Capitol 2: La Dotor apare

Cuando la auto de Ian entra lenta verjente a la Rua Totters, Barbara dise – “Parci ala, Ian. Nos va vide bon la portones, sin es tro prosima. Nos no vole ce el vide nos.”

Ian no pote evita surie a sua dominantia nonconsiderada. Obedinte, el parci la auto sur la loca indicada, aplica la freno de mano, e descomuta la lampas e la motor. “Nos ta espera ce el no va vide! Cisa la esplica ta es alga difisil, ce nos senta asi en un auto parcida.”

Barbara fa un regarda desaprobante a el. “Lo pare ce el no ia ariva ja.”

“Fortunosa, la nebla no ia es tan mal ce me mesma ta fali trova la loca.”

Barbara tira la colar de sua jacon a plu alta sirca sua colo, e dise esitosa – “Me suposa ce nos ata bon, no?”

“Tu vole dise ce lo es alga difisil per justi – esta investiga de un misterio imajinada?”

“Ma sua laboras de casa…?”

“Acel es apena plu ca un escusa, no? La vera es, Barbara, ce ambos de nos es curiosa sur Susan Foreman, e nos no va es felis asta cuando nos sabe alga la esplica.”

“Ma tu no pote simpli lo en tal modo! Si me ta crede ce me es mera un interferor, me ta revade direta a casa. Me ia opina ce tu ia acorda ce el ave un cualia misteriosa.”

Ian balia. Plu temprana, el ia comparti la consernas de Barbara, ma aora el senti sempre plu dutosa sur la situa intera. “Me suposa tal… Ma probable on ave un esplica multe simple per tota.”

“Cual, per esemplo?”

“Oce…” Ian dise alga debil. “Per comensa, lo es clar ce la xica es estracomun intelijente – cuasi un jenio, me imajina.”

“E la bucos? La cosas cual el no sabe?”

“Cisa el consentra sola sur lo cual interesa el, e iniora la resta.”

“Ma acel no sufisi, Ian. Como tu esplica un xica adolesente e estracomun intelijente ci no sabe la cuantia de xilinges en un paund?”

(A esta tempo, la desenio de 1960, Britan manteni ancora sua sistem unica complicada de mone – cuatro cuatrimes o du duipeniges en un penig, des-du peniges en un xiling, e dudes xilinges en un paund.)

Ian fisa sua regarda a el. “Vera?”

Barbara acorda con sua testa, recordante. Susan no ia pare an multe turbada par sua era riable.

“Pardona, Seniora Wright. Me ia crede ce vos usa ja la sistem desimal.”

“No es fol, Susan. La Statos Unida e la plu de paises european ave un sistem desimal, ma tu sabe tota bon ce nos no usa lo.”

Susan grima momental, ante dise – “A, me comprende! La sistem desimal no ia comensa ja. Vos va adota lo pos alga anios!”

Ian regarda Barbara con stona. “Un sistem desimal, en England? Me ta gusta vide lo! Me suposa ce el ta pote es un stranjer. El ave alga cosa en sua modo de parla…”

“O, ma no, Ian. Aseta lo. La situa es vera nonlojical.”

“Si, lo es tal.” – Ian acorda. “No parte de acel xica es lojical. Ante un o du dias, tu sabe, me ia parla sur cambias cimical. Me ia distribui paperes de pH per mostra causa e efeto.”

“Me suposa ce el ia sabe ja la solve an ante la comensa?”

“Si, ma plu ca acel – simple, la solve no ia interesa el.”

Ian pote aora revide la nonpasientia con cual Susan ia regarda el. “Si, lo es clar ce la roja deveni blu, Senior Chesterton, ma esta es car nos labora con du cimicales nonativa. Los reata sola en relata con lunlotra.”

“Tu ave ala la gol intera de la esperimenta, Susan.”

“Si, me sabe, Senior Chesterton. Ma… ai, lo es alga evidente, no? Vide, me no vole es noncortes, ma esce nos no ta pote labora con du cimicales ativa? Alora la roja ta deveni blu sola par se mesma, e tota de nos ta pote progresa con un tema plu interesante.” El ia suspira. “Pardona me. Acel ia es mera un idea.”

