Algas ia fa mil montones de tipos de critica contra esperanto, ma la plu de los consentra sur sola alga cualias spesifada, per esemplo, en la lingua on ave opinas sur la “leteras con xapo”, sufisa femin, acusativa, e tal cosas; estra la lingua on ave comentas sur ce esperanto es sin cultur dependable, ce esperanto no ave potia political, ce esperanto no pote defia la posto de engles car lo es tro nonregardada, e tal continuante. Me no fida la vinse de la promove de esperanto como otras, an tal la plu de sua criticas pare nonconveninte en mea opina. Criticas sur esperanto es un rexerca, resoma e resenia sur la desinia de la lingua e la comunia e promove estra la lingua. Me espera ce esta serie pote aida la lejores ci es interesada a linguas internasional sabe plen la problemes vera de esperanto.
En la article prima de la serie, nos va comensa con la contribuis e atenis de esperanto. Multe persones, egal si en o estra la comunia de lingua construida, burla o despeta esta lingua. Lo pare ce los no sabe la fato: esperanto es un lingua pico susedosa an si a grado peti, si no, on nunca oia de sua esiste.
La eda oro per esperanto ia pasa a multe tempo a ante, ma no person pote valida iniora sua influe an en esta dia. On ave organizas e grupos de ativistes de bon grandia en cada pais de la mundo. Avenis de esperanto es abundante, e esperantistes promove sempre sua lingua amada con pasion nonfatigable par avenis, reunis, asemblas, e cursos enlinia o en salas de clase. Plu, tra tota la istoria on ave un cuantia sufisinte de esperantistes. Los ia crea un corpo rica e developa la lingua bon e temprana, donce esperanto ia monopoli la majoria de proportio (de un mercato multe peti, serta), e sua vantaje permane oji. Tota otra linguas aidante internasional es forsada a vive su la ombra de esperanto. Tota persones en la comunia de lingua internasional nesesa plu o min discute esperanto. Esta es la capasia de la lingua.
Si esperanto es tan potiosa, perce pico persones comun sabe lo, no dise la gol de sua nom, pd. deveni un “lingua de mundo” vera? (La nom esperanto sinifia “el ci espera”. “Lingua de mundo” es un era en tradui xines.) Responde esta demanda es la ojeto de la serie, e me va fa analises completa en esajos pos la prima.
Asi, lasa ce nos familiari con sua fortias ante sua defetos.
On pote divide cada lingua a tre composadas esensal: pronunsia, gramatica e vocabulo, con un composa nonesensal: sistem de scrive o ortografia. Cada aprendor de lingua stranjer va aprende sua pronunsia e sistem de scrive prima, alora la gramatica e vocabulo, e la capasia de aplica lo en situas real.
—–
La contribui prima de esperanto es reali la gol de “acorda entre pronunsia e ortografia”, e an ultra lo a la gol de “coresponde a lunlotra entre fonemes e grafemes”.
Perce la acorda es tan importante? Studiantes en Xina ci aprende ja engles debe ave un esperia profonda sur esta cosa: cuando los encontra un parola nova de engles, los no pote serti sua pronunsia e nesesa la aida de la alfabetas fonetical en disionario.
A anios resente plu e plu persones loda la metodo de “spele natural” a engles, reclamante ce lo lasa aprendores a pronunsia coreta cualce parola sin aida de un transcrive fonetical. Esta promove es serta estravagante — on pote trova noncoeres a tota veses en la spele engles cual es nondescrivable par sola un colie de regulas completa. Per esemplo, nos sabe ce <o> es pronunsiada par /əʊ/ en silaba abrida, vide la <o> en mobile; la mesma letera es pronunsiada par /ɔ/ en silaba cluida, vide pot. Ma nota bon, a veses <o> pote es /ʌ/, como en love, e en casos estrema on pote trova an /i/, como en women. Lo es evidente ce la metodo de spele natural no es capas de solve la problem de la coresponde per tota parolas engles. Sin depende de la cuantia de regulas, la persento masima de parolas solveda es mera 80% o 90%. Si on nesesa xerca la disionario per transcrive fonetical a un ves a cada des parolas, alora me teme ce esta colie de regulas, cual nesesa multe labora a aprende, no pote sasia nosa espera.
