UN ENFANTE NONMUNDAL
1 · 2 · 3 · 4 · 5 · 6 · 7 · 8 · 9 · 10 · 11 · 12

Capitol 10: Caturada

La tribu fa un discute.

La cuatro prisonidas recaturada sta ante Horg e la resta de la tribu, gardada par un sirculo de gerores, gidada par Kal. Za es ance ala, ancora sur sua portaferida improvisada, cual on ia pone sur la tera ante la roca de surfas plana. Hur ajena ansiosa a sua lado. Un spesie de prosede aveni, en cual Kal acusa Za e justi sua propre atas a la tribu.

La Dotor e la otras oserva atendosa, comprendente ce sua propre fortunas es probable ance en peril.

Kal conclui sua nara. “Za e la fem ia vade con la stranjeres – con nosa enemis! Me ia gida la otras, e nos ia para los… ia trae los denova asi.”

“La stranjeres no es nosa enemis.” – Hur dise. “Los ia salva Za de mori cuando la tigre ia ataca el asta la rieta.”

“Oia como la fem parla per la stranjeres.” – Kal grima.

“El e Za ia lasa los sorti de la cava de cranios, e ia fuji con los.”

“Tu menti!” Hur cria. “Madre Vea ia libri los.”

“Es Za tan debil ce sua fem debe parla per el?”

“Me dise ce Madre Vea ia fa! El ia mostra a los un otra sorti de la cava de cranios. El va dise!”

“La fem vea no parla plu.” – Kal dise. “El no dise ce el ia fa esta, o ia fa acel. Madre Vea es mor. Za ia mata el.”

Kal apoia a su, e saisi la cotel de petra de su la peles de Za. “Vide! On ave asi la cotel con cual Za ia mata el!”

Un ronca de coleria veni de la tribu.

Subita, la Dotor parla con vose forte e comandante. “La cotel ave no sangue sur se.”

Cadun fisa sua regarda a la cotel. Como la Dotor ia dise, la lama de petra es limpa.

Kal basi sua regarda a la cotel en sua mano. “Lo es un mal cotel! Lo no mostra la atas cual lo ia fa.”

La Dotor rie despetosa. “Lo es un cotel plu bon ca la tua.”

Kal lansa la cotel a la tera. “Me dise ce lo es un mal cotel.”

La Dotor punta sua dito a la cotel do lo reposa sur la tera. “Me dise ce esta es un cotel eselente. Lo pote talia, e lo pote colpa. Lo es un cotel per un gidor. Me ia vide nunca un cotel plu bon ca esta.”

“Me va mostra un plu bon!” Kal estrae subita sua propre cotel e estende lo. Lo es vera un bon cotel – e la lama es crostida con sangue secida.

La vose de la Dotor resona. “Tua cotel mostra la atas cual lo ia fa. Tua cotel ave sangue sur se! Ci ia mata la fem vea?”

Za leva se sur un codo. “Me no ia mata el.” El luta per sta se, e bambola de asi a ala tra un momento. “Kal ia mata el!”

“La fem vea ia libri la stranjeres!” – Kal xilia. “El ia mostra a los como on pote sorti de la cava de cranios sin move la petra grande. Me, Kal, ia mata el!”

La Dotor fa un paso a ante, estendente sua manos. En alga modo estracomun, el domina la asembla intera de la savajes. “Esta es vosa gidor forte, si? Algun ci mata vosa femes vea en sua furia? El es un mal gidor. El va mata tota de vos cuando el es coler.” El apoia se a Ian, e parla en sua vose normal. “Segue mea esemplo, mea joven!”

La Dotor curvi, prende un petra, e lansa lo a Kal. “Forsa el a via!”

Kal fa un ruji de coleria, e brandi sua cotel.

Ian saisi ance un petra e lansa lo a Kal.

“Si, forsa el a via. El mata femes vea!”

Hur saisi un petra e lansa lo. “Kal es vil! Forsa el a via!”

Alga bambolante, Za curvi e prende un petra. “Forsa el a via!”

Subita, tota es prendente petras e lansante los. Kal sta sin defende tra un momento en la bombarda de misiles, e alora el turna e fuji tra la oscuria.

“Bon fada, Dotor.” – Barbara xuxa.

La Dotor fa un surie autosasiada a el. “Un jua de enfantes, mea cara. Esta persones es egal propensada a isteria coletiva como los de tua propre eda.”

