan simple como nion. Per esemplo, la cuatro fonemes de “風” (kaze) (sinonim con vento, ventus e “venta” elefen) es nonseparable. On no pote sustitui <-o> esperanto per la <-e> orijinal car kazo ave un sinifia completa diferente de kaze. Esce lo pote vade si on no sustitui, sola ajunta? No, car parolas como “猫” (neko) ta deveni en esta modo nekoo, cual es torpe. Donce, un lingua aidante internasional pote mera inclui un pico de parolas este, e la majoria de sua vocabulo debe es fundida sur linguas european, an linguas romanica.
Ma perce romanica? Esce otra familias de lingua es mal? La razona es ce si on lista la linguas la plu influente de la sentenio 19 a oji, engles, franses, espaniol e portuges es serta en la lista. Engles, an si avente un linia de sangue germanica, es un alia firma de linguas romanica car 60% de sua vocabulo veni de acel linguas. En ajunta, latina es ancora un lingua multe importante no sola en Europa ma ance en la mundo. La combina de engles, latina, espaniol, franses etc. con la mesma colie de radises es probable alga veses plu potiosa ca otra linguas major cual pote sola batalia solitar, per esemplo arabi, rusce e xines. Plu, engles es usada en cada parte de la mundo, e espaniol radisi en la plu de America latina. No lingua pote vinse los par estende de usa, cuantia de parlores o influe. Esta trae du vantajes per un lingua aidante cual ave un orijina etimolojial romanica: lo es fasil aprendable per persones ci parla engles o linguas romanica; lo pote aida persones a continua aprende engles o linguas romanica, cual es multe atraosa de un perspetiva utilitariste.
La conserna final es: esce on nesesa un orijina pur? En mea opina, un orijina asoluta pur es plu ca nesesada, ma un orijina pur es serta plu bon ca un orijina nonpur. Perce engles usa tan multe parolas, spesial acel parolas con la mesma sinifia o con sinifias simil? Si tu conose engles plu, tu ta vide ce la nonpuria de la vocabulo engles es un causa major. Un sinifia pote es espresada con un parola de engles antica, un de nordica antica, un de franses, un de latina, un de elinica, e tal continuante, alora aprendores dole sola car los nesesa memori totas de esta parolas.
Esperanto regarda la linguas romanica como sua orijina la plu bon, como cuasi tota linguas aidante. Ma evidente, comparada con linguas pos lo, esperanto no es sufisinte “romanicin” — lo atende otra linguas european ance, spesial deutx.
A un lado, la lia entre esperanto e linguas romanica pote trae potias grande. Ma a la otra lado, esperanto adere se a la periferia de linguas romanica, causante la manca de sistemosia en la vocabulo e la rompe de la cor romanica vera. Par esta causa, la parolas de esperanto no es tan fasil aprendable. Lasa ce nos analise plen la problemes en la desinia de la parola esperanto.
Comensa con la etimolojia. Esperanto es xef fundida sur linguas romanica, engles e deutx, ma sua modo de eleje e altera parolas es pico acaso e sin bon esamina, alora la relata entre parolas esperanto e parolas orijinal es oscurida.
Plu o min, engles no vole cambia sua ortografia per la interesa de la reconosablia etimolojial. Si un parola usa <ph> per /f/ e <ch> per /k/, lo veni evidente de elinica. Ma esperanto no reteni la spele en la orijina etimolojial, en loca eleje la spele en linguas moderna e cambia lo par sua pronunsia; un esemplo tipal es la cambia de <s> a <z>. Esta fa ce multe parolas “diverje” de sua orijinas.
La compara a su es entre formas esperanto e engles:
Estas es sola un parte de la dana causada par la regula de <s> -> <z>. Otra modos de altera ave un efeto simil, per esemplo, promesi “promete” e komisii “encarga” comparti la mesma radis mit- (cual sinifia “envia” en latina).
An si parlores de esperanto dispone multe afisas per la crea de parolas, afisas comun en linguas natural como con-, ex-, in-, re-, pro-, pre- etc. no es considerada como afisas. Si un parola conteni un afisa natural, la afisa deveni un parte de la tronco esperanto. Per esemplo, la tronco de revizii es revizi-, la tronco de ekzemplo es ekzempl-. Totas es unias minima nonseparable, cual ajunta mil montones de “troncos” a la vocabulo esperanto.
Otra ca la veses cuando la troncos basta, on ave veses cuando la radises manca. Parolas de la mesma radis en linguas natural deveni un gaxa en esperanto. La esemplo la plu tipal es como esperanto trata parolas cual veni de mit:
Si, engles e linguas romanica oscuri plu o min la relata entre la radis mit e parolas derivada de lo. Ma esperanto usa send- de engles per la sinifia de mit “envia” mesma. En ajunta, on ave du tipos de spele per la parte a dorso: -misii e -mesi. Alora lo es nonposible ce on vide la relata entre la tre parolas notada.
Cua es plu interesante es ce esperanto ave komisiono “comision”. Lo debe veni de commit, ma aora lo ave un tronco nondependente cual no acorda con la norma fundal per -tion. En esperanto, -tion de engles debe deveni -cio o -sio como en stacio e profesio. Komisiono es un eseta.
La rompe de relata etimolojial apare frecuente en esperanto, spesial aceles de latina: konduti (conduct, “condui”), precipa (principal “xef”), rezigni (resign “resinia, renunsia”), agrabla (agreeable “gustable, plasente”), abstini (abstain “asteni”)… Tal parolas prende un proportio grande de la vocabulo esperanto. Troncos nova e nonesesada es pesosa per aprendores; radises mancante dana la lojica de crea de parola; e speles diferente per parolas de la mesma radis fa ce aprendores no pote comprende la relata entre los, donce los debe memori los nondependente, probable con malspeles. Par esta causas, la vocabulo de esperanto deveni un vera ostaculo.
[¹] La autor insiste usa la leteras major “L”, “F” e “N” en sua testos orijinal.
Esta paje es presentada con la lisensa CC Attribution-Share Alike 4.0 International.
Lo ia es automata jenerada de la paje corespondente en la Vici de Elefen a 5 junio 2025 (18:19 UTC).