Si, engles es bizara entre linguas cual usa la alfabeta roman, ma la fenomeno de noncoere esiste ance en otra linguas, e franses es un bon esemplo. On pote dedui la pronunsia coreta de la plu parolas franses scriveda, an con la esetas minor, per dise la <s> pronunsiada en bus. Lo es la dita cual disturba aprendores de franses plu, de cual la difisilia es grande par causa de la vera multe omonimes — per /sɛn/, on debe scrive seine la rio, o scène la sena?
Estra engles e franses, cisa otra linguas fa un taxe no mal, ma esperanto ave un aspira ultra “no mal”. Lo vole un coresponde a lunlotra entre fonemes e grafemes (cual es reputada como nonesesada par multe projetas de lingua aidante futur, donce los no segue esta prinsipe) — un letera ave sola un modo de sona, e un sona coresponde a sola un letera. Sin considera la problemes a la sistem de scrive e ortografia de esperanto, la coresponde rijida es asoluta un benefica per los ci es noncontente par la spele engles. Los pote sabe como pronunsia un parola direta cuando los vide sua spele, e la dita pare min desplasente. Linguas aidante pos esperanto reconose la benefica de esta prinsipe, donce an si tal coresponde a lunlotra entre fonemes e grafemes no es realable, a la min los debe ave un acorda bon entre pronunsia e ortografia (con eseta de interlingua cual xasa naturisme estrema). Lo es un contribui major de esperanto sin duta. Ma volapuk, un lingua naseda ante esperanto, ia ateni la coresponde a lunlotra. Par esta razona, lo pare ce la merita de esperanto a spele no es tan grande.
Xices ci aprende engles debe consensi la importa de categorias sintatical en la lingua. An si engles deveni gradal un lingua analisal e la bordas entre categorias deveni cresente nonclar, on pote judi ce la parola es un nom con sufisas como -tion, -ment, -ity, -ture o -ness, e ce la parola es un ajetivo con sufisas como -ous, -able o -ful. Ma parolas plu fundal no conteni tal sufisas per marca, alora sua categorias sintatical esije recorda individua. Esta no es la sufri la plu mal, me teme, ma la converti entre categorias es. Cual sufisa on debe usa si el vole converti un nom a un ajetivo? El pote sola usa -ous, como en dangerous, si? No, car alga parolas usa otra sufisas, compara wood > wooden e sense > sensitive. (E on ave sensitive contra sensible, awful contra awesome, ajetivos en un duple cual ave sinifias oposante per cada, un tal dole de testa per multe studiantes!)
La uniformia de marca de categoria sintatical es un crea sinifiosa par esperanto. Lo fasili enorme la aprende de vocabulo, per esemplo tota nomes fini con -o, donce on sabe “lo es nom” a la regarda prima. En ajunta, lo elimina la distingui iritante entre masia e feminia car los es uniformida a la coda unuple.
La uniformia de coda jenita la uniformia de cambia morfolojial — plurali usa sola -j, acusativa usa sola -n, donce esperanto no ave formas plural nonregular esijente resita. Per verbos, la tempo presente sola usa -as, la tempo pasada sola usa -is, donce esperanto no ave verbos nonregular ance. Doles de testa multiple es evitada en esta modo.
La nonesiste de nom, verbo e ajetivo nonregular trae la lingua a un nivel asurda simple, cual cisa es un aspira comun de la majoria de aprendores de linguas stranjer, donce lo deveni la cualia la plu atraosa de esperanto. Ma lo pare ce otra linguas aidante no acorda, e multes no erita la prinsipe de coda regular, en loca misca denova la formas de nom, verbo e ajetivo.
La coda uniforma fa ce esperanto ave un vocabulo regular. Lo crea un spasio per la crea de parolas usante prefisas e sufisas ance.
