UN ENFANTE NONMUNDAL
1 · 2 · 3 · 4 · 5 · 6 · 7 · 8 · 9 · 10 · 11 · 12

Capitol 5: La desapare

Ultra la porte, on ave un plano sombre e arenosa, con rocas enorme asi e ala. Lo estende asta la borda de un foresta densa e nonpenetrable. A sinistra, colinas alta e rocosa leva se per deveni la montes sierin distante. A via a destra, ultra la foresta, la brilia de un rio larga e lenta es vidable.

La plano es fricada par ventas cual fa un sona constante basa e jeminte, e la aira es fresca e fria. La sena es menasante e nonamin.

La Dotor ensofla vinsosa e dise – “Me no ave plu la tempo per disputa con tu, mea joven. Susan, me vade per colie alga samples nova.”

El gami a estra sur la plano, tan serta como si lo ta es la patio de bricabrac en la Rua Totters, e desapare pos la Tardis.

“Atende, Avo!” Susan clama.

“Ta ce nos sorti per regarda.” – Barbara dise. El pasea a estra.

Ian move en dirije a la porte e salteta. “Au!”

Susan reveni a el. “Como, Senior Chesterton?”

“Me es alga contusada pos la cade. No multe.”

“Veni, apoia sur me.”

Ian pone sua mano sur sua spala, e pasea rijida tra la porte. Lo clui pos el.

Granes grande de arena craci su sua pedes, e la venta trema el. La aira es fria ma noncredable clar, e, distante, el vide fasil la detalias definida de la foresta, la rio, e la montes.

“E aora?” Barbara demanda turbosa.

Ian nega con sua testa. “Un esplica razonada debe esiste – debe!”

En sua cor, Ian sabe ce sola un esplica es posible. Tota cual la Dotor ia dise a el es vera. Con sua pasos prima estra la Tardis, Ian comensa aseta la realia de tota esta situa estracomun.

La Dotor reapare subita de pos la Tardis, con aspeta notable iritada. “Lo es ancora un ciosco de polisia. Perce lo no ia cambia? Ai ai ai, multe disturbante!” Secutente sua testa, la Dotor gami a via e desapare pos un roca enorme, lasante Ian fisante el con regarda stonada.


La Dotor continua pasea tra alga distantia, sur un via cual serpe entre la petras grande, malumorosa sur la funsiona nonfidable de la Tardis. Recordante la intende de sua mision, el para subita, e trova se en un spesie de ensirca scermida de la venta entre du rocas grande. Desidente ce esta loca va sufisi tan bon como cualce otra, la Dotor estrae sua contador de Geiger, un peti libro de cuoro de notas, e un peneta.

El prende un frato de roca e comensa esamina lo con multe atende.

Pronto, el deveni tota preocupada par sua labora – e tota nonconsensa de la figur savaje, vestida en peles, ci regarda el de pos la rocas.


Entretempo, la acompaniores de la Dotor esplora cauta la area direta sirca la Tardis.

Barbara descovre la cranio de alga bestia grande, partal enterada su la arena, e el e Susan comensa libri lo par escava con sua manos. “Cual lo pote es, en tua opina, Ian?”

Ian aida los a move la arena de sirca la cranio. “Me no sabe. Lo no ave cornos. Lo ta pote es un cavalo o un servo – lo ta pote es cualce cosa.” Ian regarda denova la Tardis, cual sta blu e cuadro e nonconveninte – ma nonegable presente – a media de la plano arenosa. “Noncredable. Un ciosco de polisia a media de campania vacua. Lo tota no es lojical.”

Susan lansa un regarda a la Tardis. “Lo cambia normal sua forma.” – el dise pratical. “Me no sabe perce lo no ia fa lo a esta ves.”

“Lo fa normal como?”

“Cambia sua forma.” – Susan repete. “Lo ia es un colona ionian, e un seja portada… Lo ta debe es aora un roca o simil.”

“Tu vole dise ce la barcon desembla se, sempre do lo vade?” – Barbara dise.

“Bon, acel es la intende, ma, mera a esta ves, lo no ia aveni. Me suposa ce la sircuito de camaleon ia falta.” Susan sta. “Cisa esta cranio ta aida Avo en cualce modo… Do el ia vade?” El turna lenta en un sirculo, usante sua mano per scermi sua oios contra la brilia. “Avo!” – el clama. “Do tu es, Avo?”

No responde veni.

Barbara regarda Ian. “Tu es multe silente.”

“‘Umilida’ ta es la parola coreta. Me ia era, no?”

“Me ave no plu comprende de la situa ca tu.” – Barbara dise. “La interna de la barcon, nosa apare subita asi… sin inclui la plu de la cosas diseda par Dotor Foreman.”

