Cuando la tigre tufa tra la aira en dirije a el, Za usa la sola posible cual el dispone. El core, no a retro ma a ante, su la bestia atacante, e, con tota sua fortia, el fa ce sua axa grande de petra colpa la lado de la creada.
El senti la lama pumi contra sua ojeto. La tigre xilia en furia e dole. Sua pesa intera cade sur el, puxante el a la tera.
Za atenta aranca sua axa a retro per fa un colpa matante a la cranio, ma sola la manico libri. La axa es rompeda…
A la Dotor e la otras, lo pare ce tota aveni en un nebla confusante de rapidia. Los vide la bestia grande saltante, puxante la abitor de cava a la tera. Los oia la tigre xiliante…
En un lampi de pelo jala, lo tira se a via e desapare en la foresta, lasante la forma de la abitor de cava covreda de sangue e estendeda en la pradeta su la lus de luna.
La xica fa un cria grande de lamenta, e core per ajena a sua lado.
Ian sta subita. “Rapida! Aora es nosa momento. Ta ce nos fuji! Core!”
Par instinto, la otras obedi el – tota estra Barbara, ci sta ancora regardante la du figures.
“Perce tu esita?” – la Dotor cria.
“Nos no pote abandona los!”
“Seniora Wright, mea cara, los es savajes. Los ta mata nos con plaser. Recorda la cranios en la cava.”
“Sua atas pasada no importa. Los es ancora umanas.” Barbara comensa traversa la pradeta a do la xica sanglotante es ajenada a lado de la corpo nonmovente de la om. “Me crede ce el es mor. On ave no peril.”
“Barbara, reveni!” – Ian cria, corente pos el. “Aora es nosa momento per fuji.”
“Me va veni con tu, Barbara.” – Susan clama. El move per segue, ma la Dotor catura sua braso. “Tu va fa no tal cosa, Susan. Resta do tu es. Nos revade a la barcon!”
“No, Avo.” – Susan dise defiante. “Nos no pote lasa la xica asi en solitaria.”
La Dotor regarda tra la pradeta e dise con frustra – “Cual los fa? Esce los es loco?”
Acrupinte supra Za en un modo protejente, Hur leva ferose sua regarda cuando Barbara e Ian prosimi. “Resta a via!”
“Me ta regarda el.” – Ian dise.
“No. Tu va mata el.”
Jentil, Barbara tira Hur a lado en cuando Ian ajena a la corpo de Za.
“Lo es oce.” – Ian dise. “Me es tua ami.”
Hur regarda el con stona. “Ami?”
“Me va nesesa acua.”
“Acua?”
“Retrae acua a me,” – Ian dise pasiente – “per sua feris.”
Hur punta sua mano. “Ave un rieta – ala.”
“Mostra a me.” – Barbara dise firma, como si el parla a un aprendor esitante. “Tu ta dona tua teleta a me, Ian?”
Con murmuras babelante, la Dotor permete ce Susan gida el a los. “Es oce, Avo.” – Susan dise calminte. “Ave vera no peril aora.”
La Dotor ronca repulsada.
Susan basi sua regarda a la abitor de cava. “Como el vade, Ian? El es mor?”
“Tota no.” – Ian dise. “En fato, sua state es multe plu bon ca sua aspeta.” El prende la manico de la axa de Za. “Me debe suposa ce el ia lasa sua lama en la tigre.”
Barbara e Hur reveni en la pradeta. Barbara dona a Ian sua teleta saturada con acua, e Hur porta plu acua en un folia pliada.
Ian comensa lava la sangue a via de la feris de Za, cual revela pronto ce los es no plu ca un serie de talias profonda en sua braso e spala. “La plu de esta sangue es de la tigre.” – Ian dise.
Barbara punta sua dito. “Vide. El ave un feri peti en sua fronte – me crede ce la tigre ia aturdi el.”
Ian bani la feri, e Za jemi en velia.
Ian regarda Barbara con regrete. “Lo pare ce nos ia perde nosa momento per fuji. Me divina ce tua aparte es intera plenida con gatos e canes vagante.”
“Los es umanas, Ian.” – Barbara dise denova.
“Oce, me sabe.”
Ian leva sua regarda a la Dotor, ci sta grimante a los. “Esce tu ave furnis medical en la barcon? Antisepse?”
“Esta es asurda.” – la Dotor balbuta. “A un minuto, nos atenta desperante evade esta savajes, e aora—”
“Aora nos aida los! Me sabe. Tu es un dotor. Fa alga cosa.”
“Me no es un dotor medical, mea joven.”
“Avo, nos debe amini con los.” – Susan speroni. “Cisa los va aida nos.”
“Riable!”
“Perce?” Barbara dise coler. “Perce tu trata sempre cadun e tota como min importante ca tu mesma?”
