Capitol oto: Sur la comunia de esperanto e promoves esperantiste

En esta esajo, nos va discute la sujeto final, cual es ultra la desinia de lingua mesma. Esce esperanto pote susede en la futur? Cual cualias la comunia e cultur de esperanto ave? Cua es la espetas de la esperantistes sur como sua lingua ta developa?

Me vole dona direta mea opina: la comunia de esperanto no va grandi o peti; lo va continua esiste como un grupo plu o min nonpopular estra si sua state de “xefia” en la comunia de linguas construida es prendeda par un otra lingua.

Par cual razona ce me dise tal? Lo es un conclui de fatores multiple, en fato, pos ce me regarda mea sabe sur la istoria de esperanto, mea impresa a esperantistes otenida par asconde en la comunia, e mea resenia a la cosa la plu importante — la desinia de la lingua. Asi, lasa ce me fa un profil de la comunia esperantiste.

Multe lejores ta es curiosa: si esperanto ave tan multe defetos e reseta tan multe criticas, la esperantistes, an Zamenhof mesma, debe conose ce esperanto no es bon. Alora perce los no cambia la desinia de esperanto?

Lo es vera ce esperanto ia reseta un colie grande de criticas a alga anios pos la publici de la libro prima sur esperanto, e on ia ave un apela plu e plu forte demandante ce esperantistes reformi sua lingua. An tal, la projeta de reformi par Zamenhof en 1894 ia es rejetada par la comunia. Esperantistes tarda saborea esta aveni e usa lo como un razona per ce esperanto no debe es reformida.

Perce los ia rejeta lo? Si tu es interesada, tu pote vide la article de “esperanto reformida” en Vicipedia engles e vide como radisal ia es la projeta. Ma la problem major no es la projeta mesma, ma la comunia estra linguistica — de 1887 cuando la libro prima ia publici a 1894, la comunia de esperanto ia ave ja sinco anios de developa, alora on ia ave un grupo de un grandia sustantial en Europa. Los ia abitua ja a la aspeta orijinal de esperanto, donce cualce projeta de reformi ia debe es nongustada par multes. Imajina, si la Comision Nasional per Linguas[¹] anunsia ce los va fa un reformi total per xines, no sola cambia la usa de un o du sinias, ma ance cambia sistemosa la gramatica fundal e la pronunsia. Esce la xineses ci parla bon sua lingua per multe anios vole aseta lo?

On no pote reveni pos ce on traversa la Rio Rubicon, e simil, un lingua no pote reformi a grado grande pos ce lo nase. Un lingua pos esperanto nomida glosa ia aprende de esta leson. La creores de glosa an ia colie un grupo de probores per formi la comunia de “varia de beta”, e vide sua reportas sur la cosas nonconveninte, nonlojical o nonrefinada de la lingua. Ma car glosa ia veni tan tarda, lo developa un comunia grande nunca.

La formi rapida de comunia e un esperia susedosa de rejeta reformis ia fa ce esperanto deveni cresente conservaliste. Esta raconta dise ce la cualia de un lingua construida depende sola de como la creor fa la taxe a la tempo la plu temprana.

Esente un creor de un lingua construida, Zamenhof ia es no plu ca un amator. El ia ave alga brilias e ideas strana ma bon, ma el no ia ave multe sabes linguistical e comprendes jeneral de linguas. La plu de esperantistes naseda pos la mori de Zamenhof loda mera sua personalia e aspira nobil, e loda apena sua sabes linguistical.

No como Zamenhof, multe de reformistes de esperanto es linguisticistes, incluinte Profesores Louis Couturat e Otto Jespersen ci ia crea la lingua ido. La disposa sempre plu conservaliste ia resulta un divide grande de la comunia de esperanto — en 1907, reformistes ia abandona esperanto e comensa promove ido. Ido vade a la via naturin, alora la difisilia de aprende ido no es plu peti ca aprende esperanto an si lo solve alga problemes evidente (pe. leteras con xapo). A la fini, la potia e reputa de ido fali completa suprapasa esperanto, e sua developa es an min susedosa ca interlingua, un lingua plu estrema naturin. Ancora, esperantistes senti coler a la esiste de ido, e los ave un plaser odiosa sur la fali de la promove ido.

