On ave un momento de silentia tensada.
Za vide ce la gidoria lisca de se. El es min capas ca Kal de usa parolas rusosa per nebli la mentes de la tribu. Ma el es capas de mata…
Saisinte sua axa, Za prepara per salta. Subita Hur cria: “La animal ia abri sua oios!”
La Dotor senti se, jeminte, ponente sua mano a sua testa. “Susan!” el cria. “Susan!”
Susan, Barbara, e Ian freta longo la curso tra la foresta, cuando Susan para subita. “Escuta!”
“Cual lo es?” Barbara demanda.
“Me ia oia la vose de Avo. Lo ia es multe cuieta, ma me ia oia lo! Tu ia oia lo, no, Senior Chesterton?”
“Me ia oia alga cosa… cisa lo ia es un avia o un bestia savaje.”
“Lo ia es Avo.” – Susan dise positiva. “Veni, nos nesesa trova el!” El core a via longo la curso.
“Susan, espeta nos.” – Ian cria. “Veni, Barbara.”
Ja aora, Susan es cuasi ultra vista. Los freta per segue el.
En cuando la Dotor redeveni consensa, sua panica calmi. El studia la creadas vestida en peles ci formi un fola sirca el – el vide la cualias sever e savaje, la vestes de pel, la axas e lansias de petra. El vide Kal e frota cauta sua testa, recordante como sua atacor ia lansa se a el par salta. “Clar, el ia vole catura me sin mata.” – la Dotor pensa. “El ia pote frati mea cranio como un casca de ovo.”
La Dotor regarda la figur masosa ci es la plu prosima a el. El es la plu grande e la plu forte, donce suposable el es la gidor. “Do es Susan—” – el comensa, e alora interompe se. No valua es trovable en revela a esta savajes la esiste de sua acompaniores. La Dotor cade silente, regardetante astuta sirca se, atentante descovre lo cual aveni.
Lo pare ce la savaje barbida ci ia catura el fa alga spesie de parla publica. An en la eda de petra, on trova la politicistes, la Dotor pensa. El regarda plu e espeta.
“Esce vos desira foco?” – Kal cria. “O vos vole mori en la fria?”
“Foco!” la membros de la tribu cria. “Dona foco a nos, Kal!”
Kal leva sua mano per silentia. “Pronto, la fria veni denova, e car vos no ave aora la secreta de foco, la tigre va veni denova a la cavas en la note. Za va dona vos a la tigre, e a la fria, en cuando el frota sua manos e espeta asta cuando Orbe recorda el!” El indica la Dotor. “Esta animal pote sorti foco de sua ditos. Kal ia trae el asi. El parteni a Kal!”
Za puxa se a ante, usante sua spalas. “El es sola un vea en peles strana. El ave no foco en sua corpo. La cosa no es posible.” El brandi sua axa. “Me dise ce Kal resta ja tro longa con nos. Es ja la tempo per sua mori!”
Cuando Za avansa contra Kal, Horg pone se entre los. “Me dise ce ambos de vos parla con veria. Za dise con veria ce foco no pote vive en persones… e Kal dise con veria ce tota de nos va mori sin foco. Si esta animal pote crea foco, nos nesesa ave lo per la tribu.”
Osante, Hur puxa se a ante. “Esce mea padre va escuta la parolas de un fem? On vide fasil do la veria es. Si esta vea pote sorti foco de sua ditos, ta ce el fa lo aora, ante tota la tribu!”
Un cria de aproba veni de la fola.
Za grima coler a Hur. El sabe ce Hur atenta aida el, ce el crede ce lo cual Kal declara es nonposible. Ma Za sabe ance ce Kal es rusosa. An si lo pare nonposible, el no ta risca fa un tal declara ante tota la tribu si el no ta es serta ce el pote suporta lo. E si la animal de Kal va susede crea foco, la direto de Za a la gidoria ta desapare per sempre.
“Me es el ci deside lo cual on fa asi,” – Za dise. “No omes vea e femes – e stranjeres.”
Kal saisi rapida sua vantaje. “Cisa Za no desira vide on crea foco. Cisa el teme. Me, Kal, no teme crea foco. Me va fa ce mea animal crea foco per la tribu. Me va trae esta animal a la cava de cranios, e el va mori si el no dise a me la secreta!”