La Dotor regarda sever el. “Me suposa ce tu crede ce tota tua atas es razonante, e ce tota mea atas es nonumana. Ma suposa ce tua judi es noncoreta en loca de lo de me! Si esta du savajes pote segue nos, la otras pote ance. Cisa la tribu intera va ataca nos en la momento seguente!”
“La tribu dormi.” – Hur dise.
“E la fem vea ci ia libri los, mmm? Cual el fa?”
“Tu razona bon, Dotor. Nos es tro esposada asi.” La Dotor acorda sasiada con sua testa – ma sua espresa cambia rapida cuando Ian continua – “Nos va crea un portaferida e porta el con nos!”
“Tu no proposa ce nos revade con el a la barcon?”
“Nos pote crea la portaferida con nosa jacones.” – Ian dise enerjiosa. “Barbara, Susan, atenta rompe un duple de ramos longa e reta a via de acel arboretas.”
Movente a via, Barbara dise – “Cisa la fem vea no va tradi nos. El ia aida nos. El no vole ce la otras sabe.”
“Tu crede ce esta persones ave lojica e razona?” – la Dotor dise furiosa. “Esce tu no comprende? Sua mentes cambia tan rapida como la note segue la dia. Cisa el informa la tribu intera a esta momento esata…”
A alga ora en la note, Kal velia, avertida par un instinto de peril. El regarda sirca se. Tota pare normal. Alora el vide ce Madre Vea ia parti. E Za e Hur… Alga cosa aveni. Si alga cosa aveni, lo relata a la stranjeres, sin duta. Za ia tradi el: el atenta obliga la stranjeres a dona a el la secreta de la foco.
Kal leva, con cotel en mano, e vade furtiva longo la via a la cava de cranios. El confirma sua suspetas cuando el vide ce on ia move la petra grande a lado.
El lisca tra la buco e vide con stona ce la cava conteni no stranjeres, e no Za. Sola Madre Vea reclina jeminte sur la tera.
Kal sta el par tira. “La creadas strana – do los es?”
“Los ia parti.” – Madre Vea dise, con un brilia de vinse en sua oios.
“Como los ia move la petra?”
“Za ia move lo.”
“Za ia vade con los? Dise a me, fem vea, dise!”
La fem vea punta sua mano a la retro de la cava. “Za e Hur ia segue la stranjeres. Tra ala. On ave un otra via.”
“La manos e pedes de la stranjeres ia es liada.” – Kal dise ferose. “Za ia libri los! Los ia vade con Za per mostra a el como on crea foco.”
“Me ia libri los.” – Madre Vea dise orgulosa. “Aora los no va crea plu foco. Nos va ave no plu foco!”
“Tu ia libri los?” Kal vide un fini de tota sua esperas – la perde de la secreta de foco, o la dona a Za – e tota par causa de esta fem vea interferente. “Tu ia libri los?”
Un onda de furia nonrazonante traversa el, e subita la cotel de petra en sua mano es fisada en la cor de Madre Vea.
La fem vea basi noncredente sua regarda a la cotel tra un momento, e alora el cade mor a sua pedes.
Kal estrae la cotel, moiada par la sangue de la fem vea, e puxa lo a su sua peles. El ta imajina alga cosa per dise a la tribu.
Ian es ocupada en mostra a Susan e Barbara como on improvisa un portaferida. “On pone la palos tra la mangas de la jacones en esta modo, vide…”
Susan ajena per limpi la fronte de Za, ma Hur puxa noncortes el a via. “No. El es per me.”
“Me ia vole mera aida el.”
Ian surie. “Me pensa ce el vide tu como un competor, Susan.”
Confondeda, Hur regarda sirca la grupo. “Me no comprende cualcun de vos. Vos es como un madre con un bebe. Za es vosa enemi. Perce vos no mata el?”
Ian dise – “Ma esta persones no comprende la compati o la amia. Esce tu pote esplica en un modo cual el va comprende, Barbara?”
“Nos va fa ce el deveni sana denova.” – Barbara dise dulse. “Nos va aprende a tu como on crea foco. Per intercambia, nos vole sola ce tu mostra a nos la via de revade a nosa propre cava.”
Un vose debil dise de la tera – “Escuta los, Hur. Los parla la veria. Los no ia mata me.” Aora Za es ja consensa, an si ancora aturdida.
“Me deveni ansiosa sur la pasa de tempo.” Ian dise. “Nos es ja multe tro longa asi. Cadun de nos es preparada?”
“Me es estrema side.” – Susan dise. “Me ta vade per bevi rapida?”
Ian acorda, e Susan traversa a Hur e dise esperosa – “Acua?”
Hur gida a la rieta, e Susan segue.
“Atende!” Barbara clama.
Susan regarda la Dotor, ci sta alga distante, en mal umor. “Tu desira acua, Avo?”
“No, me no desira lo!”