Revenante a la presente, Ian dise – “E el ia parla considerada, Barbara. Esta esperimentas simple es no plu ca juas de bebe per el. Lo es tan iritante.”

“Me comprende tua sentis. La situa ia aumenta tan ce me desira aora fa ce el dise un era!”

“Un otra cosa ia aveni a un o du dias ante oji, en matematica.” – Ian dise subita. “Me ia dona un problem a la clase, un egali con A, B, e C como la tre dimensiones…”

La mente de Ian revade a la sena en la sala de clase. Susan ia sta a la mureta negra, studiante la egali. “Lo no es posible ce on fa lo con sola A, B, e C.” – el ia protesta. “On nesesa usa ance D e E.”

“D e E? Perce de mundo? Fa la problem donada, Susan.”

La vose de Susan ia conteni un cualia simil a despera. “Me no pote, Senior Chesterton. On vera no pote labora con sola tre de la dimensiones.”

“Tre dimensiones? O, numero cuatro es la tempo, me suposa. Perce tu nesesa tua E? Cual es la dimension sinco, en tua opina?”

“La spasio,” Susan ia dise simple.

Cuando el ia fini raconta la aveni a Barbara, Ian regarda el con despera. “Per alga razona, me ia ave la impresa ce el persepi la tempo e la spasio como du cosas multe simil – como si on ta pote viaja tan fasil tra la un como tra la otra!”

“Tro multe demandas, Ian, e la respondes no sufisi.”

“Aora,” – Ian dise en resoma – “nos ave un xica de des-sinco anios ci es intera briliante a alga temas e angusante mal a otras…”

Barbara toca el a la braso. “E el es asi!”

Estra la patio de bricabrac, Susan veni fretante longo la strada. El pausa per un momento, regarda sirca se, abri la porteta de entra par puia lo, e desapare a en.

“Nos ta debe segue el, no, Ian? Me odia imajina ce el es solitar en acel loca.”

“Ma esce el es solitar?”

“Cual tu vole dise?”

“Vide, el ave des-sinco anios, recorda. Cisa el encontra un ami de cor. Tu no ia pensa a acel?”

Barbara rie. “Me espera cuasi ce lo es tal – la normalia ta es tan merveliosa.” El regarda noncomfortosa en dirije a la bricabraceria. “Me sabe ce esta es fol, ma me senti cuasi asustada, como si nos es a punto de interfere en un cosa cual nos ta debe evita.”

Ian Chesterton estrae un lampa de pox de la portaganto, e abri la porte de la auto. “Veni, Barbara. Ta ce nos fa nos taxe!”

Los sorti de la auto, e traversa la strada a ante la portones de la bricabraceria.

Barbara esita momental. “Esce tu no senti alga cosa?”

“Me aseta la vive como lo aveni.” – Ian dise felis. “Ma veni.”

Puiante la porteta peti, el abri lo, e los entra.

An en la oscuria partal, los vide ce la patio pico es tan plen de ojetos ce la spasio sufisi apena per sua moves.

Ian brilia sua lampa sirca los. El salteta cuando la raio de lus lumina alga cosa cual pare un corpo umana, ma lo es mera un manicin vea de fenetra de boteca, con testa fratida.

“Tan desordinada!” – Ian murmura. “Me no intende move esta monton per trova el!”

El fa un poca de pasos a ante, e sta sur un peso de detrito nonfisada. Sua pede torse su el, el bambola per manteni sua ecuilibra, e la lampa de pox es lansada de sua mano. Lo estingui se cuando lo colpa la tera, e lo rola a via a alga loca nonvidable.

“Txa!” – Ian dise savaje – “Me ia cade la lampa enfernal!”

“Usa un fosfor, donce.”

“Me no ave. Ma bon, lo no importa.”

Lenta, sua oios ajusta a la oscuria, e los comensa move cauta tra la patio peti.

“Susan?” – Barbara clama. “Susan, esce tu es asi?”

No responde veni.

“Susan, tu ave asi Senior Chesterton e Seniora Wright.” – Ian cria. “Susan!” Ancora no responde veni. Ian regarda difisil tra la negria. “El no pote es distante – la loca es tro peti. E el no ia sorti de la patio, car nos ta vide el.”

Barbara move a ante, e alga cosa cuadro e solida emerji tra la oscuria ante el. “Ian, vide esta.”