Zamenhof no es nonrelatada a la disposa conservaliste de esperanto ance. Lo ia vive 30 anios entre sua publici prima e mori en 1917 en la Gera Mundal Prima. Esperanto es sua obra, donce el ia ama esperanto plu ca cualce otra lingua. Tota “defetos” es malnomida en sua oios — los asentua vera la belia e flexablia de esperanto. Per esemplo, cuando algun ia critica ce la letera <j> no pare bela a la fini de parolas, Zamenhof ia responde en un parla: “Tan malfortunosa es la letera J, cuando lo es usada en elinica elegante, nun osa critica; ma en esperanto, nosa oposores vide lo como la causa de tota cosas orible!” (En fato, on no ave la letera J en elinica.[²] Esta refleta como povre ia es la sabes linguistical de Zamenhof.)

Par esta causa, la projeta de reformi en 1894 ia es en efeto un cosa nonvoleda; la apela forte ia forsa Zamenhof a reformi. Si Zamenhof, la creor de esperanto respetada par tota esperantistes, no ia vole un reformi, alora esperantistes comun ia oteni un determina plu forte de rejeta tota reformis.

Contrargumentas a la cexas, criticas e apelas de reformi apare aora e alora. La razonas de esperantistes no es nova: esperanto es ja un lingua natural, si tu vole cambia, lasa ce lo evolui natural! Par contrasta, la 16 regulas fundal e cua es scriveda en Fundamento de esperanto es regardada como comandas par la Dio, e esperantistes no debe vade contra los — ma los es esata do persones estra la comunia de esperanto cexa e critica la plu. Serta, lo no es posible ce evoluis natural afeta la cor de esperanto, sin depende de como criticores repulsa los.

En tal modo, esperantistes reforti la unia e fida en la comunia tra divides, criticas e atentas de reformi pos lunlotra. Lo es vera ce la multe defetos es ance un metodo per “filtro bidirijal” — si on no gusta esperanto, an si on atenta aprende la lingua, sua abandona de aprende es multe probable. Ma aceles ci no pensa ce esperanto es mal e aprende lo bon, per dise, los ci pote es nomida “esperantistes”, ave un zelo natural a esperanto e un fida sin egal a la comunia de esperanto.

La polali grupal fa ce la comunia de esperanto deveni insestal, e la eco de aspeta e fratia esperantiste fa ce la comunia de esperanto deveni un organiza cuasirelijial. En ajunta, esta “relijio” opera en un modo simil a relijios vera: credores es obligada a promove la crede. Esta es la ata nomida movado, per dise, la promove esperantiste. Lo es diseda ce esperantistes no debe es contente par la state presente; los debe luta per la gol ultima de esperanto — fa ce esperanto deveni la lingua du de tota persones de la mundo. Per ateni un gol tan corajosa, la taxe a presente es: lasa ce plu persones sabe la esiste e beneficas de esperanto, e convinse los a junta se a la comunia de esperanto. La situa la plu bon es ce tota comensores pote aprende esperanto bon e deveni esperantistes bon, alora manteni la estende es la lingua, traente nos plu e plu prosima a la Fina Venko “Vinse Final”.

Ma on ave sempre plu ca un vose en la comunia de esperanto. Par mea esperia en comunia de esperanto, on ave sinco tipos de esperantiste.