Fretosa, la Dotor sta se. “Me pote crea foco per vos.” – el cria. “Lasa ce me parti, e me va crea tota la foco cual vos desira.”
Impresada, la fola retira se. “Vos no nesesa teme me.” – la Dotor dise. “Vide mesma. Me es un vea. Como me ta pote dana vos?”
“Cual el dise?” Za ronca.
“Foco!” Horg dise en tonos de stona temosa. “El dise ce el pote crea foco per nos!”
Subita, Kal vide sua vantaje nova lisca a via. “Per me!” el cria. “El va crea foco per me, e me va dona lo a vos. Me va es la creor de foco!”
Egal subita, Za vide como el pote ajusta la descovre de Kal per sua propre vantaje. “Si la animal va crea foco, el va crea lo per me, e per tota la tribu.”
La Dotor, entretempo, xerca preocupada en sua poxes. “Do es mea fosfores? Me nesesa trova mea fosfores!” El sabe ce el ia ave los a ante, car el recorda usa los per ensende sua pipa. El persepi ce sua pipa ia desapare ance. Esce el ia cade ambos de los cuando el ia es atacada? O esce la fosfores ia cade de sua pox cuando el ia es nondiniosa portada asi sur la spala de acel savaje? La modo no importa: la fosfores ia desapare.
Za oserva confusada la Dotor colpeta sua poxes. “Cual el fa aora?”
“Vide, el es la animal de Kal.” – Kal dise. “El va crea foco sola per Kal.”
La Dotor abandona triste sua xerca. “Gida me a mea barcon denova, e me va crea per vos tota la foco cual vos desira.” – el dise esperosa.
Za turna subita a Kal. “Esta es plu de tua mentis, Kal. La vea no pote crea foco.”
“On ia ave un arbor.” – Kal dise desperosa. “El ia apare majiosa. La vea ia sorti de lo, e el ia ave foco en sua ditos. Fuma ia sorti de sua boca.”
La omes de la tribu murmura noncontente. Pos la fali de la Dotor de presenta la miracle prometeda, la opina comun comensa oposa Kal.
Za saisi sua momento. Puxante Kal a lado, el mesma salta sur la roca. “Kal vole es tan forte como Za, fio de la creafoco grande. Ma el pote fa no plu ca menti. Vos ia oia ce el dise ce nos no va ave foco – e ancora nos ave no foco. Za no dise mentis a vos. El no dise – ‘A esta note vos va es calda.’ – e alora lasa vos en la fria. El no dise – ‘Me va asusta la tigre a via con foco.’ – e alora lasa la tigre veni a vos en la note. Vos vole ce vosa gidor es un mentor?”
On fa crias de “No!”. On comensa grima menasante a Kal.
Kal brandi sua axa supra la testa de la Dotor. “Crea foco!”
La Dotor leva sua regarda sin potia. “Me no pote.”
“Tu es trapida en tua propre mentis, Kal.” – Hur dise burlante. El prosimi a Za.
Za fa un ruji grande de rie. “Vide Kal, la xef grande ci teme no cosa! O, Kal grande, salva nos de la fria! Salva nos de la tigre!”
Kal vide sua esperas de gidoria disolve en la ries de la tribu. El saisi la spala de la Dotor, levante el cuasi de sur sua pedes. “Crea foco, vea! Sorti foco de vosa ditos, como me ia vide oji!”
“Me no pote.” – la Dotor cria. “Me dise, me ia perde mea fosfores. Me no pote crea foco – me no pote!”
Za rie cuasi noncontrolable. “Ta ce la vea mori. Ta ce tota de nos oserva Kal, la grande, cuando el combate esta enemi forte!”
Kal estrae un cotel de petra de su sua peles, e teni lo a la garga de la Dotor. “Crea foco! Crea foco, o me va mata tu aora!”
“Nos va reteni Kal, la grande, per xasa per nos!” – Za ruji. “Lo es bon ce nos ave algun cual nos pote burla!”
Kal leva sua cotel.
“No!” un vose xilia. Susan core a la sentro de la sirculo de la tribu stonada. El fa un malpaso, e cade a la pedes de Kal.