Un tronco es un parola esperanto sin coda. On pote sutrae la coda infinitiva -i de instrui “ensenia” e oteni sua tronco instru-. Ajunta un sufisa e coda nesesada pote crea fasil un parola nova. Ajunta -ist- “un person ci fa la ata” con la coda de nom -o ta crea instruisto “ensenior”. Sufisas pote cumula, alora instruisto pote combina con la sufisa -in- “fem” e dona instruistino “ensenior fema”.
On usa prefisas en modo simil a sufisas. La prefisa la plu comun es mal- cual nega la parola. Lo es usada con multe parolas, spesial ajetivos, per esemplo granda “grande” pote deveni malgranda “peti”, proksima “prosima” pote deveni malproksima “distante”. Un otra prefisa disponable es ek- “comensa”, como en eklabori “comensa labora”.
No como linguas natural, la afisas de esperanto no es variable, alora on no nesesa sufisas multiple como -able e -ible en engles per un sinifia “capas”. Esta es un otra punto de la regularia de esperanto.
La crea de parolas con afisas mostra un vantaje grande, e linguas aidante futur es instruida par esta prinsipe a grado sustantial. Ma a la otra lado, alga afisas causa disputas sever sur la lingua. Per esemplo, esperanto ave sola sufisa de feminia -in- ma no sufisa de masia e on pote usa la tronco con coda direta per un cosa mas, cual causa suspeta de sesisme.
Esce esta es bon es disputada par multes, incluinte me. Ma per esperantistes de eda vea, la cualia ia es un causa major per los a refusa volapuk e abrasa esperanto — spesial considerante ce tota de los ia es european.
La “tolera etimolojial” de esperanto es un capasia bon de inclui parolas stranjer a sua vocabulo mesma. Si un parola de un otra lingua no ave corespondente en esperanto, lo ta deveni un parola nova esperanto. Si on no sabe como dise “ospital”, el pote prende hospital direta e ajunta la coda de nom -o, alora un neolojisme hospitalo es comfortosa naseda. Mera pico parolas ia es creada par Zamenhof a la comensa, par esta causa multe parolas en la vocabulo de esperanto aora es gradal ajuntada par parlores en la futur.
La orijina de parolas esperanto es la linguas romanica (latina, franses, espaniol, italiana), engles, deutx e rusce, e esperantistes de eda vea en rejiones do esta linguas es parlada ia pote introdui parolas de sua linguas prima — No sabe como dise alga cosa en esperanto? Dise lo como me dise lo en mea lingua prima! Si, tal tolera etimolojial ia fa ce europeanes ia enama rapida a esperanto a cuando la lingua ia nase nova.
Contra esta, me pensa ce la tolera etimolojial es cada cosa estra un bon cosa per persones noneuropean. Multe neolojismes ia ta pote es formida con elementos nativa de esperanto. Per esemplo, on dise ance “ospital” par malsanulejo (mal-san-ul-ej-o, “non-sana-person-loca-[nom]”, do san- es la tronco e mal-, -ul- e -ej- es afisas) en loca de hospitalo. Me va discute plu detaliosa la problemes de vocabulo en esajos pos esta.
—–
La cosas ja notada es la contribuis par esperanto a la desinia linguistical de linguas aidante, entre cual la desinia de codas e afisas es la plu lodable en mea opina, e es prinsipes la plu cabente a refere e aprende par linguas aidante futur. Ma estas es la sola bones e contribuis a la nivel de linguistica pur, me teme, e otra cualias gramatical, per esemplo la sintatica, es an considerada como la nonvantajes de esperanto. Si on dedica se a aprende esperanto mera car lo ave codas e afisas regular, pos alga lesones on ta trova sua naivia. Me va esplica total la problemes de esperanto en esajos pos esta.
Esta paje es presentada con la lisensa CC Attribution-Share Alike 4.0 International.
Lo ia es automata jenerada de la paje corespondente en la Vici de Elefen a 5 junio 2025 (18:19 UTC).