Numero un, la veteranes. La plu de los ia deveni esperantistes en la ondon de “mania esperanto” en la desenio 1980. Los es capitanes con multe anios de esperia, e los ama zelosa la lingua. Ma sua disposa mental e modo de ata es de stilo vea, e poca de los aprende linguas otra ca esperanto (a la plu, aprende engles), e los va senti nonfelis si tu critica esperanto ante los. Multe veteranes de esperanto no es interesada par problemes gramatical car los pensa ce “si on pote comunica con un gramatica rompeda, lo no es vera rompeda”, donce los no pote comprende la cexas par aprendores nova, an ataca los. (La veria es ce sua sabes de esperanto es a un nivel tan alta ce los vide ja cualce tipos de asentua, tipos de frase e parolas, donce los no vole atende tro multe cua los regarda como detalias, per esemplo, la gramatica.)

Numero du, la jovenes. Los es ativa, pasionosa e vole aseta cosas nova. La plu de los pote parla esperanto bon, ave sabes vasta de campos variosa, e aprende probable un lingua stranjer otra ca engles e esperanto. Ma los es ance multe resistente a criticas. La du tipos de persones dedica se a la promove esperantiste, per esemplo, los aveni frecuente ativas, reunis e lesones de esperanto.

Numero tre, la burocratas. Esta es un grupo plu comun en Xina. Los dedica se a la promove esperantiste ance, spesial, los vole un posto en organizas como la asosia esperanto local. Ma los ave poca sabes esperanto. Un esperantiste vea ia dise a me ce en alga areas de Xina, la presidentes de asosias esperanto local es sola par nom: acel persones gusta comanda la taxe a otra esperantistes, ma los mesma pote sola dise saluton “alo”. Los es, en esperanto, salutonistoj.

Numero cuatro, la linguistes. Aprende linguas es sua amato, donce la plu de los no gusta esperanto e critica lo, an si on ave alga persones ci deveni la numero du car los reconose la estetica de esperanto o amira la aspira de esperantistes. Per un linguiste, esperanto es mera un otra lingua entre la miles de linguas de la mundo, donce los no va vade distante. Los sabe alga cualias de esperanto, vaga en la comunia per alga tempo, poi parti, spende sua enerjia a otra linguas plu gustada. Me es un caso separada: poca persones vole studia esperanto a grado tan intensa.

Numero sinco, la comunores. Los atenta aprende esperanto, ma no pote parla la lingua tan bon como la numero du, cisa car sua zelo o intelijentia no sufisi, cisa car los no ave multe enerjia per aprende, o cisa car los senti vera la difisilia de esperanto. Ma los es interesada sempre par esperanto an con totas, donce los deveni eternaj komencantoj “comensores eterna”. En comunias de esperanto enlinia, los sola vide silente la comunia entre otra persones, e apena espresa sua pensas.

Per dise jeneral, la numero tre pote es iniorada, e la plu de conflitas en la comunia es entre la numero un, du e cuatro, e la resultas es comun ce la numero cuatro parti o deveni numero sinco. Esta es como conflitas es calmida a la plu de veses. Cada critica par un aprendor es supresada par esperantistes en furia; los susede a cada ves mera car sua cuantia es grande. La plu de criticores no sabe la esiste o vantajes de otra linguas aidante, e los batalia solitar, donce la supresa de criticas va aveni a ves pos ves. No cosa va cambia.

A fini, lasa ce nos discute la “taxe de misionores” — la promove esperantiste. Per la Vinse Final, esperanto debe es enseniada a otra persones. La plu de aprendores de esperanto es sin ensenior. Los aprende con la aida de lesones enlinia, libros o locas ueb como Duolingo. A alga veses, asosias local o universias ta aveni lesones de esperanto con fas a fas, e estas pote atrae persones estra la comunia a sabe esperanto.

Donce la cosa la plu importante de la promove esperantiste es como on lasa ce otra persones sabe esperanto, e convinse persones ci sabe esperanto ja a aprende la lingua. Per masimi la posiblia de susede, esperantistes crea multe mitos malgidante, per esemplo la diseda la plu clasica, “esperanto ave sola 16 regulas gramatical”. Plu mitos inclui “on nesesa aprende sola 500 parolas” o “on nesesa un o plu anios per aprende un otra lingua, ma per esperanto on nesesa sola alga menses”.

