An tra la protestas de Ian, la otras espeta ancora zelosa sirca el e oserva sua laboras. Como Barbara ia comenta, on ave vera no multe otra cosas cual on pote fa en la cava, e car tota sua vives depende de sua laboras, on pote apena culpa los per deveni interesada.
“Me crede ce me ole alga cosa.” – Susan dise subita.
“Ance me.” – Barbara acorda. “Un spesie de scalda…”
“Tu fa lo!” – Susan dise stimulada. “Lo va susede!”
Sua gota de la fronte de Ian, e lo pare a el ce sua polsos arde par se mesma. “Ancora no.” – el ronca. “Un tempo… longa… ancora.”
Subita, Za apare a la retro de la cava. “Cual es esta? Cual vos fa?”
“Nos crea foco.” – la Dotor dise impresante.
(“El dise an ‘nos’.” – Ian pensa rebelante. “Ma ci fa tota la labora?”)
Za basi sua regarda a Ian. “Ami?”
Ian leva sua fas, sesante sua labora en surprende. “Como?”
“No sesa.” – la Dotor dise rapida. Fretante, Ian continua sua jira nonfininte de la basto.
“Hur ia dise ce tua nom es Ami.” – Za dise. “Me es Za. Me es la gidor. Tu es la gidor de esta tribu?”
Ancora laborante, Ian regardeta la Dotor, ci fisa un regarda egosa a no cosa.
Ian fa un jesti de testa a la Dotor. “No. El es nosa gidor.”
“Cual tu intende fa con nos?” Susan demanda ansiosa. “Tu va libri nos?”
Za regarda pensosa los. “La omes vea de la tribu ia parla. Los dise ce vos veni de Orbe, la sol. Los dise ce cuando nos redona vos a el, nos va ave denova la foco.”
“Redona? Como?” la Dotor demanda agu.
“Par sacrifia – sur la petra de mori, estra la cava grande. La omes vea dise ce vosa moris va retrae la foco.”
“Ma acel no es vera.” – Barbara dise xocada. “Si vos mata nos, vos va ave nunca foco.”
“Me pensa tal.” – Za dise. “Me pensa ce vos es un tribu nova de la otra lado de la montania. Mostra a me como on crea foco, e me va regida ala vos.” Za pausa. “Si vos no mostra pronto como on crea foco, me no crede ce me va pote preveni vosa moris sur la petra de mori.”
Ian labora sin sesa tra tota esta tempo. Subita, el cria – “Lo susede. Me crede vera ce lo comensa susede!”
Cadun forma un fola sirca el. Un risa pico de fuma leva de la erba secida sirca la peso de lenio plana. “Pone plu erba e folias seca ala, Barbara. Ma cauta, no sofoca lo.”
Susan e Barbara acrupi a sua lado, zelosa oservante.
La Dotor fisa un regarda dominante a Za. “Esce tu comprende lo cual nos fa? Nos crea foco per tu.”
“Me regarda.”
“La tribu intera ta debe regarda.” – Ian dise. “Alora cadun ta sabe como on crea foco.”
“Sola la gidor crea foco.” – Za ronca. “Tota la tribu no pote es la gidor.”
“Tu dise vera – ma en nosa tribu la creafoco es la min importante.”
“Me no crede esta.”
“Ma si.” – la Dotor dise egosa. “El es la min importante car, en nosa tribu, tota de nos pote crea foco.”
Susan pone sua labios a la orea de Barbara. “Me espera ce el no esije ce Avo demostra lo!”
Un cria subita veni de Ian. “Susan, Barbara! Sofla dulse a esta loca!”
Los ajena a sua lado e comensa sofla a la erba fuminte. “No tro multe.” – Ian avisa. “Acel es bon. On ave un brilieta. Me vide brasas ala. Dona plu erba a me, Susan.”
Aora un colona magra de fuma leva ja de la erba.
Subita, on oia un crepita. Un flama salta a supra, e un otra a pos…
Ian lansa la arco a lado, e comensa nuri la arde pico con erba e bastetas. La flamas deveni sempre plu alta asta cuando un foco peti arde sur la petra.
“Tu ia fa lo.” – Susan cria stimulada. “Ian, tu ia fa lo!” El lansa sua brasos sirca sua colo e abrasa el.