“Tu ta aida nos asi, Dotor?” Ian clama.
La Dotor crusa sua brasos e turna se a via.
“Iniora el.” – Susan dise, regardante pos se. “El condui frecuente tal, spesial cuando el no ia reali sua vole!”
Ian fini esamina la portaferida. Lo es importante ce lo es multe solida per porta la pesa de Za.
“Cisa la amini con esta duple ia es un bon idea.” – Barbara dise esperosa. “Cisa lo es aora an plu probable ce nos va susede revade a la barcon.”
Ian leva sua regarda de sua taxe, e vide ce la Dotor ia prende un petra pesosa e agu e es furtiva avansante en dirije a Za.
El sta saltante, e saisi la polso de la Dotor. “Cual tu fa?”
“Relasa me.” – la Dotor dise ofendeda. “Me ia vole mera demanda ce el ta desinia un spesie de mapa sur la tera, per mostra a nos la via de revade a la Tardis.”
Ian regarda la om vea tra oios pliada. De vera cuanto cruelia la Dotor va es capas, si el senti ce lo va salva la vives de el mesma e Susan?
El prende la petra de la mano de la Dotor e lansa lo a lado. “Lo es un bon idea, Dotor, ma me no crede ce la om es en un state conveninte per desinia mapas. Ta ce nos comensa pasea.”
Susan e Hur ia reveni ja de la rieta, e la Dotor regarda despetosa cuando Ian e la tre femes labora per rola Za a sur la portaferida. Los susede a fini.
“Tu ta aida leva la palos, per favore, Dotor?” Ian dise.
“Ma serta tu no espeta ce me va porta el?”
“Ma serta tu no espeta ce un de la xicas va fa lo?” Ian dise blanda. “Gida nos, per favore, Susan.”
Bolinte con coleria, la Dotor leva sua fini de la portaferida, Ian prende la otra, e la grupo peti move a via.
Kal ia velia la otras en la tribu, e los vaga de asi a ala en confusa estra la cava xef. “La stranjeres ia parti!” Kal cria. “Za e Hur ia vade con los. Nos debe segue los e reveni los.”
“Me no crede ce Hur ia aida la stranjeres evade.” – Horg dise.
“El ia vade con los, an tal.”
Horg secute sua testa en confonde. “Do es Madre Vea? El ia vade ance con los?”
“El senta silente en la cava de cranios.” – Kal dise. “Me ia vide el ala, ma el no ia vole move o parla.” Horg gida los a la cava de cranios, e tota de los foli la interna.
Madre Vea senta con gamas crusada, fisante sua regarda a no cosa, apoiante sur un piramide de cranios.
“El va dise a vos lo cual ia aveni.” – Kal dise. “Demanda.”
Horg estende sua mano e toca la spala de Madre Vea. El rola a lado, e cade rijida a la tera. “El es mor.”
En un vose forte e compulsante, Kal dise – “Mea oios mostra a me la avenis asi. Me vide imajes como cuando me dormi. Za e Hur ia veni asi per libri la stranjeres, per fura la secreta de foco per se. Madre Vea ia atenta para los, e Za ia mata el. Za ia vade con los. El regida los a sua propre arbor en intercambia per la secreta.”
Horg dise lenta – “La fem vea es mor. Za e la stranjeres ia parti. Serta, la avenis ia es como tua oios ia vide.”
“Me es tua gidor aora!” Kal cria. “Segue me, e me va gida vos a la stranjeres!”
Susan es la prima ci ateni la borda de la foresta. Puxante un via per se tra un scermo de arboretas, el regarda la plano oscur a ultra, e cria – “Ala! En acel dirije! Me vide la Tardis!”
La otras segue laborosa el longo la via. Par porta la pesa de Za, los ia caracolini sua progresa. Los ia nesesa reposas frecuente, e los ia pasa un tempo noncredable longa en ateni la borda de la foresta. Ma a fini los es asi, e la securia es vidable.
“Veni, Dotor!” – Ian cria. “Nos es cuasi a la gol. Nos ta fa sola la luta final.”
“Si, si, me suposa.” – la Dotor ronca.
“Barbara, ta ce tu e Susan retira la arboretas, afin nos ta traversa con la portaferida.” – Ian dise.
Barbara e Susan tira la scermo de arboretas a lado, e Ian vade prima tra la buco con la portaferida. Cuando el emerji sur la plano, el persepi la forma blu e cuadro de la Tardis direta ante se.
Subita, con teror, el vide un cuantia de figures grande, vestida en peles, ci veni de pos la Tardis e avansa en dirije a los.
“A retro!” Ian cria. Impedida par la portaferida, el retira torpe en la foresta, pivote, e vide ce un otra parte de la tribu bloci la curso.
La gidor ave un barba corta e protendente, e un cotel de petra es en sua mano.
Los es trapida.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 4 april 2024 (17:36 UTC).