A pos, me oia parla de esperantistes ce esta mitos es vera, ce la cuantia de 500 es traeda par un analise de multe conversas nonformal. Si, on ave fatos suportante la “500”, e on ave ance fatos suportante la “16 regulas gramatical”. Ma esce on pote sinsera nomi se un esperantiste si on sabe sola 500 parolas e 16 regulas gramatical? O esta person es vera un salutonisto ci pote mera fa conversas multe simple, per esemplo salutas o demandas de vila-de-nase e amato?

Cisa nos pote dise ce on pote es un avieta de esperanto pos cuando on aprende 500 parolas e 16 regulas gramatical. Ma esta no conforma a la promove, do esperantistes dise ce tu pote conose la lingua “completa” pos aceles. Esta es la causa ce multe aprendores cria “esperanto truci me!” pos la comensa de aprende.

An con tota, a la perspetiva de la popla global, lo es evidente ce esta lingua es ancora multe nonpopular an si nos conta tota persones ci oia de sola la nom “esperanto”. On ave min persones ci vole sabe plu informa de esperanto; on ave min e min persones ci atenta aprende esperanto; on ave min e min e min… persones ci pote parla esperanto bon. La cuantia de esperantistes es pico. Par esta razona, me opina ce esperanto va es sempre un grupo nonpopular cual no pote grandi plu.

Cisa esta es la destina comun per tota linguas aidante. Ma lo es ance vera ce esperanto no es tan simple e fasil aprendable. Lo ave multe defetos cual fa ce la majoria de aprendores fali deveni esperantistes. A la comensa, aprendores es zelosa, ma pos alga lesones, los senti plu e plu ce esperanto es distante de la aspeta perfeta en la promoves, donce tra alga tempo los ama la lingua min — los no deveni esperantistes no dise la beneficas de esperanto a otra persones. La promove par reputa es mancante. En ajunta, si un aprendor critica o sujesta reformi la defetos de esperanto en un cexa, el ta es repulsada e reproxada per esperantistes, donce la reputa de esperanto ta deveni plu mal car esta aprendor no vole dise cualce cosa bon per la lingua.

Ma ancora, con la unia, fida e zelo alta interna, e la fato ce on pote sempre trova amirores nova, la comunia esperanto no va diminui fasil. Realiste, esta es la futur de esperanto.

Du ideas oposante lunlotra esiste: Raŭmismo “idea de comunia” e Finvenkismo “idea de la Vinse Final”. La defini de la Vinse Final es ja notada a supra. Par contrasta, Raŭmismo reconose la valua de la comunia mesma plu, promovente ce un sirculo unida e fratin de amatores es la forma la plu bon per la comunia de esperanto en la futur. Esta es ance un disposa de alga esperantistes contra criticas: sin depende de sua defetos, la lingua sempre ave sua regardores e aprendores, alora como usosa es tua criticas?

An tal, longo mea oserva, la majoria de esperantistes opina ancora ce Finvenkismo es coreta. De la promove, a la aprende, a la comunia, la idea de “esperanto es un lingua xasante la unia de tota umanas” aborda cada aprendor. De la punto de vista de la plu de esperantistes, la crese de esperanto conforma serta plu bon a sua espeta mental ca mera adere a un sirculo peti. Par esta razona, la promove esperantiste sesa a no tempo.

Donce, como un criticor, me va judi esperanto con la criterios de Finvenkismo. Esce lo es asetable como un lingua de mundo? Esce lo es la plu bon entre tota linguas natural e construida? Si no, cual cosas lo fa mal?

E perce me critica esperanto? Me va esplica mea razona en la esajo final de esta serie.

---

[¹] Un comision su la Ministreria de Educa xines cual regula putong e otra linguas parlada en Xina.

[²] En elinica multe nomes plural fini con -αι o -οι, cual ave la sona /aj/ e /oj/. Ma lo es ancora vera ce elinica no ave J… La letera roman con un curva.