Ian e Barbara veni prosima pos el.
Ian salta a ante e luta con Kal. Tra un momento, los combate furiosa. Un otra om de tribu leva un axa de petra supra la testa de Ian. El es a punto de colpa, cuando la Dotor cria comandosa – “Para! Si el mori, vos va ave no foco!”
La om de tribu para la move desendente de la baston, e regarda demandante Za.
“Mata los!” – Madre Vea xilia.
Za considera. “No. Nos no mata los.”
“Los es enemis. Ta ce los mori!”
Impresante, Za dise – “Cuando Orbe trae la foco a la sielo, ta ce el regarda los de supra como sacrifias. A acel tempo, los va mori – e Orbe va es plaseda par nos, e va dona foco a nos. Pone los en la cava de cranios.”
On tira la cuatro stranjeres lutante a via. Kal regarda pensosa Za, e distanti se.
Horg pone sua mano sur la spala de Hur per gida el a via, ma Za desende de sur la roca, e prende la braso de Hur. “La fem es per me.”
“Mea fia es per la gidor de la tribu.”
“Si.” – Za dise. “Me es la gidor. La fem es per me.”
Horg suspira. “Me no gusta lo cual ia aveni. Me no comprende.”
“Veas gusta nunca la avenis nova.”
“En la tempo de tua padre, me ia es sua geror xef. El ia es un gidor forte de multe persones.”
“Si, de multe persones.” – Za repete amarga. “Tota de los ia mori cuando Orbe ia parti de la sielo, e la fria grande ia es sur la tera. Aora, Orbe va dona foco a me denova. A me, no tu. En la mesma modo, tu va dona Hur a me.”
Consolante, Hur dise – “Za va es ance un gidor grande de multe persones. Si tu dona me a el, Za va recorda, e va dona sempre carne a tu.”
Asetante la nonevitable, Horg inclina sua testa e move a via.
Madre Vea fisa Za con un regarda malumorosa. “Nos ia ave gidores ante foco.” – el murmura. “Foco coleri la dios. Foco va mata tota de nos a la fini. Tu ta debe mata la cuatro stranjeres. Mata los!”
Za nega con sua testa, regardante la oscuria negrinte. “Lo va es como me ia dise. Nos espeta asta cuando Orbe brilia denova en la sielo. Alora los va mori.”
Con sua brasos e gamas liada como bestias, Ian, Barbara, la Dotor, e Susan reclina en un cava plu peti, direta pos la cava xef. Pos lia sua brasos e gamas, sua caturores ia lansa los en la cava e retira se en un modo fretosa, cuasi como si los teme resta, rolante un petra grande per bloci la porte.
La cava es peti e oscur, e lo apesta como la moria. On ave cranios a tota partes, posada en piramides sur la tera.
“Tu es oce?” Ian dise, laborosa respirante. “Los no ia feri tu?”
“No, me es oce.” La vose de Barbara trema. “Me teme, Ian.”
Ian pote ofre poca consola. “Atenta resta forte. Nos va evade esta en alga manera.”
Ave isteria en la vose de Barbara. “Como? Como nos va evade lo?”
“Nos va nesesa es rusosa.” – la Dotor dise pensosa. El pare notable vivosa pos sua malesperia: el ocupa ja se en luta contra sua lias. Pos un momento, el dise – “Me espera ce tu pote libri tu, Senior Chesterton – car me no pote.” El regarda la otras. “Pardona me. Me es culpable per tota de esta. Me regrete estrema.”
“Avo, no!” – Susan sanglota. “Nos va trova un modo de evade. No culpa tu.”
(“Perce no?” Ian pensa asida. “La fol vea ia dise coreta: el es culpable per tota!”)
La Dotor regarda la monton de cranios ante se. El puxa un de los en dirije a Ian, con sua pedes. “Regarda acel, mea joven!”
Torpe, Ian prende lo. (Fortunosa, on ia lia sua manos a fronte.) “Lo es un cranio.” El lansa lo a lado, apoia a ante, e prende un otra de la monton – e ancora un otra, esaminante los con atende. “Tota de los es la mesma.” – el xuxa. “On ia abri sua culminas par fende los!”
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 4 april 2024 (17:36 UTC).