“Lo es un ciosco de polisia! Perce lo es asi? Los sta usual sur cantos.” El estende sua mano e colpeta la ciosco. “Lo pare solida.” El puia la porte per atenta abri lo, e aranca sua mano a via.

“Como, Ian?”

“Palpa lo.”

Esitante, Barbara pone sua mano a la porte de la ciosco. El retira lo, simil fretosa. “Lo ave un spesie de vibra cuieta.”

Ian acorda con sua testa. “Lo pare – vivente…” El pasea tra tota la via sirca la ciosco, reaparente a la fronte. “Ma lo ave no lias eletrical – estra cisa tra sua solo.”

Barbara retira se. Per alga razona, la ciosco fa ce el senti noncomfortosa. “Oce, acel basta ja per me. Ta ce nos vade per trova un polisior, e informa el ce nos crede ce Susan ia desapare. Los pote organiza un xerca conveninte.”

“Bon.” Ian pausa cuando el oia la cruji de la porteta abrinte. On ave un sona de tose. “Algun es ala!”

“El es Susan?”

Ian pote apena deteta un figur capida ci avansa tra la negria. “No, el no es. Rapida, veni asi.” El tira Barbara a pos un monton de mobilas vea, e los jiba sua testas per no es vidable.

La forma oscur prosimi, e revela se como un om vea con capeles blanca, envolveda en alga spesie de capa. El porta un xapo de pelo, strana formida, e un scarfa longa e raiosa es enrolada sirca sua colo. La vea pausa momental, tosente como un vea, e colpeta sua peto. El pare murmurante… El vade a la ciosco de polisia, estrae un clave de sua pox, e abri la porte.

A la stona de la du oservores, la vose de un xica sorti de la interna de la ciosco. “Tu ia reveni, Avo!”

“El es Susan!”

“Xux!” – Ian dise avisante, ma es tro tarda. La vea ia oia los. El clui la porte de la ciosco con un pum, e turna rapida a los.

Desidente fa a la min un atenta de benefica de la era, Ian leva se. “Pardona me.”

La vea regarda el con un poca de surprende. “Cual tu fa asi?”

“Nos xerca un xica…”

“Nos?”

Barbara emerji ance de sua loca de asconde. “Bon sera.”

La vea studia los per un momento. Sua fas es senesente e plietosa, ma, par alga modo, vijilante e vivosa a la mesma tempo. Sua oios pare ardente con un intelijentia ferose, e un nas becin comandante dona un aspeta egosa e aristocratal a sua cualias. “Cual vos intende?”

“Nos xerca un de nosa aprendores.” – Ian dise, alga debil. “Un xica nomida Susan Foreman. El ia entra a esta patio.”

“Vera? Asi? Vos es serta?” La vose de la vea ave un spesie de seticisme condesendente, como de algun ci parla a un enfante imajinosa.

“Si, nos es serta.” – Barbara dise firma. “Nos ia vide el – de la otra lado de la strada.”

“Un de sua aprendores.” – la vea murmura a se. “No la polisia, donce.”

Ian es alarmada par la parolas partal oiada. Perce la vea es tan ansiosa sur la polisia? “Pardona me?”

“Perce vos ia spia a el? Ci vos es?”

Ian persepi ce el mesma es aora la atacada. Par alga modo, lo es como si el ia deveni la person ci debe esplica sua atas.

“Nos ia oia la vose de un xica joven esclamante a tu –”

“Donce vos ave un capasia multe agu de oia. Me ia oia no cosa.”

Barbara indica la ciosco. “Ma nos ia oia lo. E lo ia emerji de ala.”

“Vos ia imajina lo.”

Barbara senti se colerinte. “La plu serta, me no ia imajina lo!”

Como si el deside ce el no pote razona con Barbara, la vea dirije se a Ian. “Me demanda a tu, mea joven.” – el dise lisa. “Esce vera tu opina ce lo es asetable – vos suposa ce cualcun ta es a interna de un tal armario?”

La tono de Ian es egal calma. “E donce esce lo ta es nonasetable si me ta solisita tu permete per regarda a interna?”

La vea pare stonada par la sujesta. El prende un depinta vea, e studia lo con preocupa. “Me vole sabe perce me no ia vide esta a ante. Ma vera strana, no? Lo es multe umida e susia.”