Lo pare ce la vinse contra Kal ia redona la fortia a Za. “Kal no parteni plu a esta tribu.” – el cria. “Nos va vijila el. Si el reveni, nos va mata el.”

Hur dise ansiosa – “Kal es forte, e tu es debil con tua feris. El va mata tu si el pote.”

“Recorda,” – Ian dise – “Kal no es plu forte ca la tribu intera.”

Za fisa sua regarda a Ian, como si el luta per comprende la idea nova. Final, el acorda con sua testa, plaseda. “Tota de nos va combate Kal si el reveni.” Za indica un de la gerores joven. “Tu va vijila el!”

La geror acorda con sua testa, e move a via de la cava, regardante la dirije en cual Kal ia fuji.

Pos restora sua autoria, Za turna a la otra gerores.

“Repone la prisonidas a la cava de cranios.”

Ian salta a ante. “No, Za. Me es tua ami. Gida nos a la loca do Kal ia trova nos, e me va crea foco per tu.”

Za iniora el, elejente otra omes de la tribu. “Nos va usa la petra grande per clui la cava denova, e tu va sta a un otra loca cual me va mostra a tu.” El forti sua vose. “Gida los a via!”

Omes de la tribu ensirca la Dotor, Susan, Ian, e Barbara, saisinte sua brasos.

“No luta.” – la Dotor clama. Ian opina ce esta es alga nonesesada, car un luta contra sua caturores bruta ta es intera futil.

On tira los a via.


Za oserva ce on puxa los en la cava, e vide ce on rola la petra afin lo presa contra la entra. El turna a un geror, e gida el a un grupo densa de arboretas prosima a la cava. “La otra sorti de la cava emerji asi. Si tu vide ce los sorti – mata los.”

En la cava de cranios, la Dotor e sua acompaniores sta e regarda sirca se en despera. Un fuji riscosa, un viaja longa e perilosa, e aora los es denova en sua loca de comensa, en esta cava repulsante con sua montones de cranios putrinte e sua apesta nauseante de moria.

Barbara vide la corpo de Madre Vea a retro de la cava, e fa un cria de teror. “Esta loca es vil!” – el sanglota. “Vil!”

“A la min on no ia lia nosa manos a esta ves. Alora, Dotor, cual nos va fa aora? Tu ave un idea briliante?”

La Dotor sta, perdeda en pensa, frotante sua mento. El leva sua regarda. “En fato vera, mea joven – si!”


Za e Hur sta prosima a la petra plana ante la cava grande, e conversa. Za ia regania ja cuasi sua carater normal. La marcas de gara a sua braso e spala ia sesa ja sangui, e el pote ja iniora los. Sua mente es plen de demandas.

“Dise a me cual cosas ia aveni pos cuando me ia combate la bestia en la foresta.”

“Tu ia es plu forte ca la bestia.” – Hur dise orgulosa. “Lo ia porta tua axa a via en sua lado. Tu ia reclina sur la tera, covreda con la sangue de la bestia. Me ia crede ce tu es mor.”

“E la stranjeres? Dise a me cual cosas los ia fa!”

“La om joven de sua tribu ia veni en dirije a tu. El no ia mata tu. El ia dise a me sua nom.”

“Sua nom?”

“El ia dise ce sua nom es Ami.”

“Me suposa ce los ia veni de la otra lado de la montania.” – Za dise pensosa.

“Ma no cosa abita ala.”

“Nos ia crede tal. Ma me vide ce nos ia era. Esta tribu nova veni de ala. Dise plu a me cual cosas ia aveni. Dise a me cual cosas la stranjeres ia fa alora.”

Hur grima, lutante per recorda. “Me no ia commprende los, Za. Los ia move lenta, e sua fases no ia es ferose. Los ia cura tua feris, e ia porta tu sur sua peles, como un madre porta sua bebe. Perce los no ia mata nos, Za? Nos ia es sua enemis. Nos ia prisoni los.”

Za leva noncapas sua spalas. “Los es un tribu nova. Los difere de nos, e ance de la tribu de Kal. Sua mentes porta pensas strana. La joven, el con la nom Ami, ia parla parolas strana a nos.”

“Me no recorda.”

Za grima con la labora de recorda. “El ia dise – ‘Kal no es plu forte ca la tribu intera.’”

“Me no comprende.”

“Lo es un pensa nova.” – Za dise. “Ma me comprende. Estra me, Kal es la geror la plu forte en la tribu intera. E me ia es debil. Ma la tribu intera ia forsa Kal a via con la petras. An la omes e femes vea, an la enfantes, ia es plu forte ca Kal, en junta.”