“Acel no es sua nom. Ci el es? Dotor ci? Cisa si nos ta descovre ci el es, nos ta pote comensa esplica tota de esta.”

“La cosa major es ce lo ia aveni, Ian. Nos debe aora aseta lo.”

“Aseta lo es cuasi nonposible. Serta, me vide ce nos es asi, ma…” Ian leva sua spalas sin potia.

Susan dise – “Me no pote vide el! Avo es vidable en no loca.”

“El no pote es multe distante.” – Barbara dise calminte.

“Me ia ave un senti strana, ante un momento… como si on… regarda nos.” Susan forti sua vose. “Avo? Do tu es?”


La Dotor senta con gamas crusada sur la tera, ambieda par un sperde de sua posesedas, e esaminante un calculo covreda con mos en atende preocupada. Esplorante en sua poxes, el produi un pipa curva de sepiolita e un caxa grande de fosfores de modo pasada.

Ascondeda entre la rocas, Kal regarda la atas de la stranjer con fasina. Curiosa, el apoia a ante cuando la animal produi ojetos misteriosa de su sua peles. La animal manipula un de la ojetos – e Kal vide un miracle!

Teninte firma sua axa de petra, el leva se e pasea silente en dirije a sua preda.


“Avo!” Susan clama denova. “Avo!”

De alga loca distante, los oia un cria de dole, un xilia de vinse – e silentia a pos.

“Lo ia veni de acel dirije.” – Ian dise. “Veni!” Los core a la sona.


Pos no multe tempo, los trova la ensirca rocosa. La xapo vea de pelo de la Dotor reposa sur la tera. A sua lado, on ave sua pipa e sua libro de notas. On ave no trasa de la Dotor mesma.

“Avo!” Susan xilia. “Cual ia aveni?”

“No panica, Susan.” – Ian dise avertinte.

Susan comensa trepa sur la lado de la rocon la plu prosima. “Me nesesa trova el. Cisa me va vide el de sur asi.”

“Bon, ma atende.”

“Vide, Ian.” – Barbara xuxa. El indica con sua mano.

La contador de Geiger reposa a sua pedes. Sua vitro es rompeda.

Ian prende lo e esamina lo. “Acel no es usable aora!”

“Cisa el ia vide alga cosa interesante.” – Barbara sujesta noncomfortosa. “Cisa el ia freta a via per investiga, mera?”

Ian prende la pipa de la Dotor. “E el ia cade esta?”

“Alora, en tua opina, cual ia aveni?”

“Bon, me suposa ce lo es posible ce el ia vide alga cosa, ia deveni stimulada, e ia vade a via.” – Ian dise lenta. “A la otra lado, lo es posible ce el ia es – saisida. Acel cria ia pare conteni plu ca stimula.”

Susan salta de sur sua roca. “Me vide no cosa. On ave no trasa de el en cualce loca.” El regarda angusada Ian e Barbara. “Alga cosa ia aveni a el, me sabe lo. Nos nesesa trova el.”

Sua tono es cuasi isterica, e Barbara dise – “Calmi tu, Susan. La panica no va aida.”

Susan no escuta. El acrupi e prende la libro de notas. “El ia lasa sua notas!”

“Lo pare ce el ia lasa un cuantia de cosas asi e ala.” – Ian dise. “Xapo, pipa, libro de notas, contador de Geiger…”

“Cisa el ia pone tota de los sur la tera e ia vaga a alga loca.” – Barbara sujesta, plu per consola Susan ca car el mesma crede lo.

Susan secute sua testa con enerjia. “No, no, no. Avo ta lasa nunca sua libro de notas. Lo es esensal per el. Lo ave la codigos desclavinte per alga de la macinas en la barcon, e notas sur locas cual nos ia visita. El ta vade nunca a via e lasa lo. Per favore, nos nesesa vade e xerca el. Alga cosa ia aveni, me sabe lo.”

“Nos va trova el.” – Barbara dise lejerinte. “El no pote es multe distante.”

“Cual tu ia vide a la otra lado de la rocas, Susan?” Ian demanda.

“Sola un linia de arbores. Me crede ce lo es la comensa de la foresta. On ave un spesie de buco entre los. Lo ia aspeta como un curso.”

“Oce. Nos va xerca prima ala.” Ian paci la posesedas de la Dotor en sua poxes, reponente la contador rompeda de Geiger sur la arena. Cuando el repone lo, el pausa per un momento, colpetante la arena con la palma de sua mano.

Barbara oserva curiosa. “Como?”

“Esta arena. Lo es fria. Cuasi jelada.”

Ian reti se, e gida los sirca la rocon.


En la cava de la tribu, Hur regarda ansiosa la laboras futil de Za con sua monton peti de bastetas negrida. A lado de el, la figur grande de Horg, la padre gris barbida de Hur, oserva la atentas de Za con oios criticante. “Kal dise ce en la loca de do el veni, el ia es un xef, e ia crea foco a multe veses.”