Barbara colpeta el a la dorso. “Lodas, Ian. Bon fada!”
Sola la Dotor no parla. El oserva Za.
Za fisa sua regarda a la flamas en un fasina completa.
“Foco!” el murmura. “La foco reveni!”
Horg e la omes vea e la otra gerores ia asembla se sirca la petra de sacrifia con sua surfas plana, e parla en voses cuieta. “Za es ja en la cava de cranios tra un tempo longa.” – un de la gerores dise. “Pronto, Orbe va leva en la sielo.”
“Za parla a la stranjeres.” – Hur dise. “El aprende sua secretas.”
“Cuando Orbe toca la petra, el debe sorti los.” – un otra dise. “Nos va versa sua sangue sur la petra de sacrifia.”
“E nos espeta ancora.” – Horg cexa. “Za parla – e nos ave no carne, no frutas de la arbores, no radises. Za no es un gidor.”
“Si Za ta pote oia tu parlante, el ta mata tu.” – Hur dise coler. “Tu ta reclina sur la petra vea asta cuando tua sangue ta esflue.”
“Cisa Za lasa la stranjeres parti.” – Horg dise suspetosa. “Cisa el libri los, como Madre Vea ia fa.”
“Lo es un menti.” – Hur cria. “Za ia envia un geror per vijila la cava. El ia comanda la mata de la stranjeres si los va sorti.”
Ma la murmuras continua. Hur escuta, ansiosa. Si Za no va ata pronto, la tribu va rebela contra Za e destrui el.
La gardor estra la cava no vijila multe bon. Como tota la membros de la tribu de Za, el no ave la disiplina per cualce taxe longa. Plu, perce on nesesa garda la stranjeres cuando Za es con los?
Pos el, Kal cade de la roca supra el, prosimi con pasos tan cuieta como un gato grande, e saisi sua garga.
Tra un momento, los sta fisada en un luta silente, e la musculos de Kal infla con la eserse. Alora, la gardor cade mor a la tera.
Kal estrae sua cotel, e entra cuieta a la tunel cual gida a la cava de cranios.
On ia aumenta ja la arde peti a un foco vera cual flami felis en la sentro de la cava. Con suprasiles fronsida, Za escuta en cuando Ian esplica la funsiona de la arco de foco.
La flamas dansante lansa ombras jigante sur la mur – e subita Susan persepi ce un de la ombras no parteni a los. Un ombra ses, vasta e menasante, move alta sur la mur de la cava. “Vide!” Susan xilia.
Los turna e vide Kal, ci avansa de la retro de la cava con sua cotel en sua mano.
Za saisi sua axa e vade per encontra el.
Tra un momento, los sirculi sirca la foco, oservante lunlotra, e alora ambos salta simultan per ataca. La combate es savaje e cruel – an plu savaje car ambos omes perde pronto sua armas. Un colpa fortunosa de la axa de Za rompe la cotel de Kal a fratos. Cuando Za leva la axa per colpa, Kal lansa se a su, lutante con el. Tra un momento, los combate per posese la axa. Subita, Kal torse lo de la mano de Za, ma el mesma sesa teni plu lo en la ata. La axa clace sur la tera, e de alora la du omes batalia como bestias savaje con dentes e garas.
Susan asconde sua testa sur la spala de Barbara, e ambos regarda a via. Ian oserva la combate con un fasina xocada. La Dotor regarda sin pasion, seguente la progresa de la batalia como alga imperor roman ci oserva du combatores en un stadio.
Tra alga tempo, difisil es persepi esce cualcun comensa vinse. Za es plu masosa e plu forte, ma Kal es plu rapida e tan ajil como un gato. Sempre denova, el libri se de Kal par torse. Ma la fortia plu grande de Za dona a el la vinse final. Caturante Kal en un saisi asustante, el lansa sua corpo intera a la tera. An cuando Kal reclina ala, partal sturdida, Za prende subita un roca grande e fa ce lo desende per crase…
On ave aora un cranio fratida nova en la cava de cranios.
Estra la cava, la tribu deveni nonpasiente. Cuando la raios prima de la sol apare sur la petra de sacrifia, Horg fa un ruji coler. “Orbe es supra nos, e on ave ancora no foco. Orbe espeta sua sacrifia! Clama Za! Comanda ce el sorti la stranjeres de la cava de cranios! Si el no obedi, nos va sacrifia el con los!”