“Esce tu no ta aida nos?” – Barbara prea. “Nos es du de sua enseniores – el vade a la scola de Coal Hill. Nos ia vide el entrante, e nos no ia vide el sortinte. Natural, nos es multe ansiosa.”

La vea regarda ancora atendente la depinta. “Vera, on ta debe limpi lo…” El leva sua regarda a Barbara. “O, me regrete ce tota de esta ave no relata con me. Me sujesta ce vos parti.”

“No ante cuando nos es convinseda ce Susan no es asi.” – Ian dise coler. “Franca, me an no comprende tua disposa.”

“Vera? E la tua ave multe mancas, mea joven.”

“Esce tu ta abri acel porte?”

La vea turna se a via en refusa. “On ave no cosa a interna.”

“Donce perce tu teme mostra a nos?”

“Teme?” la vea dise despetosa. “O, vade a via!” El parla como algun ci rejeta un enfante de ci sua condui fol ia deveni final noiante.

“Veni, Barbara, me opina ce nos ta debe vade per trova un polisior.”

Barbara acorda con sua testa, oservante la vea per vide la efeto de la menasa.

El leva sua spalas. “Multe bon. Segue vosa preferes.”

“E tu va acompania nos.” – Ian dise frustrada.

La vea surie. “O, vera? Me no opina tal, mea joven. O no, me no opina tal.”

El senta se sur un seja de cual sua dorso es rompeda, e prende denova la depinta, studiante pensosa lo.

Ambos partitos es blocida.

Sin potia, Barbara regarda Ian. “Nos no pote forsa el.”

“E nos no pote lasa el asi. Esce lo no es evidente? El ia enclui Susan par clave en acel.”

Los prosimi plu a la ciosco. “Proba la porte.” – Barbara sujesta. “Cisa tu pote entra par forsa.”

Ian esamina la securador. El colpa la porte, ma lo es firma clavida. “Lo ave an no manico – esta debe es un spesie de securador secreta.”

“Ma acel ia es la vose de Susan – no?”

“Si, natural.”

Ian bateta forte la porte con sua nocas. “Susan! Susan, esce tu es a interna? Nos es Senior Chesterton e Seniora Wright.”

La colpas de Ian sur la ciosco pare irita la vea strana. Abandonante sua atenta de pare noninteresada, el leva se e prosimi a los. “Esce tu no es alga dominante, mea joven? Tu pensa ce tu ia vide un xica joven entra a la patio. Tu imajina ce tu ia oia sua vose. Tu crede ce el es cisa ascondeda a interna de acel? La atesta es multe debil, no?”

Sua parolas pare drena la sertia a via de Ian, e el trova ce el no sabe plu esce el ia imajina la situa intera.

Barbara no es diverjeda. “Ma perce tu no vole aida nos?”

“Me no impedi vos. Si ambos de vos opina firma ce vos desira aspeta fol, me sujesta ce tu reali vosa menasa. Vade per trova un polisior.”

Ian dise setica – “E, entretempo, tu va desapare cuieta en la otra dirije, me suposa?”

“Tu no nesesa insulta me, mea joven.” – la vea dise egosa. “On ave sola un modo de sorti de esta patio. Un de vos pote espeta a esterna e oserva la portones. Me va es ancora asi cuando vos reveni. Me vole vide vosa fases cuando vos atenta esplica vosa condui a un polisior.”

“Oce, nos va fa acel.” – Ian dise defiante. “Veni, Barbara. Tu pote oserva de la auto, en cuando me vade per trova un polisior.”

Los es a punto de move a via, cuando algun abri la porte de la ciosco de interna.

La vose de Susan clama – “Ma cual cosa ocupa tu a estra, Avo?”

La vea salta en dirije a la ciosco con rapidia tigrin. “Clui la porte!” – el cria. El saisi la porte, evidente con la intende de reclui lo con un pum, ma Ian es plu rapida ca el, e saisi sua braso, atentante tira el a via. An con sua eda, la vea ave un fortia stonante, e susede cuasi lansa Ian a via. Barbara veni e partisipa, e, en alga manera, con lutas savaje, Ian e Barbara entra bambolante en la ciosco de polisia – e ariva en un loca tota nonposible.