“Kal menti!”

“Kal dise ce el ia viaja a via de sua propre loca, e ia oblida como on crea foco. El dise ce Orbe, la sol, va fa ce el recorda como on crea lo, e el va crea foco per tota de nos.”

“Tota de la tribu de Kal ia mori en la fria grande pasada.” – Za dise furiosa. “Si el no ia trova nos, el ta mori ance!”

“Cual otra cosas Kal ia dise?” Hur demanda.

“El dise ce Orbe va dona la secreta de foco sola a la gidor.”

“Me es la gidor.” – Za ronca. “Orbe va dona lo a me.” El regarda malumorosa la senes gris. “Me es la fio de la xef, la creafoco grande. An si el no ia mostra a me como on pone flamas en la bastetas, me mesma va descovre pronto la secreta.” Za colpa sua peto con un punio enorme. “Kal ia veni, e me no ia mata el. Me ia permete el come con nos, e dormi en nos cavas.” La vose de Za forti a un ruji coler. “Esce me debe versa la sangue per fa ce la popla inclina ante me?”

Crias stimulada entra de estra la cava. “Asi es Kal! Kal veni!”

“Kal trae a nos sua preda!”

Za saisi sua axa de petra, e sorti corente de la cava, con Horg e Hur prosima a pos.

A estra, los vide Kal ensircada par un fola de la tribu. El porta alga animal strana sur sua spalas, e, en cuando los oserva, el dejeta lo a sur la roca de surfas plana estra la cava.

Curiosa, la tribu asembla, babelante con stimula.

Za puxa se tra la fola e basi sua regarda a la figur nonconsensa sur la petra. “Esta es un creada strana. Perce tu trae lo a nos, Kal? Lo es bon per come?”

Kal grima defiante a el, e sua fas barbida brilia en vinse. “Esce Za, fio de la creor grande de foco, teme un om vea?”

“No. Za teme no cosa.” – Za dise, e puieta la corpo de la vea con sua pede.

“Cuando Za va sorti foco de sua manos?”

“Cuando Orbe deside lo.”

Kal rie. “Orbe es per omes forte. Omes ci pote fa ce Orbe obedi sua vole.” El indica dramosa la corpo sur la roca. “Orbe ia envia esta creada a me como un sinia de sua favore. Esta vea pote sorti foco de sua ditos!”

Ave un murmura de stona temosa de la tribu.

“Me ia vide lo!” – Kal cria. “El es plen de foco a la interna. La fuma sorti de sua boca.”

“E mentis sorti de tua boca.” – Za burla. El apoia a ante e puieta la corpo con sua dito. “El es no plu ca un om vea ci porta peles strana.” La Dotor jemi subita, e Za salta a retro.

Kal ata rapida per saisi un vantaje. “Za teme la creada. Kal no teme. Un arbor strana ia veni, e la creada ia es en lo. Za ta fuji si el ia vide lo, ma me ia regarda e segue!”

Con un ruji coler, Za salta a Kal.

Kal move rapida a lado, e salta a sur la roca. “Oia me!”

“Lasa ce el parla!” Horg cria, e Za retira se.

“Me ia vide ce esta creada sorti foco de sua ditos.” – Kal cria. “Me ia recorda Za, fio de la creor de foco. Cuando la fria grande veni denova, cadun de vos va mori si vos espeta ce Za fa foco per vos. Ma me, Kal, es vera un gidor!” Kal indica sua caturada, a su. “Nos ia combate entre nos como la tigre e la urso. Cuando el ia vide ce mea fortia es tro grande per el, el ia reclina per dormi. Me, Kal, ia porta el asi per fa foco per vos!”

On ave un ruji de aproba.

“Perce vos escuta la mentis de Kal?” Za cria.

Horg dise – “Za ave multe bon peles. Cisa el ia oblida como on senti en la fria.”

“Doman, me va mata multe ursos per la tribu.” – Za cria. “Cadun de vos va ave peles caldinte!”

Horg dise bromante – “Me crede ce tu va es ancora asi doman, frotante tua manos e teninte los supra la bastetas seca e demandante ce Orbe envia foco a tu – e la ursos va resta calda en sua propre peles!”

On fa un cria de rie burlosa.

“Cuando me dise ce me va fa un cosa, me va fa lo!” Za dise.

“Oia me!” Kal xilia denova. “Me dise ce la creor de foco es mor! Tu no es un creor de foco, Za. Tua sola capasia es la rompe de bastetas seca con tua manos. Ma me, Kal, va fa ce los arde – e me va es la gidor!”

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 20 junio 2024 (16:09 UTC).