Za tira la corpo de Kal a la retro de la cava, prende sua axa, e reveni lenta a la foco. El ave sangue sur sua manos. “Aora Kal es mor. Me es la gidor – e nos ave foco!”
Subita, la sona de crias coler veni de estra la cava.
“Za! Za! Sorti la stranjeres! Nos debe sacrifia la stranjeres a Orbe!”
“Za! Za! Za!”
La voses deveni plu forte, plu coler.
Ian prende un basto longa e usa la foco per ensende la fini. El dona lo a Za. “Asi! Mostra esta a tua tribu!”
Za aseta la ramo ardente. “Vos va espeta asi.”
“Nos va sorti con tu.”
“No. Vos va espeta asi!”
Teninte alta la ramo ardente supra se, Za vade tra la tunel.
Coler, Ian regarda sua parti. “Perce nos no pote acompania el?”
“Cisa nos va es plu secur asi.” – la Dotor dise. “Lasa ce el vade, Chesterton, lasa ce el vade. Lasa ce el mostra foco a la tribu, e fundi sua gida. A pos, el va libri nos.”
La crias sesa direta cuando Za sorti marxante de la cava, portante sua torxa ardente.
El avansa a la sirculo de la gerores, e los acrupi temosa se. Za estende la torxa. “Foco!”
Horg estende sua mano a la flamas e acorda adorante con sua testa.
Za regarda defiante los en la sirculo. “Kal es mor. Me dona foco a vos. Me es la gidor.”
Horg inclina sua testa. “Si. Tu es la gidor.”
“Nos va dona comeda e acua a la tribu nova en la cava de cranios.” – Za comanda.
“Nos ave no carne.”
Za regarda la sol levante. “Me va entra a la foresta e retrae carne.”
Horg leca fame sua labios. “Si. Me recorda como la carne e la foco combina bon.”
“Nos va combina los denova. Garda bon la tribu nova. Ta ce los va es asi cuando me reveni. La otras de vos va colie lenio. Nos va manteni la vive de la foco en la cava grande.”
Za dona la ramo ardente a Horg, e parti en dirije a la foresta.
Hur regarda el parti, e sua oios brilia con orgulo. “Trae frutas e acua.” – el comanda. “Me debe nuri la tribu nova – como Za, la gidor, comanda.”
En la cava de cranios, la espeta pare sin fini. “Nos no ia susede.” – Ian dise. “El va prisoni nos asi.”
“Algun veni.” – Susan clama.
Hur entra a la cava, portante frutas envolveda en un peso de pel.
“Ma cual aveni?” Ian esije. “Perce vos prisoni nos asi?”
Hur pone la frutas asta la foco. “Za ia entra a la foresta per xasa. A pos, vos va ave carne.”
“Perce nos no pote sorti?” Barbara demanda.
“Per favore, lasa ce nos sorti.” – Susan suplica. “Lo es asustante en esta loca.”
“Za comanda ce vos resta asi. Za es la gidor.”
“Ma nos ia aida vos! Nos ia dona an foco a vos.”
“Si, nos ave aora foco.” – Hur dise sin emosia.
Hur comensa move a via, ma Barbara catura sua braso. “Tra cuanto tempo nos debe resta asi? Tra cuanto tempo nos debe resta con vos?”
“Sempre.” – Hur dise simple. Tirante se a via, el turna e parti de la cava.
“Nos ave aora foco.” – Ian imita amarga. “Si, e me es el ci ia dona lo a los – como un fol. Plu bon si me ia ta espeta, e negosia con los…”
“No ajita tu, mea joven. Tu ia ata coreta.” – la Dotor dise. “Tu ia ata en la sola modo posible.”
Barbara acorda con sua testa. “A la min, nos vive ancora. Los ta sacrifia ja nos si nos no ia ta dona foco a los.”
Susan regarda la cava macabre. La lus de la foco peti dansa asustante sur la cranios fratida.
“Sempre.” – el xuxa. “Vos ia oia lo cual el ia dise. Los va prisoni nos asi per sempre…”
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 4 april 2024 (17:36 UTC).