Za luta con esta conseta nova de colabora. “La tribu intera pote colie plu frutas ca un person. La tribu intera pote mata la bestias en la foresta, do un xasor solitar ta mori.”

“Sua mentes difere de nos.” – Hur acorda. “Cisa los veni de Orbe. Esta es lo cual la omes vea dise. Los dise ce nos debe redona los a Orbe par sacrifia.”

“No, los veni de un tribu ultra la montes. Los pote crea foco, ma los no vole mostra a nos, car nosa tribu ta deveni tan forte como lo de los.”

“Cual tu va fa con la stranjeres, Za? Tu va mata los?”

Za nega con sua testa. “Tua padre, Horg, dise ce la gidor debe sabe crea foco. Me no vole ce on forsa me a la foresta, como Kal. Me debe aprende crea foco. La stranjeres debe instrui me. Si no, los va mori.”

Za gami de asi a ala tra un momento, e turna alora a Hur. “Me va parla denova con la stranjeres.”

“Tu va demanda ce los mostra a tu como on crea foco?”

Za acorda con sua testa. “Me va fa multe demandas a los. Me va aprende de sua pensas nova. Me vole oia plu cosas cual me pote memori.” El regarda seria Hur. “Un gidor nesesa memori multe cosas!” Usante sua autoria como gidor, Za saisi un axa de la membro de tribu la plu prosima, e parti en dirije a la cava.


En la cava de cranios, Ian, laborante su la instruis de la Dotor, crea un spesie de arco usante un de sua cordetas de sapato e un peso flexable de lenio – un de la ramos a retro de la cava. Un peso de lenio longa e streta, como un flexa, es envolveda en media de la cordeta.

“Me espera ce esta va susede, Dotor.” – Ian dise. “Tu es serta ce tu no vole atenta lo?”

“Ma no, mea joven. Me ia furni mera la teoria. La pratica esije polsos forte e un pasientia nonsesante, e ambos manca de me.”

Barbara regarda la aparato con alga confonde. “Me ancora no comprende perce tu crede ce tu va crea foco con un spesie de arco e flexa simil a un jua de enfante.”

“On vide fasil ce tu no es un ensenior de siensa.” – Ian dise. “Enerjia deveni caldia, recorda. La intende es ce me va pone la flexa contra un bloco de lenio seca, e va jira lo, multe rapida, e tra un tempo multe longa. Tota mea laboras enerjiosa va converti se a caldia – e, si nos es fortunosa, a foco.”

“Me vide. La ata clasica de frica du bastos contra lunlotra?”

“Coreta. On dise ce cualce esploror joven ta pote fa lo. Me espera mera ce me es ance capas!”

Susan apare con un petra plata e ronda, con un depresa vacua en media – un spesie de bol natural. “Esce esta es tal como tu desira?”

“Lo es ideal.”

“Tu va nesesa un esca multe seca.” – Barbara dise. “Folias mor e erba vea debe conveni.” El trova un cuantia de ambos a retro de la cava. Atendosa evitante la corpo de Madre Vea, el retrae los.

“Bon.” – Ian dise. “Vide, me pone esta peso de lenio seca en la bol, nos densi la folias e erba seca sirca lo… tal… e nos comensa!”

Ian sta la flexa en la bol, con la punto a su, e usa un otra peso de lenio en sua mano sinistra per teni lo a la loca coreta. Par move la arco en sua mano destra en dirijes alternante, el comensa jira la punto de la flexa en sirculos sur la peso de lenio plana. El labora constante, e, pos un tempo corta, la punto ia formi un spesie de ranur. Sempre en sirculos, la flexa move sur la peso de lenio, ma no foco apare…

“An si vos espeta zelosa sirca me, acel no va aida.” – Ian dise iritable. “La ensende no va aveni direta, sabe. Probable, la taxe va dura tra la note intera!”


Za vade marxante a la gardor ci el ia lasa estra la sorti nova de la cava. “Me entra per parla con la tribu strana. Si cualce otra person sorti, tu va mata el.”

La om de tribu acorda con sua testa, e Za entra a la tunel.

En la lado de la colina direta supra la sorti, ave un cornisa de roca. Sur lo, Kal reclina. Sua oios arde plen de odia, e la cotel de petra es forte tenida en sua mano.

El basi un regarda anelosa a la gardor nonsuspetante – la sola ci sta entre el e sua retalia.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 23 marto 2024 (17:15 UTC).